الموضوع: أنا في دوامة ملهاش نهاية

اوعي تزعل والدتك
والله انا مزرتش والدتي بقالي حوالي 10 ايام وحاسس انها زعلانه وعشان كده كل يوم بنزل من الشغل بدون مبالغه بلاقي العربيه مخبوطه
عارف يعني ايه كل يوم؟؟؟

انا عارف ان الكلام اللي هقوله هيزعل بس لازم اقوله
انا ضد العلاقات والحوارات اللي بتحصل دي خالص - يعني ايه واحده متدينه ومحترمه جدا وعلي علاقه بشاب وبيتكلمو مع بعض وبيحبو بعض والكلام ده - معلشي بقي دي دماغي
مش معني انك تحب واحده انك تروح مع نفسك كده تكلمها وتبقي علي علاقه وحوارات

عامة اللي حصل حصل - حاول بقي زي ماالأعضاء قالو تاخدهم بالهداوه وربنا يباركلك ويخلصلك الموضوع علي خير

علي فكره - انا كنت بحب مراتي من اولي ثانوي وفضلت احبها لحد ماخلصت كليه واتقدمتلها واتجوزنا واكتشفت انها كمان كانت بتحبني من اولي ثانوي برده ومع ذلك عمر لساني ماجه علي لسانها ولا اتكلمت معاها في اي حاجه من قريب ولا من بعيد

المشاركة الأصلية كتبت بواسطة miss_pharma

اسمع مني عشان انا كنت في نفس موقفك ده بالظبط ..
كنت مكان البنت دي واهله كانوا عاملين معاه زي اهلك بالظبط عشان مامته عايزة تجوزه واحدة بنت صاحبتها .. بس اهله ماكانوش يعرفوني ولا عمرهم شافوني اصلا

بص بقى
الاول كان متردد وخد وقت كتير زيك كده عشان يفتح الموضوع خوفا على زعل والدته لحد لما خد قرار وفاتحهم .. مامته زعلت منه وخاصمته ومبقتش ترد عليه .. بس اقنع والده لان دايما الاب بيبقى عقلاني غير الام خصوصا في المواضيع المصيرية دي ..

والده جالنا البيت عشان يرضي ابنه مش اكتر وهو مش مقتنع ..
بس الحمد لله رب العالمين بعد ماقعد مع والدي ووالدتي ومعايا .. واتكلمنا وضايفنا واتعرف على اسرتي ..
الموضوع اختلف تمامااااااااااااا والراجل حس ان الحمد لله احنا ناس كويسين جدا وحبني وارتاحلي انا واسرتي ..
وخطيبي كان مبسوط جدا بالزيارة دي ..

فضلت مشكلة مامته لحد لما اقنعها انها تقابلنا وبرضه الحمد لله اول لما شافتنا وقعدت معانا انا وماما واتكلمنا
الموضوع اختلف خاااالص وببركة الدعاء ومشيئة ربنا الحمد لله الموضوع مشي زي الفل ما شاء الله ..

وعلى فكرة نفس الموقف حصل مع اخوه من قبله عشان برضه كانت عايزة تجوزه بنت اختها .. بس الفرق انهم لما قابلوا اهل مرات اخوه مرتحوش معاهم وكانوا رافضين البنت ومع ذلك اخوه صمم يتجوزها واتجوزها فعلا ودلوقتي معاه ولد .. ومش عايزة اقولك العلاقة بينهم اتحسنت ازاي .. لان البنت طلعت كويسة جدا واخلاق اوي اوي وعرفت تخليهم يحبوهاواثبتت انها زوجة صالحة ومريحة ابنهم وبقت دلوقتي هي وابنها عندهم فوق الكل ..

انا ليه بقولك كل الكلام ده ..
عشان اقولك ان لو البنت كويسة فعلا واخلاق وبنت ناس ومستوى اجتماعي حلو وبتحبها يبقى حرام تسيبها .. اتمسك برأيك وصمم عليها وفاتح والدك واتكلم معاه ولو هي فعلا بنت كويسة صدقني هيحبوها والمواضيع كلها هتمشي ..

طبعا انا مع الاراء اللي قالتلك اوعي تزعل والدتك ولازم تكسب رضاها وبلاش تعاند معاها ... لكن ده في حالة انها شايفة البنت اخلاقها مش كويسة او مستواها مش تمام ومش هتعرف تربي ولادك وتحافظ على بيتك ..
لكن والله مدام البنت كويسة .. اوعى تفرط فيها وادعي ربنا يجمعكم على خير ويحنن قلب والدتك عليها ..

هى دى ملخص التجربة والكلام الصح