الموضوع: أية رأيكم في مشروع مطعم وجبات سريعة ؟

أترددت قبل ما أكتب الموضوع دة ولكن في الآخر قولت أدينا بندردش مع بعض وكلنا بنفيد وبنستفيد ... ندخل في الموضوع طبعاً كلنا عارفين ان الأكل والشرب حاجتين الناس بتستهلكهم كل يوم واكثر من مرة في اليوم والحمد لله عندنا وفرة في البشر تضمن للمشروع دة النجاح بأذن الله وتوفيقه ومن زمان بفكر أعمل مشروع خاص بي ويكبر معايا لحد ما يوصل لسلسلة مطاعم( ليه لأ) المهم الفلوس موجودة والحمد لله ومش محتاج أخد قرض وأدفع فوائد كل سنة وطبعاً أنتم عارفين الفوائد على القروض عندنا نار جهنم فالحمد لله مش هأشيل هم فوائد .

المطلوب من الأعضاء الأفاضل اللي ليهم خبرة أو تجربة أو حتى معلومة ممكن يضيفوها هنا عن الآتي :

1- عن رأس المال المقترح للبدأ .
2- عن التراخيص والتجهيزات والمعدات والعمالة .
3- عن الموقع المفضل (في أسكندرية) .
4- عن العائد المادي السنوي المتوقع بالنسبة المئوية .
5- هل من الأفضل أني أعمل المشروع لوحدي ولا ممكن شريك معايا (أحد أقاربي) .
6- رأيكم بوجه عام عن المشروع .
7- دي أهم نقطة بالنسبة لي وهو أني معنديش أدنى فكرة عن ادارة أي مشروع ولكن عندي الطموح والعزيمة والحمد لله ثم أني مش هطبخ ولا هغسل ولا هأعمل أي حاجة في مجال التخصص دة أنا هأجيب ناس عندهم خبرة في المجال دة تشغل المطعم وأنا الأدارة أو حتى أجيب مدير للمطعم مش مشكلة وهتابع معاه بكل تأكيد فهل أقدر أبتدي كدة ولا أشتغل الأول كعامل مثلاً في مطاعم وجبات سريعة زي ماك أو كنتاكي أو أي حاجة كويسة عشان أخد خبرة وأنا عندي أستعداد أتبهدل يعني عادي مش هتفرق معايا في سبيل أني أتعلم وآخد خبرة بدل ما آخد شهادات وخبرات وفي الآخر أشتغل كبيري ب 1500 جنيه حد هيقولي ممكن ب 3000 ممكن ب 5000 ( لو 5500 ممكن أبتدي أفكر ) طيب ليه ما أبقاش صاحب عمل وأكسب أكتر من كدة وآخد كمان ثواب في تشغيل الشباب المصري المكافح والمجتهد وأبقى ساهمت في حل مشكلة من مشاكل شباب بلدي وشكراً مقدماً لكل من يشارك وربنا يجعله في ميزان حسناته .

المشاركة الأصلية كتبت بواسطة mynameh

بصراحة الفكرة دي في دماغي بقالها فترة بس المشكلة البداية في كل حاجة :
1 طبعا راس المال هيكون في حدود كام
2 العمالة عددها بالنسبة لحجم النشاط اد اية ؟
يعني و كذا حاجة تانية بس كل بيكون مترتب علي راس المال
ياريت اللي يعرف يقول

و اللي بيكسب اكتر " محل فول و طعمية " بس دي انا شوفت مكسبة قبل كدة بس الفكرة مش سهل انك تفتح محل فول و طعمية من نفسك كدة دة لازم تكون عارف واحد " حبيبك " حط تحتها 100 خط عشان يدلك تعمل اية بالظبط عشان متخسرش

أشكرك على ردك الجميل وبالنسبة لموضوع أن أشوف واحد يكون حبيبي دي أعتقد عدى زمانها ومفيش حاجة هتشتغل لو أعتمدت على حبيبي الدنيا ما بقتش زي الأول بكل أسف ولكن في حاجة أسمها المصالح المتبادلة يعني المساعدة مقابل المال وهو دة اللي ماشي دلوقتي .

المشاركة الأصلية كتبت بواسطة hazemhany

طالما عايز تعمل مشروع يبقي لازم لازم خبرة عشان لازم انت تبقي فاهم كل كبيرة وصغيرة في الشغل وبالتالي تقدر تحاسب اي واحد لو قصر ...انما انت تبقي صاحب راس المال ومتفهمش اي حاجة في المشروع كده هيبقي نسبة فشله كبيرة وهتبقي بترمي فلوسك في الارض ..اتعلم في اي مطعم مش شرط كبير شوف نظام الشغل ازاي. المعدات ايه.. ايه الاصناف اللي عليها اقبال .طريقة التعامل مع العمال ..هامش الربح اد ايه ... بعد كده بقي افتح مشروعك وانت مستريح وحاطط في بطنك بطيخة صيفي ..انابقلك الكلام ده من واقع تجربة ..والدي كان عايز يعمل مشروع زي ده وكان معاه الفلوس ومشارك واحد في الادارة وطبعا والدي لا يفقه شيء في هذا المجال وللاسف اتضحك عليه ..

ولو نويت خلاص ابقي بص ع الموضوع ده http://www.nilemotors.net/nile/177453-a.html

عندك حق الواحد لازم ياخد خبرة في المجال اللي هو هيشتغل فيه أحسن ما يطبش ويخسر فلوسه وعلى فكرة الخسارة اللي ما تكسرنيش تقويني ولولا الخسارة مكانش يبقى في نجاح ومتزعلش أنك خسرت مبلغ زي دة وأفتكر المقولة دي ( العلام مش ببلاش ) وبالتوفيق أن شاء الله في بيع المعدات بتاعتك بأحسن سعر وأشكرك على ردك الرائع .

المشاركة الأصلية كتبت بواسطة hany_mohamed

فكرة كويسة جدا
الفترة الاخيرة انا ملاحظ ان فى سلسلة مطاعم ابتدت تحقق نجاح كويس فى اليكس بتقدم وجبات خفيفة وكمان مشروبات
بس المكان بيكون متجهز حلو جدا ومتكلف كويس على نظام ديلايت و هاريس
هى دى الفكرة اللى تاجحة الان انك بتقدم نظام ضيافة ممتاز
وربنا يوفقك

بالظبط كدة دة اللي نفسي فيه حاجة تكون شيك جداً والناس تحس أنها في بيتها مش في مكان غريب وفي نفس الوقت تكون بسيطة مش بهرجة جامدة ومصاريف كبيرة لأن الواحد بردوا أول مشروع يعمله وخايف يخسر لا قدر الله والفلوس أهلي تعبوا فيها وهيأتمنوني عليها يعني لو كانت فلوسي أنا مكنتش فكرت التفكير دة كله فالحكاية صعبة جداً بالنسبالي وشبح الفشل دايماً يطلع قدامي وينطلي ونفسي أتغلب عليه أزاي بقى أكيد هيبقى بالخبرة والتجربة والدخول في قلب نشاط مطاعم الوجبات السريعة وشكراً جزيلاً لرأيك المميز .

المشاركة الأصلية كتبت بواسطة m_car

الفكرة الصح انك تروح تشتغل فى مطعم فترة تاخد خبرة ومن ناحية تانية تقدر تجمع معلومات ومن تانية تقدر تعمل عمالة وناس تشتغل معاك وربنا يوفقك

ومن هنا تقدر انك تجمع تبدا بكام المشروع وكل حاجة عنه

عندك حق وأن شاء الله هشوف محل يكون قريب من الفكرة اللي في دماغي وأحاول ألاقي شغل فيه مدة كافية وبعدها هبدأ مشروعي بأذن الله وشكراً لرأي حضرتك .

المشاركة الأصلية كتبت بواسطة ahmed anwer

ممكن تعمل مكان صغير تبتدي و تشتغل ديلفيري بس و تعمله دعاية كويسة علي البيوت

أعتقد المكان الكبير لازم يكون في موقع مميز و مساحة كبيرة و طبعا ديكورات و تكييفات الخ

و ممكن كمان تدور بره علي فكرة جديدة في الأكل بره مصر و يأما تاخد توكيلها في مصر

ياما تقلدها

بص مثلا دي سلسلة مطاعم كندية متخصصة في الشوربة بس

zoup! Fresh soup company

بس مش اي شوربة أنواع و مذاقات كتير جدا و بتشربها في علب زي الحاجة الساقعة

و فيه كمان سلاسل محلات للبطاطس بس

و برده مش اي بطاطس ،،، بطاطس بكذا طعم و شكل

يعني شوف افكار جديدة عشان تضرب معاك إن شاء الله

تقريباً كلامك هو أقرب حاجة للفكرة اللي في دماغي مكان بسيط ومميز وبيقدم أكل مميز بجانب الأكل اللي ممكن يتاكل في أي حته بره وكمان طريقة تقديم مميزة مش موجودة في أي مطعم يعني عاوز حاجة فانتازيا كدة ولكن بحدود وتكون شيك وبسيطة شكراً جداً على رأيك المفيد والمميز .

المشاركة الأصلية كتبت بواسطة pro_samir

فكره انك تشتغل في اي مطعم الأول علشان تاخد خبره فكره ممتازه

لأن مشكله المشروع ده ان كل الفلوس هتتصرف في التجهيزات تشطيب وديكور وترابيزات وكراسي وتكييفات ومطبخ ...

يعني لا قدر الله لو الموضوع ممشيش هتكون الخساره كبيره بعكس انه يكون مشروع تجاري هيبقي عندك حاجه تقدر تبيعها ، علشان كده لازم تركز كويس ومتتسرعش

ودايما حط نفسك مكان الزبون اللي بيدخل المكان ومتفوتش حاجه حتي لو صغيره

فكره ان تشارك حد دي سلاح ذو حدين ، يعني هتلاقي حد يشاركك بالأفكار ويشيل معاك المسؤليه لكن برضو احتمال حدوث المشاكل كبير وده بيتوقف علي الشريك ، لو شايف انك تقدر تشيل الموضوع يبقي بلاش شراكه

وكمان فكره مطعم شعبي ممتازه ومكسبها كويس زباينها كتير ،، بس برضو لازم خبره علشان تبقي عارف انت داخل علي ايه وكل شويه تتفاجئ بحاجه

وكذلك فكره الأصناف المميزه اللي مش موجوده عند حد بس ميبقاش النشاط قائم عليها بس دي تكون بجانب الشغل الأساسي

ربنا ييسرلك الحال ونبقي نجيب الأكل في المقابلات من عندك

ماهو أنا عرفت أن المعدات لوحدها غالية جداً دة غير التجهيزات عشان كدة بفكر في حاجة أبسط من كدة وتقدر تنافس الحاجات الجامدة جداً اللي فيها تجهيزات كبيرة على الأقل في الأول لحد ما ربنا يكرمني وأتوسع لو كان لي نصيب وبالنسبة للشراكة أنا جربتها وفشلت وأتعقدت وفقدت الثقة بكل من حولي عشان كدة حتى قرايبي عاوزين يشاركوني ولكن لسه متردد .... بالنسبة لموضوع أنكم تشتروا من عندي فدة شيء يشرفني وأفتخر بيه وهبقى أعملكم خصم محترم كل مرة تيجوا تاكلوا عندي بس ربنا يوفق وشكراً لرد حضرتك الجميل .

المشاركة الأصلية كتبت بواسطة haythamkmal

اولا اتمنى لك التوفيق والنجاح ، اكيد العمل الحر افضل كثيرا حتى لو بدخل اقل من العمل لدى اى شخص اخر.
ومن واقع تجاربى لازم تجيب حد امين ومتخصص يدر المكان فى الاول لحد ما انت تتعلم ، لانى للاسف مريت بنفس التجربة فى بداية حياتى وخسرت حوالى 35000 بسبب الافتاءات ، طبعا المجال كان بالنسبه لى جديد فكان كل واحد سواء زبون او صديق او اى حد معدى بيبقى لى راى فى الادارة والصنايعية و الاكل وطريقة عملة ، وللاسف عشان مكانش عندى الخبره الكافية كنت بمشى وراء بعض الاراء ، ده غير طبعا عدم الدراية الكافية باسرار المهنة ، والاختار الجيد للعمال (كامثال الشف غالب ، اللى اول ما جالى قالى 45 نوع سلطة بيعملهم وطلع فى الاخر مبيعرفش يعمل هوت دوج) .

هختصر عليك ، دى بعض انصائح :

- الاختيار الدقيق لمكان المطعم (قريب من جامعة ، داخل مول، قريب من مدينة جامعية ، داخل مول )

- بالنسبة للاجهزه ... فى مطاعم كتير بتبقى لسة فاتحة ومبيقدروش يكملوا وبيبيعو الاجهزه بتاعتهم بنصف الثمن تقريبا، انا اعرف واحد عمل الموضوع ده مع مطعم كان فاتح فى سيتى ستارز واشترى الاجهزة تقريبا بنصف الثمن، وده طبعا هيقلل من الخسارة لا قدر الله لو حبيت تصفى المحل بعد كدة .

- الشكل الخراجى والديكور ... من اهم الحاجات اللى بتشد الناس عشان تدخل المطعم ، ده بالاضافى للنظافه طبعا واللى لازم تكون موجودة فى الاماكن المستخبية قبل الاماكن الظاهره .

- اهم نقطة الاختيار الجيد للعمال فى البداية ، لان ده بيدى الانطباع الاول عن المطعم واللى هيحدد سمعتة بعد كدة .

- اللى تكتبة فى المنيو يكون هو الموجود عندك ، مينفعش نص اللى فى المنيو ميكونش موجود ، الموضوع ده بيضيع المصادقية بينك وبين العميل.

- متمعش ارارء كل من هبد ودب ، وهات فى البدايو مدير للمكان يكون ليه خبرة فى مكان ناجح .

- متستناش مكسب فى اول سنه .

دى النصايح اللى فى دماغى دلوقتى ولو افتكرت حاجة تانية هاقولك عليها

وبالتوفيق ان شاء الله

ياترى عملت أية بعد المشكلة اللي حصلت هل كملت في نفس المجال ولا أعتزلت لأن أنا شايف أنك أتعلمت الدرس وأخدت خبرة فهل أستفدت من النقطتين دول ولا كرهت الموضوع كله ... بالنسبة لموضوع الديكور والشكل الخارجي والموقع والمكان من الداخل أنا في دماغي حاجات كتير ولكن هتكون كلها حاجات شيك ومميزة بأذن الله والنصائح اللي ذكرتها مفيدة جداً جزاك الله خيراً وأتمنى لك كل التوفيق وشكراً على ردك المميز .