يا جماعة بجد اللي بكيبه ده حصل معايا فعلاً وكأنه فيلم من بتوع بروس ويليس

ماشي ياخواننا عالدائري وجاي من مدينة نصر نازل الهرم، والطريق كله بيجري، وانا مزنوق ورا عربية نقل بس سايب مسافة

المهم في حتة كده قبل المعادي فيها كام مطب هوا على كام فاصل كله بياخدهم ويرقص واللي معندوش ثبات بيتظبط

المهم الراجل بتاع النقل شايل عزال وحاطط اخر حاجة فوق غسالة من اياهم بتوع زمان دول الاسطوانة الحديد البيضة

الراجل خد فاصل لقيت الغسالة بتنط من فوق العربية بس موقعتش، انا بصيت عالمرايتين لقيت ناس جاية بتجري ومش هعرف اسيب الحرة والغسالة دي هتقع حالاً

انا مهندس على فكرة ف فكرت ف شوية ميكانيكا مقذوفات وميكانيكا سيارات (مع اني مهندس الكترونيات واتصالات ههه)

لوهديت.... الغسالة هتقع ويا اما تزحف وتدشمل وش العربية يا اما هتنط وتيجي في البربريز (الغسالة في اللحظة دي نطت نطة كمان وكأنها بتقولي خد قرار) ويمكن حد من ورا ييجي ينط ف كنبتي

لو رحت يمين او شمال هلبس ف عربيات تانية (الغسالة خلاص هتتطير اهي)

مبدهاش بقى ومش هستنى الفتيس يتدلع، كنت ماشي عالسادس ار بي ام 1.5 والسرعة 80 تقريبا او فوقها سنة، رحت رازع الستبترونيك، ونازل غيارين للرابع، العربية ما شاء الله نطت من 80 ل 100 ف لحظة ووشها بقى تحت النقل

الغسالة طااارت من فوقي ومن فوق العربية، ولزقت ف لانسر بومة حمرا كان بيجري ورايا ونزلت عنده ف الزجاج الامامي، انا شفته اتخض ووقف بس محدش لبس فيه وقزاز عربيته باظ

جريت حمب النقل وقلتله وقف الغسالة وقعت ع الراجل ف بص في المراية ووقف يشوف الناس

انا بقى رجعت العربية على الd وكملت عشان مراتي كانت معايا بس قلت الحمد لله على النعمة ويارب مشوفش مكروه ف حبيب ابداً