اللي حصل بالظبط :
علي الطريق الزراعي في منطقه عاديه جدا لكن الرادار بيصور علي 60 !!!! بالرغم من ان مفيش بلد علي جانب الطريق ولا في أي حاجه تستدعي 60 دي
المهم
انا اصلا بعدي علي المنطقه دي بشكل شبه يومي وعارف الكاميرا بتكون فين بالظبط وهي بعد يافطه تحديد السرعه بشويه ، بعد ما عديت اليافطه ابتديت انزل بالسرعه من 90 تدريجيا لكن اتفاجئت ان الطريق علي مرمي البصر واقف تماما والعربيات عماله تتكدس 3 حارات .. قربت شويه واكتشفت انهم واقفين في اللجنه
استنتجت طبعا ان الكاميرا كانت بعد اليافطه بمسافه صغيره وناس كتير متصوره مع ان 95% من العربيات بتهدي في المنطقه دي لمجرد وجود رادار فقط ومعظم الناس عارفين زي حالاتي كده
مكنتش متأكد هل انا اتصورت ولا لأ ولكن مكانش معايا غير 120 جنيه ومش طالبه في رمضان خاااالص سحب رخصه سواقه ومشاوير مرور ونيابه وطوابير وموظفين .. خصوصا انها عمرها ما اتسحبت مني قبل كده الحمد لله
قبل اليافطه بشويه في يوتيرن ، خدت اقصي اليمين علي التراب ورجعت مارشدير وعديت من قدام الكاميرا بصلي وكمل كتابه عادي كان قاعد عمال يكتب يكتب يكتب منهمك جدا يظهر استكفي تصوير والحقيقه مجرد بصلي عادي وكمل كتابه
خدت يوتيرن و رجعت مشيت من طريق تاني موازي وخلاص علي كده
المفضلات