الموضوع: اغرب موقف حصلي في حياتي(احذروا من اي حد في اي مكان)

النهارده يا جماعه لسه مروح حالا من الشارع

طبعا انا ساكن في الهرم المهم عند محطه اوتوبيس بعد شارع المطبعه علطول اتجاه الهرم كانت الدنيا زحمه عشان في ملف شمال والزحمه عنده

اول حاره يمين بس هي الي مفتوحه وجزء من الي جنبها

ماشي بالراحه عادي جدا ماشي على 20 واحد جنبي واقف على رجليه بعد ما عديت لقيته خبط في المرايه والباب اليمين ورا وباين انه خبطه خفيفه وشكله اعمى عشان انا معدي قدامه ازاي يخبط المرايه والباب

المهم نفضت وبمشي لقيته بيمشي ورا العربيه وبيشاور روحت نازله في ايه ياعم انت خبطني ينفع كده

وهو شكله سيس اوي انا قولت ده مبرشم اكيد والدنيا ماشيه معاه بالمقلوب قولتله يبني انت مجنون وانا خابطك بوش العربيه ده انت خابط المرايه والباب اليمين يعني اكيد انا مخبطكش مهو يا تعدى من قدام العربيه يا اما من وراها انما من النص انت اكيد بتهرج

قالي ده انت خبطني جامد والباب متدغدغ ورا تعالى بص طبعا انا نفضت قعد يحور شويه وصباح الفل صباح الفل كل سنه وانت طيب طب وانت كمان حقك على ومن هذا الكلام قولت بس الشاب جدع (بغض النظر عن انه مبرشم)

طبعا كل الحوار ده انا متحركتش من جنب باب السواق ركبت بصيت على كل حاجه في العربيه تمام موبايلين وعلبتين سجاير وولاعه حاطتهم في النص وعلى كرسي الي جنب السواق

جيت اطلع لقيت صاحبه جالي عند الشباك قالي بس انت غلطان طبعا انا قعدت اتكلم معاه وباصص شمال ما علينا قعد يحور خلصنا الكلام ببص ييمين لقيت شاب محترم بيقولي منتا تتكلم معاه ليه اساسا ده في سواق عدى وقالك دول حراميه روحت باصص لقيت الموبايل مش موجود

ببص في المرايه لقيت الواد بيحط الموبايل في جيبه وتقريبا هرشني نزلت جاي اعلى صوتي راح الواد قبل ما انطق كلمه طلع الموبايل واداهولي روحت قايله صباح الفل هنعتبرها كاميرا خفيه

ومشيت

بس فعلا عمري ما تخيلت موقف زي ده يحصل لي انا كده كده ياما ناس رمت بلاها على العربيه وبالنسبه لي عادي ممكن ادوس عليه وامشي لانه باين انص بينصب بس دول مكنش باين خالص انه نصب كان باين انهم حمير مش اكتر بس بس اتمنى من الكل انه يحرس وايا يكن مينساش حاجاته في موقف زي ده لازم يبقى مفتح كويس


وبالمره برضو مره ماشي في شارع متفرع من عباس العقاد 7 الصبح واحد على الشمال على رجلها بزمرلها علشان توسع مفيش لمستها بالمرايه بس الشبشب طار والوليه ياعيني على الارض وهاتك ياسويط ولطم وصريخ وانا كل ده وقفت بعدها بمترين ومنزلتش لقيت الناس بتتلم روحت مدي الاولاني وخالع ببص في المرايه لقيتها وقفت وماشيه حافيه واخدت الشبشب وكملت مشي؟؟؟؟