لما قلت اخطر مشكلة فى السيراتو ....كان عندى حق

**kamalsalem** · 06-09-2010 04:50 AM

ماهو ضمان او من غير ضمان... ممكن كيا بره يبقى عندهم حل... انا لسه باعت لواحد مشاركة كده بالصور شارحله فيها يبعت لكيا من الموقع بتاعهم ازاي... الموضوع عنوانه مشكلتي مع التوكيل ف قسم كيا

**mastr_n** · 06-09-2010 05:36 AM

المشاركة الأصلية كتبت بواسطة a_tharwat

يا راجل يا طيب, الاستغفار مطلوب عشان ربنا يبارك, بس مش هيحل حاجة بدون الواحد مايتحرك, ولا ايه؟ :)

يا ريت لو كلنا ندعيله في الايام المفترجة اللي احنا فيها, وهو ما شاء الله عليه واضح انه دؤوب وبيسعى. وان شاء الله ربنا يكرم.

مع كامل احترامى لحضرتك الاستغفار مش علشان ربنا يبارك بس حضرتك مش واخد بالك
وشوف كلام سيدنا النبى بيقول اية
] قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ مَنْ لَزِمَ الِاسْتِغْفَارَ جَعَلَ اللَّهُ لَهُ مِنْ كُلِّ ضِيقٍ مَخْرَجًا وَمِنْ كُلِّ هَمٍّ فَرَجًا وَرَزَقَهُ مِنْ حَيْثُ لَا يَحْتَسِبُ [ . ( سنن أبي داود ) . شرح الحديث .

اعتقد ان الاستغفار فعلا بيحل اى مشكلة وفعلا لازم نتحرك ونستغفر فى نفس الوقت

**alzwawy** · 06-09-2010 07:33 AM

ياااااااااااااااااااه يا ابو ليلي تاني
استغفر الله العظيم بجد حرااااااااااااام و الله العظيم انا اتخنقتلك
ابعت لكيا الام يا ابو ليلي الشركه دي لو محترمه و بتحافظ علي سمعتها
هتدخلك التوكيل و تحلهالك من غير ما تدفع ولا جنيه بس ده لو هما شركه محترمه
ربنا يكون في عونك يا ابو ليلي و يعديها علي خير ان شاء الله ياااااااااااااااااااااااا اااا رب

**Hosam_Optrawy** · 06-09-2010 09:51 AM

ربنا يكون فى عونك وان شاء الله يبقى فى حل نهائى للحكايه دى

**umoussa** · 06-09-2010 10:46 AM

معلش اعزرني مبصتش كويس على الموضوعين الأوليين.

طيب معلش الكلام الي حقولهولك ده احتمال يوجع بطنك على الصبح بس لازم تعرف ان دي حقيقية.

العيب المسجل على جهاز كشف الأعطال ده يحتمل شيئيين:

1. عيب في الكنترول زي ما قالوا 50%
2. عيب في ال Solenoid Valve في الفتيس نفسه 50%

ومش عارف ليه بس أنا بميل ناحية الاختيار التاني مش الأول، لأنه لو عيب إلكتروني حيفضل موجود على طول مش حيروح ويجي. وفي الحالة دي حيبقى تغيير الكنترول ودفع 4000 جنيه فلوس بتترمي في الهوا لأن العيب حيرجع تاني.

ربنا بجد معاك وهديك للصواب
وبالمناسبة حاجتين:
1. 500 جنيه علشان كود كيا أو هيونداي مبلغ مبالغ فيه جداً من هنا للصبح
2. 4000 جنيه ثمن الكنترول مبلغ مبالغ فيه من هنا لنهاية السنة. وطبعاً ده بالمقارنة مع كنترولات العربيات الألماني، فمعلهش تحرى الصدق لأن ممكن يكون معمول عليك مصلحة كبيرة جداً

وبعد إذنك، ابعتلي على الخاص بيانات الكنترول بتاعك وأنا أقدر أسألك عليه في الخليج وأقولك سعره يعمل كام

**elassar2010** · 06-09-2010 10:55 AM

ربنا معاك و يارب تتحل مشكلتك ..

**blackknight** · 06-09-2010 11:04 AM

ياااااااااااه تانى يابو ليلى , الله يكون فى عونك يارجل . انا لما لقيتك اختفيت فترة قلت ان العربية الحمد لله بقت تمام بس قدر الله وما شاء فعل وان شاء الله تتحل عن قريب

**Amr A.salam** · 06-09-2010 11:40 AM

يااااااا رب يهون عليك يابو ليلى ويعوض عليك صبرك وتعبك

انت تروح مبدئياً لأولاد صبحي سند علشان ال4000 جنيه اللي دفعتهم دول

ورأيي تحاول مع التوكيل تاني وهيكون التشخيص بتاعه أصح حاجة

**John_Samy_1** · 06-09-2010 11:41 AM

المشاركة الأصلية كتبت بواسطة abouleila

حصل فعلا وروحت التوكيل بس العيب ده محتاج تجريب لانه مش واضح بالظبط يمعنى

انه اوقات ميكنش موجود واوقات يكون موجود زى امبارح مثلا جى من طريق السويس لحد الهرم وانا ماشى على التالت وعند البيت وقفت نزلت حاجه ورجعت اركنها لقيتها جايبة الاول والتانى .والتالت والرابع ونزلت الصبح النهارده ادور القيها جايبة التالت بس روحت الشغل وانا مروح القيها بتجيب كل الغيارات عادى بس العربية مش مظبوطة برضه .

التوكيل كشف على العربية وقال لاازم نجربها ونشيل ونحط لحد ما نعرف بالظبط ايه اللى محتاج يتغير وقال مقدرش ادخل العربية واجربها لاازم تدفع 4000 قيمة شهاده الصيانة وبعدين نشوف فيها ايه وطبعا لو فيها حاجه هتحتاج تتغير هيكون ليها حساب وده اللى خلانى اروح مركز بره .

طب تاني اشهر مركز باسمع عنه هو امير وجوزيف واعتقد حضرتك جربته. لو ماكانش ممكن حضرتك تجربه.
أنا بس مش عايز ناس تفتيلك كتير في العربية عشان أنا كنت فاكر إني قريت موضوع عن عضو معانا كان عنده مشكلة في فتيس اوتوماتيك في لانسر 1600 وحضرتك طبعا عارف إنه CVT ومفيهوش لعب إن باظ هات واحد كامل جديد. المهم هو سمع إن التكلفة في التوكيل هتكون 26,000 جنيه. طبعا رقم فلكي فجرب مع كذا ميكانيكي و وصل الموضوع إنه جاب 4 فتيس استيراد وطبعا في كل مرة يملاهم 4 لتر زيت الCVT وده اغلي من العادي وصرف فالاخر عليهم حوالي 28,000 جنيه واعتقد العيب لسة ماتصلحش. أنا مش لاقي لينك الموضوع بس أنا بدور عليه. أنا بس خايف كل واحد يفتي شوية وتوصل التكلفة تكلفة تصلحيه في التوكيل وهما في التوكيل يقدروا لو احتارو يرسلوا Kia انما المراكز شغالة علي الاجتهاد.
فيه حاجة تانية ممكن حضرتك تحاول تروح بيها غبور عند توكيل هيونداي وممكن يكون عندهم فكرة عن سبب حاجة زي كده. بس ممكن حضرتك تجرب معاهم بالتليفون الأول.
حضرتك حاول تعمل كل المحاولات اليائسة من غير ماتدفع مبالغ غير لما تكون متأكد, ممكن حضرتك تشوف ميكانيكي Kia في الحرفيين مثلا. بس بلاش من موضوع نجيب يا بيه كنترول استيراد بـ2500 جنيه ونجرب أو وإن شاء المولي الموضوع يتحل. لو قابل حضرتك حاجة زي كده جرب الكنترول الجديد الأول لو اشتغل ادفع تمنه انما متدفعش مبالغ تروح في الارض.
لو مفيش حاجة جايبة نتيجة ادفع ال4000 جنيه هما مش طايرين يعني حضرتك لما هتدفعهم هيكون من حقك تكمل عادي مع التوكيل وصياناتك تكون في التوكيل. أو أي عيوب تانية لاقدر الله خصوصا إن لو حصل إن العيب ده جاب معاه حاجة تانية بعد الشر حضرتك هتقدر تظبطها في التوكيل.

-

الموضوع: لما قلت اخطر مشكلة فى السيراتو ....كان عندى حق

LinkBack

أدوات الموضوع

عرض

-

-

-

-

-

-

-

-

المواضيع المتشابهه

اخطر مشكلة فى السيراتو وحلها مع بائعه البخور

عندى مشكله فى السيراتو وعاوز نصيحه

اخطر مشكلة فى السيراتو - الجزء الثانى

عندى مشكلة فى السيراتو

بجد مندمتش انى جبت السيراتو بس عندى سؤال؟

الكلمات الدلالية لهذا الموضوع

المفضلات

المفضلات

ضوابط المشاركة