الموضوع: مقترحات مرورية لادارة المرور دوت كوم

النهارده الصبح وانا جاي الشغل سمعت في الراديو في برنامج (طريق السلامة) 7:45 ص بتاع بالسلامة يا حبيبي بالسلامة اللي بقاله 50 سنة ده وكلنا بنسمعه علشان الاغنية بتاعة المقدمة بس

المهم سمعت مسئول من ادارة المرور بيتكلم عن احتفالية مش عارف بمناسبة ايه وفيها تيشيرتات للأطفال عليها علامة ستوب لتوعية المواطنين بالمرور وبيوزعوا بروشورات

المهم بأه انه اضاف ان ادارة المرور عملت موقع على النت لتلقي اي مقترحات تحسن حالة المرور أو تساعد في حل مشاكل المرور واسمه كذا كذا دوت كوم (مسمعتش ولا كلمة) قلت عادي هيعيد تاني بالتفصيل او المذيع هيعيد انما محدش قاله تاني كأننا هنعمل دابل كليك على مفتاح الراديو نقوم ننتقل للموقع او هنعمل كوبي وبيست ونشيله عندنا في درج تابلوه العربية

فيا ريت لو حد عنده اي فكره عن الموقع ده او يعرف يدور لنا عليه يبقى كويس أوي لأن فعلا شيء كويس ان ادارة المرور تاخد أراء ومقترحات الناس لتحسين الوضع المروري في البلد