400 جنيه بسبب لمبة !!!!

**mmffor** · 03-09-2010 10:26 PM

انا حصلت معايا ميكانيكي حمار و ما بيفهمش خلاني اغير تيل فرامل و ماستر عمومي و طنبوره و ماستر ورا و خراطيم زيت باكم يعني من الاخر غيرت فرامل كامل و طلع في الاخر ان كاوتشة السيرفو مقطوعه قطع صغير و عايزه تتغير اتغيرت بالمصنعيه عند بتاع سيرفوهات ب 80 جنيه بعد ما ابن التيت غرمني 680 جنيه

**keko** · 04-09-2010 10:43 AM

الواحد زهق بجد من موضوع الصنايعية ده وبعدين الوحيد اللى مافاصلش معاه الصنايعى علشان المحل بيديك حاجة ثابتة انما الصنايعى يقدر يعك ويقدر يظبط ضيف على كده لو عنده صبيان كتير بيتك يتخرب شاى وقهوة واكراميات

**misoalex** · 05-09-2010 08:09 AM

انت منين من اسكندريه يا باشا

**medociv** · 05-09-2010 12:33 PM

ربنا يعوضك خير وحصل خير
الغريبة ان ماشاء الله بنتكلم في قطعة غير ب 125 و 150 و 200 ج
اصل العربيات الجديدة ده ميجيش تمن فلتر حقير ولا حتى فانوس
في مرة كنت في محل واحد جاي يشتري وش فانوس خلفي للشاهين من كام سنة بكام 17 ج !!!!!!!!!!!!!
وانا الفورد الفانوس الخلفي ومش اصلي ب 150 ج
يعني 10 اضعاف
كل سنة وانتم طيبين

**walidgamal** · 05-09-2010 01:42 PM

معلش الصيانة بقيالك بس المكانيكي دة ربنا يسهله لامؤخذه ده لو صبي ميكانيكي و سألته كان قالك انه من الدينامو و ممكن السير ميتغيرش كمان كان عاوز يشد بس ، ربنا يعوض عليك و مترحلوش تاني

**mlav_cbr** · 10-09-2010 07:19 PM

ديه مشكله قله الخبرة لو عندك خبرة فى العربيه هتروح للميكانيكى تقوله اعمل كذة وكذة و تاخد معاك كمان قطع الغيار الجديدة بس الخبرة بتيجى بمرور الوقت ومحدش بيتعلم ببلاش

**kamalsalem** · 14-09-2010 04:58 PM

البولونيز كانت بتعرف اني معايا فلوس من اي حته وتروح هب فاتحة بقها هات هات هات... والتابلوه كله لمض واشارات غريبة كأنك راكب غواصة وهي في الاخر فكسانة جداً

علرف مشكلة الصيانة اللي انت عملتها دي ايه؟ انه لو حاجة فيهم قطعة غيار معيوبة هتغلبك.. ربنا يستر عليك ان شاء الله

في عربيات كده مش وش نعمة

**abo_hosni** · 14-09-2010 05:09 PM

المشاركة الأصلية كتبت بواسطة kamalsalem

والتابلوه كله لمض واشارات غريبة كأنك راكب غواصة وهي في الاخر فكسانة جداً
في عربيات كده مش وش نعمة

انت فطستني من الضحك

و أقول لصاحب الموضوع:
1- ماحدش بيتعلم ببلاش و المواقف دي حصلت لنا كلنا و اتعلمنا و لسه بنتعلم و هنتعلم
2- انت استفدت بتركيب القطع الجديدة مهما كان

**keko** · 27-09-2010 07:21 AM

ااااااااااااااااااااااااا اااه
الطرمبة الجديدة وقفت تاااااااااااااااااااااااا اااانى هاتجنن والعربية عملتها فى مكان غبى ومقطوع وماعيش فلوس ولا رصيد ساعتها كان موقف زبالة لمبة الزيت نورت وروحت جبت صنايعى من عند الميكانيكى قعد بفك فى ساعة الزيت و مش عارف ايه وبتاع المهم قاللى على ترشس تحت السبراتير عايز يتغير مسكته شكله سليم جدا يابنى سليم لا غيره غيرناه ومافيش فايده وفى الاخر بعد 6 ساعات روحت قطرتها زى الجزمة ووديتها للمكانيكى واتخانقت معاه وباتت اول يوم وتانى يوم طلع الموتور الصبح وسابه مرمى طول اليوم علشان معاه عمره وعدى يوم الاحد اجازة وانا قاعد اشد شعرى وسبحان الله كل ما اقول لسواق حصل كذا كذا يقوللى من فلان استحالة ده صنايعى ميه ميه ان بجد هاتجنن مستنى الطرمبة تطلع لو المشكلة فيها هابهدل المحل اللى شاريها منه ومش ماشى غير بواحدة جديدة والمصنعية كمان ولو من الميكانيكى بجد ممكن اروح القسم فيها ربنا يستر