أفضل بطارية لعربية دايو لانوس 2006

**othmanelshaikh** · 01-09-2010 06:46 PM

السلام عليكم ورحمة الله وبركاته

كنت عايز أعرف أنهي أفضل نوع بطارية لعربية دايو لانوس موديل 2006 وهل الأفضل جافة ولا ماية ؟؟ وهل 55 أمبير أم 77 امبير أفضل مع العلم أن سيارتي مجهزة هاف أوبشين تكييف وكاسيت فقط .

أرجوا الأفادة وشكراً لكم وجزاكم الله كل خير .

**محمد الشامي** · 01-09-2010 06:57 PM

افضل البطاريات الموجوده هي ACdelco بس مش فاكر تمنها كام بالظبط , البطاريه الـ 55 امبير هتكون مناسبه جدا لعربيتك

**othmanelshaikh** · 01-09-2010 07:24 PM

شكراً على أهتمامك بالرد عليا . بس كنت عايز أعرف دي بطارية جافة ولا ماية ؟؟ ولو تعرف أماكن بيعها فين ياريت تقولي ؟ وهل للنوع ده ضمان ولا لأ ؟؟
وشكراً كتير ليك وبارك الله فيك

**محمد الشامي** · 01-09-2010 07:28 PM

اسف نسيت اقولك ان البطاريه جافه :-) البطاريات الجافه افضل بكتير من السائله , عالاقل لا بتحتاج صيانه ولا تزويد ميا

انا مش عارف حضرتك من القاهره ولا منين , بس هو اكتر واحد اضمنه في حاجته هو محل سمير بيومي في ميدان الدقي (شركه الايمان للبطاريات والإطارات) , والبطاريه بيكون معاها ضمان سنه على ما اتذكر

وطبعا في ناس تانيه كتير كويسين غير سمير , بس ده المضمون الى حد ما بالنسبه ليا ولناس كتير في المنتدى هنا

**محمد الشامي** · 01-09-2010 07:35 PM

سعر البطاريه دي تقريبا في حدود 400 الى 450 جنيه , وهي امريكي صناعه سعودي

**khalid9411** · 01-09-2010 10:17 PM

السلام عليكم/
وكل عام وانتم بخير ورمضان كريم
البطاريه ماتت عندى من يومين علطول من غير تفكير ولا شحن تونجر لانها كانت سائله وقعدت معايا 34 شهر يعنى 3 سنوات الا شهرين كثر طبعا خيرها
اشتريت نوع جاف اسمه هانكوك زى انواع الكاوتشات بالظبط لسه نازل جديد كورى 70 امبير واعطته القديمه واخدت 350 جنيه بالخناق والشد والجذب
بس كويسه وضمان طبعا 12 شهرا

**othmanelshaikh** · 02-09-2010 03:26 AM

انا كده محتار .. والحل أيه يا جماعة أنا عايز أستقر على حاجه زهقت من كتر زق العربية عشان تدور .. البطارية بايظة ومش عايز اشتري نوع يقعد سنة ويودع .. أنا عايز اشتري بطارية جافة وسمعت عن أنواع غريبة وفي ناس رشحت ليا فارتا الالمانية الجافة بس مش عارف

قولوا ليا على حل نهائي .. أصلي موسوس :)

**karimfahmy99** · 02-09-2010 04:45 AM

العمر الافتراضى لاى بطارية يتراوح من سنة و ربع الى سنة و نص . و دى حظوظ ممكن تقعد سنتين و اكتر كلة يتوقف برضة على مدى استهلاك البطارية عشان كدة التاكسيات ضمانها ستة شهور فقط لانهم بيهروا البطارية من الاستعمال .

و كل البطاريات حاليا تكنولوجيا واحدة و خامات واحدة اذا كانت فارتا ولا ديلكو و لا حتى الانواع التركى اللى نازلة جديد . انا جبت التركى ب 470 جنية جافة و زى الفل