الموضوع: ايه أولوياتك فى الشغل؟

المشاركة الأصلية كتبت بواسطة BASKOTA

هو الكافيه بتاع soma ده اللى دوخنا كلنا
الاهم بالنسبالى انه يكون طبعا فى نفس البلد
جالى فرص عمل كتير فى القاهرة وبمرتبات عالية وفى شركات كبيرة ومنها شغل فى بنوك فى بداية تخرجى لكن طبعا مكنش ينفع بالنسبالى نهائى رغم ان كان ممكن اقيم كام شهر عند خالى وبعدين انقل فرع البنك فى اليكس
لكن طبعا ما تخيلتش اعيش فى بيت غير بيتنا مهما كانت المغريات
بالنسبة للشغل فى اسكندرية مهم جدا تكون شركة محترمة وطبيعة العمل تناسبنى الاهم يكون دخل الشغل مقبول مقارنة بمكان العمل وطبيعته
يعنى نص المرتب فى اليكس مهما كانت الشركة هتدينى خبرات قليلة ولا ضعف المميزات فى كايرو
حلو موضوعك يا n_i_t_e

شكرا على مشاركتك يا بسكوتة :)
على فكرة كلامك خلانى افتكر حاجة لاحظتها...الشركات فى اليكس او بره القاهرة عالعموم متتقارنش بالشركات فى القاهرة...شركات القاهرة النظام أحسن و أغلبها مالتى ناشونال ...كتير من شركات القاهرة بتدي انطباع ان المكان ممم Classy أو حاجة زي كده... البيئة بتتختلف كتير.
بالنسبة لك كنتى حاطة أولوية عالية للبيت و الجو العائلي تخطت حتى أولوية المرتب و خلتيها شرط اساسى غير مقبول التنازل عنه و ربنا يحققلك امانيكى :)

المشاركة الأصلية كتبت بواسطة abdo_general

هي Soma عاملة دعاية للكافية دا ولا ايه

وشكلها واخدة عمولة

كل ما ادخل موضوع الاقي الناس بتقول بتخيل وانا قاعد في كافيه Soma

انا خايف في الاخر حد يعمل كافيه بجد ويسميه ( Soma Cafe )

ما علينا

الاولويات في الشغل بتبقي علي حسب انت شغال بقالك قد ايه

يعني انا كان تفكيري كده الي حد ما

اني اول ما اتخرجت

اني بقدم اكتساب الخبرة في العمل علي المرتب وطبعا علي القرب من البيت

بس هو جيه قريب من البيت من عند ربنا

بس المهم الخبرة في الاول

الي بعد كده بخبرتي دي اقدر اجيبها بيها المرتب الي انا نفسي فيه

اكيد بعد سنتين مثلا او اقل كمان

لما احس اني اكتسبت خبرة لا بأس بها

هبداء ادي المرتب الاولوية علي الخبرة اولا لاني بقي عندي جز كبير منها

ثانيا نظير خبرتي انا الي اكتسبتها وعلي اساسها ببص لراتب اعلي

انت كده قلتلى فكرة مشروع حلوة أوي أنا ممكن افتح كافيه و اسميه كده و هلاقى المنتدي كله جاي عشان يكتب مواضيعه من عنده و ممكن أدي سوما 40% من الأرباح نظير استخدام البراند نيم
انت كلامك جه على حاجة مهمة....لو احنا ناويين نجتهد و نتعب...نتعب فى شبابنا أحسن و احنا لسه بصحتنا عشان لما نكبر نحصد تعبنا ده :) و شكرا على مشاركتك كده انت بترجح الخبرة رقم واحد ...على فكرة انا معايا ما يعادل خبرة 4 سنين بشهادة مديري بس انا من النوع اللى طماع شويه و عايز اتعلم كمان أو اشتغل باللى اتعلمته عشان أطوره

المشاركة الأصلية كتبت بواسطة esam_comm

والله ياجماعه الموضوع ده محير جدا
انا اول ماتخرجت اشتغلت في شركه كويسه نوعا ما وبعدين الحمدلله اخدت وضع كويس وبقيت امسك مشاريع لوحدي وانا خبره بتاع سنه بس بعد كده الايام بقت تعدي ومابقتش اتعلم جديد لحد مااخدت القرار ورحت شركه كبيره في نفس المجال بس اللي اكتشفته بقي بجد اني مش واخد وضعي زي ماكنت في الشركه القديمه باخد خبره بس فقدت وضعي

مسألة الوضع بتكون وقت و اصعب وقت و انت فى شركة لما تبقى لسه جاي ....
بس انت موضوعك مكنش فيه مقارنة محيرة..انت اتنقلت من شركة لشركة أكبر و من مكان تشبعت بخبرته لخبرة جديدة...يمكن بس خسرت الوضع بس ده اعتقد انه مؤقت بس انتقالك ده جه طبيعى جدا.

موضوعك جميل و تقريبا كلنا فكرنا فيه أول ما اتخرجنا
و أنا عن نفسى كنت زعلانة جدا أنى ما عرفتش أشتغل فى القاهرة أول ما أتخرجت
لان مجال الكمبيوتر و تكنولوجيا المعلومات هناك أوسع و أكبر من أى محافظة
و تقريبا بتخدم على كل المحافظات باستثناء اسكندرية تقريبا
المهم :
أولا : بالنسبة لمكان العمل لأنى بنت كان صعب انى اسافر يوميا أو أعيش فى القاهرة بعيد عن أسرتى
و المكان اللى أشتغلت فيه قريب من بيتى وفر عليا كتير من مصاريف الانتقال أو عناء المواصلات مع وسيلة الانتقال محترمة جدا لأى بنت أو سيدة بدل البهدله وقلت القيمة فى السفر و موصلات القاهرة المزدحمة

ثانيا : يشاء العليم القدير إن المكان اللى اشتغل فيه بيدأ بعمل بنية لمشاريع تكنولوجية متنوعة و قواعد بيانات متعدده
و هنا بقى ظهر من جديد أختيار الشغل بجد و التدريب و تطوير النفس و فهم كل ما يتم بناءه و اكتساب الخبرة
و لا الإكتفاء بمتابعة المشاريع و استلامها من الشركات الموردة لها و اللى كانت من القاهرة ...و تملئ دماغك بدل الشغل بعمل كام محضر ولجنة و صرف بدلاتها
وطبعا كان أختيارى لاكتساب الخبرة من الظروف المتاحة حواليا بكل الطرق و الحمد لله فرقت معايا كتير مع كل التعب والمعكسات اللى قابلتها من حزب كبر دماغك و شوفلك سبوبة و قفل الورق


ثالثا : بعد أكثر من عشر سنين شغل أكتشف بعض الأمور المهمة

• إنى لما كنت بشتغل مع فريق عمل أى مشروع من الشركات القائمة عليه فى القاهرة إن كل واحد فى الفريق لا يعرف أو يجد غير جزئية صغيرة مسئول عنها يعنى تخصصية بدرجة قاتلة و ممكن يكون بقاله سنين طويلة فى نفس المهمة ، أما بالنسبة لى فقد كنت اتعلم واجيد كل ما يمت للمشروع محل شغلى بصله مما زاد ثقتى بنفسى و كذلك ثقة مديرى و المتعاملين معى من الشركات الأخرى برأيى المبنى على دراسة و على الرؤية الشاملة للمشروع

يعنى الخبرة ممكن تكتسبها فى مكانك وأحسن من الشركات الكبرى كمان

• أما من الناحية المادية فمرتب أقل مع ظروف ميسرة و موفرة فى مصاريف الانتقال و الإقامة ممكن تقلل لحد كبير جدا من الفروق الكبيرة بين المرتبات

• و هناك أيضا راحة البال و البعد عن الزحام و التمتع بحياة الإجتماعية الهادئة و مسئولياتها و صلة الرحم وبر الوالدين أمور لها قدرها وحسابها ايضا

الخبرة

الفلوس

السفر

اسم الشركة

القرب من البيت