مشكلة التكييف في اوكتافيا a4 اوتوماتيك..ارجو المساعدة

**spider6666** · 29-08-2010 11:09 AM

اخواني عندي مشكلة وعاوز اعرف الحل ليها ايه او اي حد يقولي اروح لمين يحل المشكلة دي
بدا الموضوع من حوالي شهرين عندما بدا التكييف في عدم التبريد وذهبت الى متخصص التكييف في مدينة نصر وقام بالكشف على العربية واكتشف انه الكويل بايظ(سربنتينة التكييف ) وبيسرب ويحتاج الى تغيير وبعد ما جيبت واحد جديد كشف تاني وقالي انه الاكسبنشن محتاج تغيير لانه بيسرب فغيرته برضه (الاكسبنشن هوه جهاز بيركب فيه مواسير التكييف من الناحية اليمنى في السيارة جوه الكبوت من قدام ولونه ذهبي وراكب فيه المواسير) المهم التكييف اشتغل وزي الفل لحد ما روحت البيت وتاني يوم الصبح باشغل التكييف مفيش ولا نقطة تبريد مجرد هوا فقط..رحتله تاني كشف على التكييف بجهاز الضغط وقالي العربية محتفظة بالغاز بتاعها غيرلي الاكسبنشن رحت وغيرته وجيبت واحد تاني وركبته وروحت البيت ونفس المشكلة تاني يوم مفيش تبريد كلمته وزعقت معاه قالي تعاله اشوفهالك....انا والله قرفت من الموضوع ده...حد عنده حل للموضوع ده يقولي عليه..لاني جيبت اخري منه وصرفت كتير قوي عليه ومفيش فايدة ..ايه ممكن تكون المشكلة او اروح لمين متخصص في تكييف الاوكتافيا a4يحلهالي..واحد قالي ممكن يكون في حاجة اسمها "الكليتش" انها مش بتستجيب وان مش عارف ايه الكليتش ده ارجو الرد سريعا وشكرا

**spider6666** · 29-08-2010 11:24 AM

انا متاسف اني كتبت الموضوع مرتين ولاكن ده مش بسببي ..الجهاز هنج اول مرة لوحده وبعدشن عمل الموضوع تاني بعد التهنيج

**solly1979** · 29-08-2010 12:12 PM

يا باشا سؤال لما بتشغل التكييف المراوح بتشتغل ولا ؟

لانها حصلت معايا من كام شهر اشغل التكييف المراوح متشتغلش وفى هوا فى التابلوة لكن مفيش تبريد
رحت بردة لواحد بتاع تكييف قالى الشحنه تمام
طلعت على الحرفين واحد بتاع كهرباء مش تكييف لان كدة الموضوع ليه علاقه بالكهرباء
اول حاجه شك فى الوحدة الرئيسيه بتاعه تشغيل التكييف الى فيها الهوا الى بتعلى العربيه مش فاكر اسمها ايه (السورنيد متهيئلى)
المهم جبتها استيراد ب 150 غيرها مافيش فايدة
قالى روح جيبلى مقاومه استيراد كانت ب 300 جنيه بتتحط تحت البطاريه ركبها
والحمدلله التكييف اشتعل تمام

**spider6666** · 29-08-2010 01:01 PM

المشاركة الأصلية كتبت بواسطة solly1979

يا باشا سؤال لما بتشغل التكييف المراوح بتشتغل ولا ؟

لانها حصلت معايا من كام شهر اشغل التكييف المراوح متشتغلش وفى هوا فى التابلوة لكن مفيش تبريد
رحت بردة لواحد بتاع تكييف قالى الشحنه تمام
طلعت على الحرفين واحد بتاع كهرباء مش تكييف لان كدة الموضوع ليه علاقه بالكهرباء
اول حاجه شك فى الوحدة الرئيسيه بتاعه تشغيل التكييف الى فيها الهوا الى بتعلى العربيه مش فاكر اسمها ايه (السورنيد متهيئلى)
المهم جبتها استيراد ب 150 غيرها مافيش فايدة
قالى روح جيبلى مقاومه استيراد كانت ب 300 جنيه بتتحط تحت البطاريه ركبها
والحمدلله التكييف اشتعل تمام

اه ياباشمهندس لما باشغل التكييف المراوح بتشتغل وبالفعل غيرت السورنيد او المسمى الاخر ليه "الاكسبنشن" ومازالت المشكلة قائمة

**inspiron** · 29-08-2010 06:03 PM

لما بتشغل التكييف..بتسمع صوت تكة الكمبريسور ولا لا..لو لا يبقي الكباس مش شغال.ويتم الكشف عليه

وبعدين عاوز ألفت نظرك لنقطة مهمة..الكويل مش هو السربنتينة..السربنتينة حاجة والكويل حاجة تانية..الكويل ده بيبقي عبارة عن جهاز إسطواني الشكل ( شبه فيلتر الهواء الرياضي بالظبط).بيكون مكانه أسفل الفيبر الأسود اللي في آخر الكبوت ( جنب فيلتر التكييف )..وده لو في أي فتحة بيعمل تسريب فريون.الكلام ده حصل في العربية النيلة اللي إسمها أوبل فيكترا اللي كانت معايا. كشفنا علي كل حاجة ودوخة ما بعدها دوخة وفي النهاية طلع الكويل ده ...حضرتك هتعمل الآتي. هتروح لواحد بتاع تكييفات محترم إسمه صلاح في شارع العشرين في فيصل..هتدخل شارع العشرين تمشي فيه لحد ما يقابلك مسجد علي يمينك..تدخل في الشارع اللي قدامه الناحية التانية..تسأل علي ورشة الحاج صلاح بتاع التكييفات.هتروحله هيعمل اللي هقولك عليه ده...أولا :

1- هتجيب جردل مية بصابون.

2- تدور العربية وتشغل التكييف.

3- تجيب سفنجة مواعين تغرقها بالمية والصابون.

4- تعصر السفنجة علي كل المواسير الخاصة بالتكييف.

- لو لقيت فقاقيع هوا بتطلع من أي ماسورة أو خرطوم يبقي في تسريب في الخرطوم ده ويتم تغييره.

ثانيا :

1- هيفرغ الفريون اللي في العربية كله..

2- هيجيب جهاز كبس الفريون ويكبس هوا فقط في السربنتينة.

3- بعد ما يكبس هيسمع إذا كان في صوت تسريب هوا من أي منطقة ويكشف عليها ويعالجها.

4- يبدأ بشحن فريون العربية وبتاخد فريون 134.وعملية الشحن بتستغرق ربع ساعة..

5- بعد الشحن يشغل تكييف العربية ويبص علي المروحتين لازم يشتغلوا مع بعض.

6- يجيب خرطوم مية يرش علي الريداتير والسربنتينة وبعدين ينفخهم بالهوا وده لزيادة كفاءة التبريد.

7- إن شاء الله بعد كل ده يكون عندك تكييف جميل وساقع وزي الفل.