تحذير هام من السرقة والنصب فى اشارات المرور والزحمة
من حظى الكويس انى لسه مغير زجاج مراية الجانب الشمال لسيارتى و كل شوية اركز في النظر فيها علشان اتعود عليها
واول امس لما كنت فى شارع ابوقير امام ليزابلا تقريبا و الجزء ده بيبقى زحمة رهيبة و العربيات بتتحرك بالسنتى
و الحته دى ملايانة متسويلن محترفين الايام دى و كان فى الكنبة الخلفية بنتى جنبها اكياس وشنطة مامتها ناحية الباب الشمال
لاقيت بنت متشرده كده بتحاول تفتح باب العربية الخلفى فلما لمحتها قفلت الباب من السنتر لوك فلما معرفتش تفتح و سمعت تكة القفل جرت و اختفت فى لحظة
تانى يوم لما رحت الشغل وحكيت لزمايلى قال زميل لى ان موضوع السرقة فى الاماكن الزحمة بقى كتير وخاصة فى اشارة الشاطبى كمان وبيبقوا اكتر من واحد واحد يلخم الضحية و اتنين يسرقوا اللى يقدروا علية وبعدين الثلاثة يجروا كل واحد فى ناحية ووسط اللخمة محدش بيعرف يحصلهم
وكذلك حكى لى صديق اخر انه امام مول زهران بسموحة واحد رمى نفسة على عربيتة على طريقة نور الشريف فى فيلم دم غزال وكان عاوز يقلبة فى الفلوس بس صاحبى فهم الموضوع وسابة ومشى
لذا لزم التنوية والتحذير