السلام عليكم ورحمة الله وبركاته
إخوانى رابطة محبى التمبرا أحلى سلام
بعد الكلام الجامد اللى شوفته على لسانكم على أداء و قوة العربية التمبرا ..شبط فيها و بقالى شهرين بحاول أبيع السيارة السوزوكى سويفت بتاعتى موديل 98 لحد ما بعتها وأبدأ رحلة البحث عن تمبرا وبجد معاناة لا توصف فى البحث ...
المهم أنا هقولكم مشاكلى اللى كانت فى السوزكى سويفت واللى خلتنى أدور عن تمبرا
_ السرعة بعد 120 زفت زفت زفت ((3 زفت)) كأنى عباس بن فرناس فى أول محاول طيران العربية بتعمل كل اللى نفسك فيه بإختصار بحس إن بين الحياة والموت
_ صوت الهوا بحس بيه جدا و العربية بعد ماتعدى 100 و كأنى مش قافل زجاج السيارة ساعات والله بصدع لو على سفر
_ ضيق الصالون طبعا مش محتاج وصف
_ العفشة اللى ملهاش حل بعد شهر من تربيطها ترجع زيى ما كانت العربية بتشخلل ولا غربال تنقية الرز
_ أخيرا التكييف اللى بيبقى زيى الفل فى السفر لكن جوه البلد ولا له أى لازمة بالكاد بيبقى لطيف
بس الشهادة لله العربية كانت ناعمة موفرة فى البنزين ما بتفتحش بوقها إلا نادرا
المهم فى خلال الفترة دى سوقت عربيتين تمبرا خلال البحث.. مشكلتى الكبرى مع العربية اللى عجبانى فيهم الأتى
_ حاسس إن الموتور خفيف+ صوته عالى حبة يعنى عداد الأمبير بيعلى علطول بمجرد ما أدوس بنزين ((و أنا شخص سوقت عربيات مختلفة يعنى إحساسى إنه مش عيب إن رجلى تقيلة على البنزين )) صاحب العربية قالى إنه موضوع ديسك وإسطوانة بمجرد ما يركب أنسى المشكلة دى .
_ الدبرياج محجر و بتبطل منى كل شوية
_الباور لطيف بس مش ملبن زيى العربيات أم باور ((حسيت إنه أقل من لفة دريكسيون السويفت بحاجة بسيطة برغم إن السويفت مفيهاش باور أصلا))
سؤالى يا محبى التمبرا هل أصلا النقل من سوزوكى لتمبرا فعلا نقلة هحس بيها و هل برده أغير الديسك والإسطوانة و أجرب ولا أصرف نظر عن التمبرا و أبحث عن سيارة أخرى
مشكلتى يا رجالة إنى بعت السوزكى ب 25 ألف مكيفة وندمت بصراحة مش عشان السعر اللى بعته بيها أنا كنت شاريها من 3 سنين ب 28 من غير تكييف كلفت تكييف 1000 جنيه فال4 ألاف اللى نقصه دول بعد البيع هم فعلا تكلفة إستخدامى للعربية و مرمتطها مش ببحث عن مكسب من البيع يعنى ...فأنا معايا 25 + 7 ألاف كنت محوشهم وبدور على تمبرا فعشان اللى يتكرم بالرد عليا يبقى عارف أن بدور فى حدود كام
وشكرا على وقتكم مقدما و منتظر ردودكم
المفضلات