الموضوع: أخيرا أشتريت نوبيرا !!!

أولا أتقدم بالشكر للمهندس ممدوح على نصائحه الغالية لكل الأعضاء - ولى بصفة خاصة وتحذيره لى من شراء ليجانزا كانت عاملة عمرة موتور- والان اشتريت نوبيرا بحالة ممتازة موديل 2003 - عداد 149208- فتيس أوتوماتيك
أشتريتها ب 45250 ج بالعافية بعد صراع 3 أيام
وعملت بنصيحة المهندس ممدوح وعملت الاتى:
1- تغيير زيت الموتور - فحص زيت الفيتس وتم زيادته بنصف كيلو - فحص زيت الباور وكان تمام - فحص زيت الفرامل وكان تمام - غسيل الرادياتير بالماكينة ووضع مياه خضراء ووضع مزيل للصدأ ( كل ده فى محطة بنزين موبيل اللى أمام الحرفيين - الحاج مختار )
2-عند ميكانيكى كويس - كنت بتعامل معاه قبل ذلك فى سيارة 127 - تم تغيير : سير الكاتينة - سير المجموعة - فلتر الهواء - فلتر البنزين- كاوتشة كوبلن كانت مقطوعة - وتم تنظيف مجموعة الأنجكشن بأسبراى التنظيف الخاص بذلك - وتم تغيير البوجيهات ( سلك البوجيهات كان كويس ) - وتم فحص تيل الفرامل
3- عند متخصص المفاتيح والابواب تم عمل الاتى:
تغيير سنون كل الكاوالين(باب-شنطة-تابلوه)وعمل مفتاح جديد - تم تركيب أنذار وسنتر(للأسف أكتشفت أن مجموعة السنتر تم نزعها من السيارة بالكامل )وكذلك تم تركيب وحدتى رفع للزجاج وتم كذلك أصلاح ماكينة الزجاج للباب خلف السائق ( كان الزجاج مزنوق بخشبة )
4- عند الكهربائى تم عمل الاتى : أعادة تشغيل أزرار المرايات الجانبية وتركيب لمبة أشارة رفرف شمال ولمبة أشارة فانوس أمامى يمين ولمبة مسطرة يد الفتيس وتغيير لمبات الفوانيس الامامية الصغيرة بلمبات الضوء الثلجى ( يعنى ترويش بسيط بتوصية من الكهربائى )
والان انا جاهز لأى نصيحة أخرى من السادة الاعضاء الاعزاء
وارجوا قبولى عضوا جديدا فى نادى أعضاء السيارات النوبيرا
ولكم كل الشكر
ولاتنسوا الدعاء لى
أبو عمرو

متشكر جدا لكل الاعضاء
وسوف أكمل بقية النصائح
وأيه موضوع المقابلة ده ؟ انا معرفش عنه حاجة