الموضوع: استشارة فى اداب الزمالة الوظيفية من الاخوة الاعضاء ( خاصة كبار السن )

المشاركة الأصلية كتبت بواسطة ahmedyehia515

أنا شخصياً بتبع مبدأ ( و آسف لو هو صادم أوإسلوبى مش كويس) اللى يوطى مره يفضل موطى طوول عمره ، انا مش قصدى أسخنك على الزميل و لا العلى الشغل و حتى لو كان الشغل اللى بيأكلك عيش. كل اللى انت بتطلبه هو الاحترام و المعاملة الكويسة اللى المفروض تكون موجودة بين اتنين كبار، مفيش حاجة اسمها المكتب الصغير للقديم و المكتب الكبير للجديد، الموضوع واحد عنده شغل كتير و محتاج مكان اوسع و واحد شغله قليل و مش محتاج المكان الكبير

رأيى انك تتكلم مع المدير العام عشان الموضوع محتاج وقفة و لو قدر يحل الموضوع بطريق ترضى كل الأطراف يبقى كلام جميل بس لو مقدرش يبقى شكراً عشان لما يفشل انو يحل مشكلة صغيرة يبقى مينفعش تثق فيه انو يحل مشكلة كبيرة لو حصلت لا قدر الله.

أهم حاجة فى الموضوع انك مضيقش نفسك عشان الموضوع ده و بعدين فى الاول و الآخر كله رزق ربنا

لا والله ابدا مش تسخين , انا فعلا اللى خلقت المشكلة من الاساس بتعاملى مع الموضوع من باب حب لأخيك ما تحب لنفسك واتضح ان الموضوع فى الاخر وضع يد

انا فعلا كل اللى طالبه المساواه فى المعامله , بس علشان انا دايما ( ده مش اول موقف ) اكبر دماغى من حته التدقيق فى كل صغيره وكبيره بقا يحصل معاى كدا

المشاركة الأصلية كتبت بواسطة nadernabil

قصة أقدم في التعيين دي بطلت خلاص....إحنا مش في الحكومة

انا من رأيي تمسك بموقفك...و لو رسيت على انك تسيب الشغل....و ساعتها هايبان لو المدير باقي عليك ولا بيشجع الطبل البلدي

انا اصلا مجرد انى العب بكارت هسيب الشغل ده ممكن تجيبلهم فوبيا , لأنى فعلا شايل عنهم شغل 4 افراد فى نفس الوقت والناس اللى مسكت شغلهم كلهم اترفدوا او استقالوا ولو مشيت الدنيا هتقف

فلو المدير مبقاش عليا فى الحق انا مش هبقى عليه فى زنقه الشغل وهسيبه يلبس الشغل

المشاركة الأصلية كتبت بواسطة أحمد كمال

اقعد مع المدير العام و اتكلم ..... و احكي له كل حاجة و احكي له شغل العيال و التعابين و الخباثة بتاع زميلك ..... و قول له على الشغل اللي اتمسح ....... و افهم منه الوضع الحالي و ان مين قائم بشغل مين ..... و يبقى كده مين يستحق المكتب ...... و قل له انه قبل كده قال لك انه مكتبك و مع ذلك التاني جمد قلبه و استهبل .... و انه لازم يبقى حازم معاه

مشكله المدير انه ودنى قوى واللى بيقعد يتمحلس له بياخد عنده اهتمام كبير , وصاحبنا ده من النوع ده قوى ومفهمه الراجل انه شايل كل الشغل وكل ما يعمل حاجه يوريهاله ويقعد ياخد رأيه فداخل دماغه اوى , انا مش من النوع ده مبحبش الهيافه ولا التلزيق , فلو المره دى كمان عالج المشكله بنفس المبدأ يبقى سكه

المشاركة الأصلية كتبت بواسطة zkralla

ربما تقضى الشجاعه أن تجبن ساعه
والله المدير وقف معاك وخلاك تقعد على المكتب خير وبركه
ما كنش شوف شغلك وعيب تسيب الشغل عشان مكتب بس ممكن تشوف تعامله ازاى
تبقى غلطان لو سبت شغل ورزق ليك ولعيالك عشان كلام زى ده

والله يا فندم انا واخد الموضوع بتسامح من البداية خالص , بس كل المشكلة انى عارف نفسى لو محصلش اللى انا عايزه وخدت حقى مش هعرف اشتغل فيها تانى يوم ومش هطيق ادخل المكان تانى اصلا خاصه بقا ان المكتب بتاعه هدخله على الاقل 3 مرات فى اليوم ده بجانب شكلى قصاد كل الناس انى رجعت تانى وهو راح على المكتب الكبير

الارزاق محفوظه ولو ليا عندهم رزق مش همشى اكيد الا لما يخلص , ده كله بجانب ان الشغل اصلا ضاغطنى اوى نفسيا وزمنيا ومأثر على كل حياتى فلو كمان كله قرف يبقى بلاش منه اريح

المشاركة الأصلية كتبت بواسطة mobitic

كلام صح
بس واضح ان زميل حضرتك بيحب يلعب لعبة الكراسى الموسيقية كتير يبقى خلاص لاعبه كويس

انا للأسف معنديش وقت انى اقعد اعمل مقالب وحيل وحتى لو فى وقت مبعرفش اعمل كدا , انا ممكن امسكه اضربه وادغدغ المكتب عليه مثلا

انما اصروخ فيه علشان اخد اللى انا عايزه يبقى كدا رجعنا لأول الطريق ان الباب اللى يجيلك منه الريح

المشاركة الأصلية كتبت بواسطة grumby78

ماتسيبش حقك المكتب ده مكتبك وهو كان ضيف عليك والان هوضيف غير مرحب بيه

المزيد من المؤيدين , والله هو ولا حتى كان مرحب بيه من الاول بس اعمل ايه

المشاركة الأصلية كتبت بواسطة lion_heart

لازم وقفة و مفيش حاجة اسمها جديد و قديم المهم الشغل اللى بتعمله حد غيرك يعرف يعمله زيك او احسن منك ولا لأ ؟؟
ده غير الاسلوب الماكر فى انه اخد الباس وورد اسلوب .......... مش محترم
اعمل وقفة و ربنا معاك

بفضل وكرم ربنا عليا انا الوحيد اللى بعمل كومبو الشغل اللى بعمله ليهم , وبقالى سنتين معاهم كل فتره باخد شغل زيادة ومفيش ولا شغل اسند الى وفشلت فيه او اتسحب منى تانى , علشان يجيب حد يخلص شغلى هيحتاج على الاقل 3 افراد وهيفضل جزء فى الشغل برده محدش ابدا هيعمله زى

فأنا واثق لو قولت همشى هرعبهم

المشاركة الأصلية كتبت بواسطة ams

انا لو مكانك
اكلم المدير و احكيله على كل حاجة
و استشف هل هو مقدر شغلى ؟ و هل لما افضل اشتغل باخلاص هيبقى فى عائد مجزى (ترقية -علاوة - توسيع دايرة الشغل و بالتالى الخبرة - ....... و هكذا ) ؟
لو آه هكمل شغلى
و هسيب للتانى المكتب خليه يفرح بيه مش قضية ابدا
لو لأ
يبقى مع السلامة

عائد مجزى مستحيل الناس دى مبتراضيش حد ماديا ابدا , ممكن يقطعلك ودنه تذكار بس متقولوش فلوس زياده :)

التوسع الوظيفى انا حاليا بشغل اعلى منصب فى القسم اللى انا فيه والاعلى منى علطول المدير العام فمفيش حاجه تانى اترقى فيها , فكدا معنديش غير المكتب , يا اخده يا ياخدو السلامات

المشاركة الأصلية كتبت بواسطة sh_masry

انا مش معاك خالص .... اذا كان انت مش ثابت فى الشغل و بتقعد بالأسبوع و الأتنين مش بتروح و زميلك هو اللى دايما فى الشغل و اساسى و ده شغله الثابت و هو تعيينه اقدم منك كمان .... طب انت عايز ايه ؟؟؟؟ حب لأخيك ما تحبه لنفسك .

بص يا فندم رد حضرتك مهم قوى لأنه سبب انى كتبت الموضوع الرئيسى

انا مش عايز ابقه ظلمته ولو شعره علشان احنا فى رمضان وانا مش قد انى اظلم حد , انا بالفعل شغلى مش ثابت بس متطلبات شغلى لا تناسب اطلاقا المكتب الصغير وعلشان اقدر اطلع كل الشغل لازم اخد المكتب التانى

وعلشان انا بحبله الخير ده اللى خلانى اديتله الباس وسمحتله بإستخدام المكتب فى غير وجودى , والله غيرى كان برده بيجى فترات متقطعه زى بالظبط ولو فى بيتهم وسمع ان حد قعد على مكتبه كان مبيخليلوش وكان بيقول ان المكتب فيه اسرار شغل ( وده فعلا شئ صحيح )

بس هل يبقى جزاء انى سمحتله بمشاركه المكتب معاى انه يجى عليه وقت ويقولى لا ده بقى بتاعى ؟؟

للعلم كمان هو الشغل ده برده مش شغله الاساسى هو شغال فى مكان حكومى وبيجى الشغل ده بعد الحكومى ومش بيجى كل يوم زى بس هو لو فوت بيبقى بالكتير يومين مش زى مثلا ممكن اسبوعين

ياريت تقولى لو لسه شايف انى ظلمته علشان دى حاجه مهمه قوى بالنسبه لى

المشاركة الأصلية كتبت بواسطة أشرف فتحى

يا فندم واضح ان استاذ احمد مش ممانع انه يشاركه المكتب فى غير وحوده...

لو على رأيى يا استاذ احمد.....متسخنش من حاجه زى كده وتسيب الشغل....لو المدير القديم كان لسه موجود كنت هتفضل مش على المكتب ده...

لكن ممكن تعمل ضغط...

يعنى ايه؟

كلم مديرك وطالب بالمكتب صراحه...واظن انه هسايسك ومش هيعمل حاجه لاك بارت تايم...

فطالما الاخ الاقدم شايف انه مكتبه....يبقى يشيل شغل المدير القديم.....

والنوعيه دى بتكره الشغل جدا وهيتفضح بسرعه....

وسيب الوضع الغلط يسقط لوحده....

للأسف مبقاش فى حاجه اسمها أداب زماله....او حد يراعى أخوه...فى الشغل...وغيره...

خليك خبيث ومتخسرش حد مهما كان واطى...ممكن بكره يبقى مديرك ويكون الشغل ده مصدر رزقك.....

الكلام ده عن تجربه..

المناصب عندنا مش بالكفائه والعداله هى الحاضر الغائب....اى تطبق علينا ولكن ليس لنا...

اولا هو ايه موضوع استاذ احمد ده !!! , انت فى الحقيقه بتقولى ياد يا احمد وتيجى هنا تقولى يا استاذ :)

انت لفت نظرى لحاجه حلوه , بدل ما يكون المكتب يا امشى , اخليها يا المكتب يا هرجع شغلى القديم المريح والمكتب بشغله المقرف ياخده الاخ وساعتها هبقى انا ضغطت عليهم ومخسرتهمش وفى نفس الوقت زنقتهم فى قرار لازم ياخدوه

علشان الاخ ده اساسا مبيعرفش والاداءه مبتثقش فيه انه يعمل شغلى لأنه حساس قوى والغلطه فيه بتخسر فلوس كتير

انا فعلا من النهارده اسلوب التعامل هيتغير مع كل الناس فى الشغل بجد

المشاركة الأصلية كتبت بواسطة col. Eng. Khaled

الموقف يحتاج التعامل من خلال المثل القائل :-

"إن لم تكن ذئبًا أكلتك الذئاب" .

كنت هكلمك بس كنت عايز انام ومش قادر , قولت المفيد



انا متشكر جدا جميعا والله على النصائح دى , والمهم عندى انى الحمد لله مظلمتوش علشان لما اخد اى خطوه محسش بعدها بالذنب ناحيته

المشاركة الأصلية كتبت بواسطة devilishtigers

بص لكلامك اللي انت قولته يا احمد بصرحة دا بني ادم مش محترم (انا اسف)
رقم واحد انت روقت المكتب وظبته وهيأته لنفسك
رقم اتنين زي ما انت قولت دي مسألة مبدأ ومش ينفع تتنازل عن حقك

و حكاية انه يمسح شغله سواء كان فى فيرس او لأ من غير ما ينسخه او حتى يعرفه على الخطوة اللى هيعملها
دى قاتلة
و كمان بيحاول يتصل بيه عشان يعرف الباس وورد و التانى مطنش من غير ما يحاول يستقسر منه هوه عاوز ايه
او بعد ما عمل باس وورد يتصل بيه و يعرفهاله او يبعتهاله فى رسالة
ده كله ما بيدلش الا على سوء نية مقصود
فكل ده يتعرض على المدير و لازم تلوح بأنك ماشى و تقوله انك ما تقبلش تشتغل مع الاشكال دى اللى لا بتحترم زمالة و ما تعرفش يعنى ايه امانة
لازم تقلب الطرابيزة طالما انت تتمتع بالكفاءة اللى بتقول عليها
و بعد كده يا استاذ أحمد لازم تسيب شغلك على هارد خاص بيك و تخليه معاك لأن ممكن واحد من النوعية دى يحرق هارد الشغل او يفرمته
و معلش فى مثل بنقوله ان عدوك ابن كارك و ياما اتقرصنا من ناس كنا بنعلمها فخليك حريص دايما لما تعلم حد
و دايما اتق شر من أحسنت اليه
و زى ما سيادة العقيد ذكرنا
" ان لم تستئذب أكلتك الذئاب " .
والله الموفق

طالما part time و طالما مش قاعد فى عرينك كل يوم يبقى صعب انك تحتفظ بأى مكان الا لو المدير العام مظبطك
مافيش حاجه اسمها بقوم بالاداء الوظيفى من غير ورق مختوم بيحدد ده و عندك ورقه ممضيه ان ده مكتبك و مفتاحه معاك

غير كده - انت اتاكلت و مش هتعرف تعمل حاجه

و نصيحه بلاش تحكى للمدير العام مسحلى شغلى و الكلام ده عشان ده لعب عيال و الكلام مع ال IT هيقولوا كان مبوظ النيتورك و هما اللى قاله و هو هيقول انه مكانش يعرف - فمش هتوصل لحاجه و انت اللى غلطان الى مش عامل باكاب لشغلك خصوصا و انت عارف انك مش متواجد فى المكتب لفترات طويله



اسف لصراحتى

المشاركة الأصلية كتبت بواسطة احمد المصرى

قصة أقدم في التعيين دي بطلت خلاص....إحنا مش في الحكومة

هى اى حجه ليه دفاعا فى وسط الغلط اللى شايله

المشاركة الأصلية كتبت بواسطة devilishtigers

بص لكلامك اللي انت قولته يا احمد بصرحة دا بني ادم مش محترم (انا اسف)
رقم واحد انت روقت المكتب وظبته وهيأته لنفسك
رقم اتنين زي ما انت قولت دي مسألة مبدأ ومش ينفع تتنازل عن حقك
رقم تلاتة لازم تكلم المدير ولو معملش حاجة يبقى لا تتنازل عن حقك.

هو مش محترم من البدايه علشان مجاش معاى عدل وقالى اللى عايزه بدون لف ودوران

دى الحاجه اللى مضايقانى فى الموضوع انى كنت بتعامل معاه بحسن نيه

المشاركة الأصلية كتبت بواسطة lion_heart

و حكاية انه يمسح شغله سواء كان فى فيرس او لأ من غير ما ينسخه او حتى يعرفه على الخطوة اللى هيعملها
دى قاتلة
و كمان بيحاول يتصل بيه عشان يعرف الباس وورد و التانى مطنش من غير ما يحاول يستقسر منه هوه عاوز ايه
او بعد ما عمل باس وورد يتصل بيه و يعرفهاله او يبعتهاله فى رسالة
ده كله ما بيدلش الا على سوء نية مقصود
فكل ده يتعرض على المدير و لازم تلوح بأنك ماشى و تقوله انك ما تقبلش تشتغل مع الاشكال دى اللى لا بتحترم زمالة و ما تعرفش يعنى ايه امانة
لازم تقلب الطرابيزة طالما انت تتمتع بالكفاءة اللى بتقول عليها
و بعد كده يا استاذ أحمد لازم تسيب شغلك على هارد خاص بيك و تخليه معاك لأن ممكن واحد من النوعية دى يحرق هارد الشغل او يفرمته
و معلش فى مثل بنقوله ان عدوك ابن كارك و ياما اتقرصنا من ناس كنا بنعلمها فخليك حريص دايما لما تعلم حد
و دايما اتق شر من أحسنت اليه
و زى ما سيادة العقيد ذكرنا
" ان لم تستئذب أكلتك الذئاب " .
والله الموفق

انا فعلا برغم انى مبحبش اضغط على حد بكارت انا ماشى ده ابدا لكن المره دى مش هتعامل معاهم غير بالاسلوب ده

انا شغلى كله فى البيت واللى بعمله هناك باخده على الفلاشه وانا ماشى , انما الملف اللى اتمسح للأسف كان شغل معملوش المدير القديم وكنت انا بعمله من باب اكمال اساسيات العمل علشان اشتغل ومفيش ورايا مشاكل

وكان الشغل محتاج فتره كبيره من التعديل لحد ما يكتمل وده اللى خلانى للأسف منسختوش وكنت منتظر لما اخلصه خالص , وفعلا طبيعى جدا ان الواحد مع السن والخبره هيقابل مواقف من دى كتير

المشاركة الأصلية كتبت بواسطة human12

طالما part time و طالما مش قاعد فى عرينك كل يوم يبقى صعب انك تحتفظ بأى مكان الا لو المدير العام مظبطك
مافيش حاجه اسمها بقوم بالاداء الوظيفى من غير ورق مختوم بيحدد ده و عندك ورقه ممضيه ان ده مكتبك و مفتاحه معاك

غير كده - انت اتاكلت و مش هتعرف تعمل حاجه

و نصيحه بلاش تحكى للمدير العام مسحلى شغلى و الكلام ده عشان ده لعب عيال و الكلام مع ال it هيقولوا كان مبوظ النيتورك و هما اللى قاله و هو هيقول انه مكانش يعرف - فمش هتوصل لحاجه و انت اللى غلطان الى مش عامل باكاب لشغلك خصوصا و انت عارف انك مش متواجد فى المكتب لفترات طويله

اسف لصراحتى

بالعكس يا استاذ طارق انا بحترم صراحتك جدا

انا فعلا عدم تواجدى هو اساسا المشكله وكبرها انى كنت متساهل بمزاجى كمان فى فتح المكتب لغيرى

بخصوص الورق هو ولا انا ولا هو شغالين بتعيين رسمى والكلام ده بجانب ان المكتب حتى لو خدته مبيتقفلش علشان فى حاجات فيه تخص اقسام تانيه فمكنش حاكم الحكايه كلها غير مجرد الزماله واحترام حقوق بعض وده اللى اتضح عدم توفره

انا عارف انى غلطان بعدم نسخ شغلى بس انا لما سألت ال it قالوا ان هو طلب فورمات ولما سألوه اذا كان فى بيانات مهمه قالهم مفيش , يعنى هو ميقدرش ينكر انه مسح الشغل بدون الرجوع لى

فى الحقيقه الموضوع كله شغل عيال صغيره فلو محكيتش الجزء ده للسبب ده يبقى الاولى محكيش الموضوع كله وبالتالى اسيبله المكتب او نلعب بقا على مين يلحق يقعد وده ساعتها اللى هيبقى جو عيال صغيره ويبقى ترك الشغل اكرم

من كلامك فهمت انك من النوع straightforward و ملكش فى اللعب من تحت لتحت و الرد على الضرب تحت الحزام اللى هو بيعمله.
مش هألومك و أقولك مكنش لازم و مكنش المفروض تعمل. انا فاهم انك بتعامل الناس بطيبة لأن المفهوم عندك انك بتعامل ربنا سبحانه و تعالى من خلال الناس.
أنا حطيت نفسي مكانك و اتخيلت لو انا طنشت و سبتله المكتب و حاولت أقنع نفسى ان مش مستاهلة اعمل مشكلة عشان مكتب .. برضه عمري ما هستريح..كل لما أفكر انى أقابل عميل و مكتبى القديم يعجزنى هألوم نفسى...كل لما أفتقد حاجة فى المكتب الجديد و أنا على مكتبى و أفضل رايح جاي على المكتبين هألوم نفسى...كل لما أفتكر أن المدير السابق عطانى الباس كأنه بيقولى خد انت مكتبى هأتضايق....كل لما أشوف زميلك ده أصلا هأحس انى مولع و انه ضحك عليا و استغل طيبتى.
لنتفق على شىء... متسكتش و تتساهل لأن أعصابك هتتحرق بعد كده. أما الوسيلة بقى فأنت ادري بس طالما انت انسان مباشر أرشحلك الاسلوب المباشر زي ما بعض الأعضاء قالوا اطلع أتكلم مع المدير مثلا.
انا كنت زيك كده و لحد دلوقتى ساعات قليلة بتنازل بس ساعات تانية لما الأحساس بالظلم بلاقيه مسيطر عليا و أعصابى بتتعب بقول كل حاجة تهون بس مجيش على نفسى. و فى شغلى القديم كنت ساعات بلاقى معاملة سيئة من زملاء من أقسام تانية... بس كنت فى أقرب فرصة بأرد و أحرجهم بالأسلوب المباشر و لو قدام مديرينهم من كتر الغيظ - ساعتها بس كنت بستريح لأن فى ناس مينفعش معاها الطيبة