اسعار السيارات المستعملة نزلت حد لاحظ ده

**maged** · 11-03-2008 12:03 AM

انا نزلت سوق السيارات الجمعة اللى فاتت والاحد اللى فات ولاقيت ان السيارات المعروضه بسعر عالى لم يتم بيعها اما السيارات المعروضه بسعر عادى اتباعت يعنى مفيش حد بشترى لانوس 1 اكتر من 42000 لافضل سيارة ولانوس 2 كاملة موديل 2000 مش اكتر من 44000 لافضل سيارة بغض النظر اصحاب السيارات بيطلبو كام لكن البيع بيتم باسعار تانية خالص والعبرة بالتنفيذ وطبعا انخفاض الاسعار فى السيارات ده شىء كويس وحبيت اسأل هل حد لاحظ ده ولو كان فعلا فى نزول فى الاسعار فياترى ايه السبب الرئيسى

**معاذ الشرباصى** · 11-03-2008 12:19 AM

فى رأى احد الاسباب سهولة اجراءات الحصول على سيارة جديدة بالقسط

**sherif_84** · 11-03-2008 12:23 AM

+ كمان ان الناس دلوقتى مشغولة بقرب امتحانات الثانوية العامة وحصص المراجعة والدروس والغلاء اللى انتشر فجأة كل العوامل دى بتهدى حركة البيع والشراء فى أسواق السيارات ولكن الاسعار هتزيد تانى مع دخول الاجازة الصيفية

**Dr Ahmed** · 11-03-2008 12:25 AM

أنا ملاحظتش غير ان كيس العيش الفينو النهارده بقى ب 2 جنيه ونص.
وطبعا حجمه هو هو : بقسماطة

**SEATLOVER** · 11-03-2008 02:00 AM

اللانوس فقط مش مقياس ..و خصوصاً انها بتمر بظروف معينة
لكن عموماً ادامك من دلوقتى لحد نهاية دروس ثانوية عامة مفيش حد معاة فلوس ..هو ممكن تلاقى رب اسرة بيبيع عربيتة (لظروف الحصص)

**mahamedaraby** · 11-03-2008 02:50 AM

فعلا سوق المستعمل ده عرض وطلب مش اكتر ولا اقل يعنى ممكن تلاقى عربيه موديل قديم بتباع بمبلغ مثلا كبير مع ان فيه عربيه تاينه احدث وبتباع بنفس السعر فهو سوق المستعمل ده كله عرض وطلب
فممكن تلاقى فعلا علشان الثانويه العامه وسهوله اجراءات التقسيط

وفعلا الكلام كتير يعنى مثلا شوف موقع car100100 هتلاقى اسعار غريبه اوى لكن لما تيجى تخلص فى الواقع باسعار تانيه وربنا معاك ولو عايز تشترى عربيه

**ehabradwan** · 11-03-2008 01:05 PM

ايوه صح لان ده مش موسم بيع فالعملية مريحة على الجميع

**CryptonX** · 11-03-2008 01:08 PM

مهوا ده المفروض ! انت مبتشوفش الناس عاملة ايه !

عربية 128 متغيرلها كل حاجة في الدنيا و عاملة 10000 حادثة و 150 الف كم ! و يقولك حالة شاذة جدا ! 20 الف جنيه !

والله متساوي 5 الاف جنيه !

انا كنت في امريكا السنة الي فاتت !
لانوس موديل 2002 - 1600 سي سي عاملة 2500 كم !
$1.200 = 10 الاف جنيه :)

و طبعا منتوا عارفين السعودية ... تشتري عربية ب 90 الف تبيعها تاني يوم ب 70 !

انما في مصر احنا حالة شاذة ! تشتري العربية ! بعدها ب 10 سنين العربية تغلي ! اصلها عتقت !

حاجة تقرف ولله !