هو انا بس كان عندى سوال فى الاول.كل الاعضاء هنا تحت اسمهم عضو جديد-فعال-فضى-الخ. ازاى انت من غير اى نوع عضوية؟
وانصحك فى الاول بكاميرا ديجيتال عادية زى الكانون مثلا.لان النيكون معقدة شوية فى الاول على واحد ميعرفش حاجة عن طرق واوضاع التصوير.(مش معقول اول ما تتعلم السواقة تشترى عربية سباق)
انا مش هاقدر افيدك تتعلم فين التصوير لاننى واخدها هواية بس اقدر اقولك على حاجات بسيطة.يعنى مثلا حاول لما تصور الصبح تبقى الشمس فى ضهرك عشان الصورة متغمقش منك.
الصور اللى انت حاطط اللينك بتاعها جميلة فعلا وعينيك بتلقط حلو اوى .بس ابقى خد بالك لما تيجى تصور متخليش ضلك يطلع فى الصورة.
ولو هتصور ناس ابقى خد بالك لو عاوز نصهم اللى فوق بس يبقى تصور من اول كف اليد وانت طالع حتى لو المبنى اللى وراهم عالى يبقى هتقرب عليهم وتنزل على ركبك وتجيبهم من تحت لفوق لحد ما تظبط معاك.
Shutter: من اسمه يعنى الغالق وده سرعة غلق وفتح العدسة لما بتاخد الصورة.وكل ما عليت سرعة الغالق تقدر تاخد صور وانت راكب عربية مثلا وتبقى نقية وواضحة.
ISO: هو قوة الاحساس بالنور وكمية الاضاءة اللى بتخلى الصورة تغمق او تفتح حسب كمية الاضاءة المتاحة حواليك,بمعنى ان كل ما هتظبط الايزو على رقم عالى هتقدر تاخد صور الاضاءة حواليها مش عالية,بس خد بالك لما تظبط الايزو لللكاميرا ميبقاش عالى اوى او خليهAUTO لانه فى معظم الاوقات الايزو العالى هيطلع التراب اللى فى الجو فى الصورة.