هل تشعر بالأمن

**Akram** · 11-03-2008 04:57 PM

لو مشيت في اي مكان زحمة دايماً بيكون عندي احساس اني هتسرق و دائماً بأمن على المحفظة و الموبيل ,
و لو ماشي بالعربية بفتح الزجاج اللى جنبي فتحة صغيرة و طبعاً بأقفل السنتر,
لو داخل أصلي بحاول أضع الحزاء في مكان قريب منى او أمامي ,
الحقيقة مبقاش فيه أمان في أي مكان.

**iunknown** · 11-03-2008 05:08 PM

لأ يا جماعة بجد انتوا مش حاسين بنعمة الأمن اللي في مصر. انا مش بقول كدة علشان خالف تعرف. انا عايش في نيجيريا بقالي 6 شهور دلوقتي. اول مارحت لقيت الشركة بعتالي عربية 4×4 في المطار متفيمه وفيها عسكري معاه مدفع ظريف جدا.

مابعديش اسبوع من غير ما اسمع عن سوبر ماركت دخله مسلحين قلبوا الخزنة بالاضافة لسعداء الحظ اللي موجودين وقتها.
انا علشان اتحرك بعد الغروب لازم عربية وحارس مسلح
طبعا مفيش حاجة اسمها اسوق انا أو ان الازاز يكون مفتوح أو السنتر مش مقفول
في ديسمبر السفارة المصرية (من بين 200 سفارة في البلد) الحرامية اقتحموها وقلبوا 30000 دولار الحمد لله ماحدش اتقتل اصابات بس

كل ده والمكان اللي انا عايش فيه كله سفارات زي جاردن سيتي عندنا كده.
في مصر فيه سرقات بس لسه مش للدرجة اللي تحسسك بعدم الامان

**حماده عزو** · 11-03-2008 05:19 PM

أمان داكان زمان
عا يزنا نرجع زى زمان
قول للأمان أرجع يا أمان

**TaoTao** · 11-03-2008 06:21 PM

أمان؟؟
سواقين الميكروباص والتباعين وقلة أدبهم، مافيش بنت بتسلم من لسانهم، وماحدش يقدر يفتح بقه.
التباع (وغالباً بيكون واحد سوابق وش إجرام) لما ينادي ع الناس في الشارع يا خالتي، وياجدو، وياأقرع
يعني مثلا سواق الميكروباص ماشي بسرعة تيجي واحدة تشاورله التباع يخبط خبطة ع العربية السواق يقف بعدها ب 20 متر، التباع يزعقلها "مدي شوية يا خالتي" والست تبلع الإهانة وتركب لأن مافيش مواصلات والمواصلات الموجودة هي كدة كل اللي شغالين فيها عينة إجرامية واحدة
مثلاً واحد محترم عاوز ينزل من الميكروباص، والميكروباص بيجري عاوز يزنق اللي قام قبله (عاملينها سبق يعني بس مش مهم نفوت دي) ييجي الراجل نازل السواق يهدي ومايقفش والتباع يقوله "نط"!! يقوم الراجل ينط
يعني الراجل ولا الست آخره هايعمل ايه مع المجرمين دول؟ ولا أي حاجة، السواق كاسر عين العسكري بالفردة اللي بيديهاله ولا عزاء للشرفاء
مافيش أي نوع من أنواع الحماية لأي مواطن لا مادياً ولا معنوياً :(:(:(
مافيش أمان شخصي، والعساكر طبعا مش فاضيين يشوفوا شغلهم، وراهم إتاوات يلموها من سواقين الميكروباصات، أو فِردة يلموها من واحدة غلبانة بتبيع جرجير. ودي طبعاً مهام سامية ونبيلة تخلينا نتغاضى عن هفواتهم الكتيرة دي
أمان؟! بس في سؤال كدة، يعني ايه "بعد التطورات الأخيرة" ؟؟ هو مافيش إحساس بالأمان وخلاص

**Eng.Ihab** · 11-03-2008 06:21 PM

أنا مش مصدق يا جماعة اللى بيحصل حوالينا .........طب حد سمع عن سرقة المفاتيح الماستر من توكيل اللانسر ......... و اللى حصل بعد سرقة أكتر من عشرين سيارة فى الإسكندرسة وحدها........

و فى ظل الغلو الفظيع فى الأسعار و التحسن فى إقتصاد مصر الغير ملحوظ أبدا ..... أو حاسين إنه تحسن ................. للأسوأ لسة فى أمان؟؟؟؟ .......... أشــــــــك

**wawoo** · 11-03-2008 07:00 PM

هو اية الهدف اساسا من استطلاعات الراى دى , انا شايف شوية استطلاعات مؤخرا كدة غريبة شوية , مش عارف هل حد لاحظ الموضوع دة ولا انا بس , ارجو ناخد بلنا و منجاوشبش كدة على اى استطلاع , اهوة الحزر واجب فى موضوع الاستطلاعات دة

**hazem_khidr** · 11-03-2008 07:14 PM

انا بطبعي حذر
لو راكب العربيه مش بحط الموبيل علي التابلوه ابدا بخليه علي الكونسول تحط .
زجاجي لو مفتوح يبقي الربع بس
لو وقفت في مكان لازم اقفل السنتر عليا و اسيب العربيه دايره و باصص في المرايات.
لو ماشي في الشارع الموبايل في جيبي و دايما اتمم علي المحفظه.
العماره مقفوله بالبوابه و عمرنا ما سبنا البوابه مفتوحه .
المصنع عندي منبه علي كل اللي شغالين يقفلوه عليهم و بالليل ما يفتحوش لحد غيري و بس .

**brown-eyes** · 11-03-2008 07:28 PM

معاكي حق يا onna
انا ساكن في المعادي بردو وساعة سفاح المعادي ده كانت حجة غريبة امناء الشرطة بتوع المباحث كانو في كل حتة لدرجة ان انا واصحابي ماكناش عرفين نقف حتي نتكلم مع بعض شوية كانت حاجة مستفزة جدا وكل شوية واحد يجي يسال علي بطاقة وساكن فين وكانو بيخدو ناس كتير اوي ع القسم الله اعلم كان بيحصلهم ايه انا مش عارف هي البنات ورانا ورانا :S :) انا في الايام دي كان معايا موتسيكل ريس ماكنتش بمشي بيه من الارف بتاع المباحث دي دول مش عشان نحس با لامان دول عشان ياذو الناس انا مش عارف ليه كل مشكلة عندنا بتتحل بمشكلة اكبر

المشاركة الأصلية كتبت بواسطة onna

لا طبعاااااااااااااااااااااا اا

امان ايه يا عم

انا كنت هتخطف في تاكسي و تقولى امان

مع ان الموضوع دة عده عليه اكتر من 5 سنين بس عندي حالة رعب من اقل حاجة

لما موضوع السفاح اللى عندنا في المعادى دة ظهر ماكنتش بنزل من البيت و لو

مضطرة وقت الامتحان كنت بكلبش في اخويا كلبشة و افضل ابص شمال و يمين و لما

اطلع البيت اطلع معايا البواب و مراته و ولاده

موضوع الامان دة زمنه ولا و فات ...اخر مرة حسيت بأمان قبل ما والدي يتوفى

**emadkamel** · 11-03-2008 07:49 PM

برضه مع كل اللى اتقال ...لسه مصر امان عن دول كتير... انا كنت فى جوبا لفتره (عاصمة جنوب السودان للى مايعرفش) والوضع كان كالتالى ... بعد 7 او 8 بالليل ممنوع الخروج إلا فى اضيق الحدود ومع مرافق حارس .... ممنوع تعامل مباشر فى السوق او التواجد لفترات طويله لوحدى ... ممنوع تمشى بأكتر من 50 دولار ...ممنوع وجود دولارات قبل 2003 علشان التزوير (كان معايا 3000 دولار فى جيبى ومش عارف اجيب قزازه ميه اشربها) اوقات كتير الصبح وانا نازل البلد الاقى "جثث" مرميه على الطرق ... البلد كلها بلا استثناء مسلحه والغلابه قوى او العيال الصغيره معاهم سلاح ابيض غير كده من اول الـ 9مل للكلاشينكوف والاوزى كمان واسهل حاجه فى اى خناقه ان اسلاح يشتغل ... خصوصا بالليل لان كله بيسكر

مصر الوضع فيها بيسوء..... إنما لسه احسن بكتير قوى يا خوانا من دول تانيه ...

**Ghamrawy** · 11-03-2008 07:50 PM

المشاركة الأصلية كتبت بواسطة hazem_khidr

انا بطبعي حذر
لو راكب العربيه مش بحط الموبيل علي التابلوه ابدا بخليه علي الكونسول تحط .
زجاجي لو مفتوح يبقي الربع بس
لو وقفت في مكان لازم اقفل السنتر عليا و اسيب العربيه دايره و باصص في المرايات.
لو ماشي في الشارع الموبايل في جيبي و دايما اتمم علي المحفظه.
العماره مقفوله بالبوابه و عمرنا ما سبنا البوابه مفتوحه .
المصنع عندي منبه علي كل اللي شغالين يقفلوه عليهم و بالليل ما يفتحوش لحد غيري و بس .

100 %
+ لو ماشى على رجلى فى الشارع لازم الموبايل يبقى سيلنت علشان الرنة ما تلفتش نظر حد و لو فى قلق او شك من الجو المحيط ما باردش اساسا
شنطة العربية و تحت الكرسى لو امريكا عرفت بيهم حاتعمل معايا زى ما بتعمل مع ايران
اقصى كاش بشيله 50 ج و كل مشوار و منطقة ليها لبسها
عندنا فى اسكندرية سرقة الموبيلات و الفلوس فى عز الظهر و فى اكتر الاماكن زحمة +غطيان البلاعات ده انا مرة شفت بعينى الساعة 7:30 الصبح و انا رايح الشغل واحد و اقف على كوبرى قناة السويس بيسرق اسلاك اعمدة النور
امن امان !!!!!!!!!!!!!! ده كان زمان

مشاهدة نتائج الإستطلاع: هل تشعر بالأمن

الموضوع: هل تشعر بالأمن

LinkBack

أدوات الموضوع

عرض

-

-

-

-

-

المواضيع المتشابهه

( باختصار) هل تشعر بالامان في مصر.!!

إستطلاع: هل تشعر بالأكتئاب؟

لا تعليق :بلاغان ضد تعيين ضابط بمنصب حساس بالأمن الوطني

الى مالكى الميجان..هل تشعر بالتميز؟

تمرد بالأمن المصري بسبب الوضع في غزة (منقول)

الكلمات الدلالية لهذا الموضوع

المفضلات

المفضلات

ضوابط المشاركة