الطريق من القاهرة إلى شرم الشيخ

الأخوة الأعزاء،


إن شاء الله مسافر شرم الشيخ بالسيارة في أجازة عيد الفطر. وأرجوا ممن له خبرة بالطريق أن يدلني عليه بالتفصيل الممل:) بدءا من مدينة نصر. وكذلك لو تفضلتم بالنصائح الأساسية لمثل هذه الرحلة وهل هناك أمور أساسية لابد أن أقوم بها. وجزاكم الله خيرا

السلام عليكم
ان شاء الله اجازة سعيدة عليك وعلي الجميع
بدءا من مدينة نصر يا اما حضرتك تاخد طريق النصر الي اول طريق السويس يا الدائري لحد نزلة طريق السويس (كده حضرتك بقيت في طريق القاهرة-السويس) خد بالك من المقطورات طول الطريق حتي بوابة طريق النفق بعد البوابة بحوالي 200 متر خد اول U turn جهة الشمال وفبل ماتوصل نفس البوابة خد اتجاه اليمين الي النفق (حوالي عشرون كيلو) بس الطريق فيه اصلاحات
بعد ماتوصل النفق وتعدي النفق خد الطريق علي طول وبعد حوالي 3 كيلو حتلاقي الطريق جهة اليمين علي طريق شرم الشيخ (الطريق ده مباشرة الي شرم الشيخ)
في الطريق حتقابلك عيون موسي بعد النفق بحوالي 20 كيلو متر وبعد ذلك راس سدر بعد 60 كيلو متر(خليك علي الرئيسي علي طول) بعد شوية حمام فرعون وهنا خللي بالك كويس في المسافة بين حمام فرعون وابو زنيمة (كلها ملفات ومنحنيات خطرة بلاش تتهاون فيها واعتقد ان كان فيها اصلاحات من فترة قريبة)
بعد ماتوصل ابو زنيمة بالسلامة بعدها ابو رديس بعد 20 كيلو متر وبعدها بحوالي 40 كيلو مفارق سانت كاترين عديها وعلي طول علي مدينة الطور وبعد الطور ب 100 كيلو مدينة شرم الشيخ خللي بالك من اخر 10 كيلو مترات قبل شرم برضه منحنيات كتير
خللي بالك ان الطريق كله بعد النفق الي شرم طريق واحد للاتجاهين
وتوصل بالسلامة ان شاء الله
اي استفسارات عن الاستراحات او محطات البنزين طول الطريق انا تحت امرك

شكرا أستاذ أشرف على رد حضرتك السريع. عندي استفسارين: أنا بطلع من طريق السويس لما اكون رايح الاسماعيلية وبدخل من عند الشروق. فهل ممكن حضرتك تقولي انا همشي في طريق السويس حوالي كام كيلو لحد ما اوصل لبوابة طريق النفق؟ تاني حاجة ياريت لو تكرمت بالنسبة للبنزينات متوفرة على الطريق يعني مفيش مشكلة وهل فيه استراحات ترشحها (يعني للفطار وخلافه)؟ وجزاك الله خيرا

حضرتك تؤمر
البوابة عند الكيلو 110 تقريبا
ثانيا البنزينات التي يمكن الاعتماد عليها هي (وطنية قبل مدخل النفق مباشرة) وثاني بنزينة هي (موبيل بعد راس سدر بحوالي 10 كيلو جهة الشمال في طريقك للشرم) لا ارشح اي بنزينة اخري في الطريق الا اذا كنت مضطر
بالنسبة للافطار في الطريق (الافضل تاخد فطارك معاك وتعتمد علي المشروبات فقط في الطريق)
ولو حضرتك عديت ابو زنيمة وهي تقريبا في نصف المسافة مش حتلاقي مكان كويس تقعد فيه
تحياتي

الأستاذ أشرف حبيت أشكرك على ردك الذي أفادني كثيرا طول الطريق وحقيقة كان دقيقا وسهلا ووجدت كل ما قلت على أرض الواقع:) شكرا مرة أخرى وجزاك الله خيرا.

السلام عليكم يا اخوانى
انا والله مش عارف اشكركم ازاى وخاصة الاستاذ اشرف انا يدوب وصلت شرم الشيخ من 3 ساعات و رغم انى شاهدت مشاركتكم بالصبح بس بل ما اسافر و رغم ان مشاهدتى متأخرة سنة من رد الاستاذ اشرف لكن والله و شاهدة لله و لكل شخص بيفكر يسافر شرم الشيخ بالسيارة ان اللى يقرا وصف الاستاذ اشرف كويس للطريق هيحس وهو سايق انه شاف الطريق قبل كدة ولا يشعر بالحيرة او قلق من المجهول من متاهات الطرق المعتادة بس الشئ الوحيد اللى اختلف من وصف الاستاذ اشرف للنهاردة انه للاسف مفيش باصات سياحية زى ما كان الحال و دا من بركات هرجلة يناير بس بردوا الطريق لسة امن تماما ومفيش منه خووف ابدا و سيارات تانية كتير موجود و يارب يشوف الاستاذ اشرف رسالة شكرى له دى اللى متأخرة سنة عن افادته... السلام عليكم

عايز أعرف الطريق من القاهرة إلى شرم الشيخ من ميدان لبنان وشكراً

انا مش مسافر شرم دلوقتى خالص بس احب ابدي اعجابى بطريقة الشرح والوصف السهل.انت حببتنى فى الطريق الله عليك

ياتري اية اخبار الطريق الان حيث انوي قضاء اجازه نص السنة هناك

من العاشر من رمضان ازاي اروح شرم الشيخ ومحطات البنزين علي الطريق

ياتري اخبار الطريق فيه تغيرات او اصلاحات او اي ملاحظات اخري , , , , لاني مسافر ان شاء الله اول شهر 4 بسيارتي الخاصة من حلوان لشرم واول مرة اسافر طريق طويل , , , , , , محتاج نصايحكم وارشاداتكم