تجربتى مع الاوبترا على سرعة +200 كيلو / ساعة ...
السلام عليكم
ازيكم يا احلى قسم :)
حبيت اشارك تجربتى المتواضعة معاكم
الشهر اللى فات كنت رايح الغردقة وحبيت اجرى شوية
الطريق الصراحة مغرى جدا وماكنش فيه عربيات كتير
هو مشكلته بس انه مش مستوى كويس وحارتين
بس العربيات مش كتير
انا كان ليا تجربه قبل كده على الاسكندرية الصحراوى على سرعة 190 بس ما فضلتش كتير ماشى على السرعة ديه
فامقدرتش احدد اى حاجة بس المرة ديه الطريق الحمد لله ساعدنى وربنا ستر
بس ياريت ماحدش يجرب يمشى على السرعة ديه لأن ماحدش عارف ايه اللى ممكن يحصل
حتى انا بعد لما وصلت بالسلامة ما كنتش مصدق اصلا انى عملت كده :)
المهم سيبكوا من الرغى الكتير ده انا عارف انى صدعتكوا
ندخل فى الموضوع على طول
انا لقيت الطريق فاضى وممكن يتجرى فيه قلت لما اجرب كده الاوبترا نظامها ايه :؛
دوست شوية لحاد ال 170 وبعد كده ال 180 وهديت شوية علشان الكيرفات
شوية والطريق اتعدل فا دوست لحاد ال 200 وفضلت ماشى لفترة كويسة حوالى 5-10 دقايق على السرعة ديه
وكان فيه كيرف فهديت تانى وهكذا
الصراحة الموضوع مرعب لما بتعدى من جنب عربية بالسرعة ديه بس فى نفس الوقت انا ما كنتش حاسس انى ماشى على 200 خالص مش عارف ليه
الصراحة بسم الله ما شاء الله على الاوبترا ما خذلتنيش - طبعا ربنا ستر - بس فعلا انا ما كنتش حاسس خالص انى ماشى على 200 ماكنش فيه تنطيت ولا اى حاجة وكان الدريكسون حديد فى ايدى
بالنسبة للكيرفات فا لو الكيرف مش جامد اوى ممكن يتاخد على ال 140 - 150 والثبات معقول
انا جربت اخد كيرف على ال 160 بس كان الوضع صعب شوية :)
بالنسبة للفرامل فهى كويسة لو حبيت تهدى ومعقولة لو حبيت تقف طبعا انا ما جربتش اقف على السرعة ديه بس كتير كنت بهدى وكانت تفى بالغرض وزيادة الصراحة
تجربتى مع الفرامل فى نفس الطريق انى هديت من سرعة 200 ك/س لحاد سرعة 100 -120 ك/س
وكانت المسافة ممتازة الصراحة وربنا ستر
وفى الاخر جايبلكوا صورة للعداد وهو على 200 وشوية طبعا مش انا اللى مصور ده واحد صاحبى كان قاعد جنبى :D
http://i29.tinypic.com/ieo495.jpg
بس كده
اتمنى انى اكون ضيف خفيف عليكوا لأنى ديه اول تجربتهليا معاكم
بس انا كان عندى استفسار
هو المشى كتير على سرعات عالية غلط ؟
يعنى 180- 200 كلم / ساعة لفترات طويلة اكتر من ساعتين
انا سمعت ان ده غلط جدا على الموتور
ياريت حدد يأكدلى الموضوع ده
بس كده
لو حد عنده اى استفسار عن اى حاجة يقولى
احمد