أنا باشتري اليومين دول سيراتو 2011 وعاوز اعرف الموديل ده موجود في مصر يا جماعة

بسم الله الرحمن الرحيم
اخواني أعضاء المنتدى الكرام
يشرفني اشتراكي في منتداكم الموقر و الذي استفدت منه الكثير في مرحلة اختيار السيارة
و لقد استقر رأيي على شراء سيراتو هاي لاين 2011 مواصفات سعودية
و عندما ذهبت لشرائها من أحد معارض المنصورة في الاول قال هات عربون علشان جدية الحجز خاصة ان اللون الموكا اللي انا عاوزه مش موجود عنده قلتله ماشي خد 5 الاف قال لأ هات 8 الاف
قلت مش مشكلة
بعدها بيومين اتصل "يا باشا مش لاقيين و لا حتة موكا 2011 هاي لاين خالص في البلد فيه ابيض و فضي و بدنجاني و اسود و رمادي و سماوي , اجيب لسعادتك ايه؟" قلتله خلاص هات الابيض
غاب يومين و رجع قاللي مفيش أبيض متاخد الفضي اهه فاتح برضه زي الابيض
انا طبعا كنت جبت اخري و كنت مستعجل جدا اني اشتري العربية و ظروف شغلي مش سامحة اني انزل الف اكتر من كدة فوافقت اني اخد الفضي و قلتله ابعت هات ورقها
و عند الاستلام لاحظت عدم وجود أي شيء يدل على انها مواصفات سعودية حتى الاستيكر اللي المفروض يكون على القايم اللي جنب السواق ملقيتش مكتوب فيه حاجة
بس لمحت الورقة اللي بتيجي ملزوقة على الزجاج من الجمارك و لقيت مكتوب عليها سوريا
طبعا فركشت البيعة و اخدت فلوسي من الراجل و مرضيتش اشتري منه اي حاجة رغم انه قاللي خد أي واحدة تانية تعجبك و أنا اغيرلك الورق
المهم بدون تطويل
واحد صاحبي من دمياط رشحلي معرض في دمياط الجديدة اسمه السقا
رحت للراجل صاحب المعرض
الحقيقة راجل محترم
و انا قاعد عنده كلم المستورد في الفقاهرة و سأله عن اللون الموكا و لقاه عنده
المهم
هو قاللي حاجة غريبة قوي مش عارف بقى صح و لا غلط
قاللي ان الموديل اللي هيجيبهولي فيه سبويلر على الشنطة و فيه ستوب
طبعا انا عمري ما شوفت كدة و انا بادور على النت
فقلت له عامة هاجهز الفلوس و اجيلك
و رجعت من عنده امبارح و قعدت على النت أدور لحد لما لقيت الصور دي في اللنك ده

Kia Cerato Limited On Sale In Australia | Reviews | Prices | Australian specifications

و ده كمان

2011 Kia Cerato Limited Edition Review and Photos - Gambar Foto Modifikasi Mobil,Harga Mobil Toyota Avanza

طبعا شايفين منظر الاعتاب و الاكصدامات و السبويلر تحفة جدا
انا بقى سؤالي يا ترى الموديل ده موجود فعلا في مصر بمعنى ان الراجل صادق و هيجيبلي دي و لا هيجيبلي واحدة عادية و يروح بقى مركبلي عليها اي سبويلر و السلام تحلية بضاعة؟
سؤالي التاني بقى هل فيه موديلات فيها زجاج فاميه و لو عاوز اجيبه و اثبته في الرخصة أعمل ايه و لو مش موجود ممكن اركبه بعد كدة و لا ايه النظام
طبعا ده أول موضوع لي و أول مشاركة لي في الموقع الجميل ده و اتمنى اني مسببلكوش أي ازعاج
و شكرا لكم جميعا

انا شوفت فعلن عند معرض سيراتو باسبولير

بس مش زي الي في الصور الي حضرتك حطتتها

اسبولير صغير علي الشنطه شبه بتاع البي ام

العربية دي مش سيراتو عادية انا لسه كنت بقرا عنها قبل ما اشتري... دي هتنزل ف 2011 كده كام عربية للشهرة limited edition وده الشركات بتعمله لما موديل ينتشر اوي والهدف منه
1- الوصول لقاعدة العملاء اللي بيرفضوا شراء اي منتج منتشر في السوق زي السيراتو ف ممكن ناس يقولوا انا راكب سيراتو مش زي اللي عند الناس كلها
2- رسالة كده صغيرة للمصانع التانية انه الموديل حقق مكاسب مهولة

بس انا مصدر قلقي انه العربية دي هيتعمل منها عدد محدود جداً عشان تبقى فعلاً متميزة.. ف الراجل ده مستورد جامد فعلاً عشان يلحقلك واحدة منهم؟ ولا هو متنور شوية وبص لقى الشكل ده موجود وقرر يشتغل الناس؟ زي اخونا اللي كان بيشتري سيراتو خليجي ولقي فيها جنوط بتاعة كورولا

تعديل: انا بصيت بسرعة كده على السايت... العربية دي زي ما انا قلت في الاول هيتعمل منها عدد محدود جداً وفعلاً مكتول على السايت انهم 200 عربية على مستوى العالم!!!!!!!! ازاي بقى عم حزمبول ده وصل لواحدة منهم.. الموضوع ده فيه اشتغاله

يا جماعه السبويلر فعلا نازله فى ال 2011 وفى كمان موديلات 2010 فيها سبويلر بس كانت فى اخر 2010 انا شوفتها بنفسى عند جابر عبد الشهيد وموجوده فعلا عنده
بس السبويلر مش زى ده فعلا هوا اصغر شويه ومش شايف ليه لازمه

فى عربيات فيها سبويلر زى دا كدا

http://sphotos.ak.fbcdn.net/hphotos-..._7459775_n.jpg

دى عربية زواوى على فكرة
السيراتو اللى انت حاطط صورها دى نسخة محدودة نزلت فى استراليا بس

متقلقش توكل على الله ال 2011 هاى لاين نازله بسبويلر :ask:

و الله يا جماعة مش عارف اقول ايه على ردودكم السريعة دي و الله
الف الف شكر
لكن الردود دي حيرتني أكتر

و كمان يا ريت حد من السادة المحترفين في موضوع العربيات يقولنا الفرق بين العربيات السعودي و الكويتي و الأردني و السوري
مش قصدي فرق الكماليات أو الخامات
لأ أنا قصدي الفرق اللي نعرفها بيه علشان محدش يضحك على حد فينا ويديله واحدة أردني على انها سعودي و لا حاجة
وجزاكم الله خيرا

شوف يا باشا

المفروض ان القايم بتاع السائق ملزوق عليه بليته سوداء مكتوب عليها ان العربيه مطابقه للمواصفه الخليجية السعوديه
بس عرفت ان بعض التجار الله يسامحهم بيقلدوها وبيلزقها اضمن حاجه تاخد رقم ال VIN بيكون موجود على التابلوة قدام السواق تقدر تشوفوا من بره العربيه تكتبه وتدخل على الرابط ده تكتبه وتتاكد
http://www.nilemotors.net/Nile/146471-a.html (شويه مواقع ولا اروع)
تحياتى

شاكر جدا على ردك يا جميل
ربنا يجازيك خير عننا

ممكن بقى واحد من اهل الخبرة يجاوبني على السؤالين التانيين

اللي هم

الموديل اللي فيه سبويلر فيه نور ستوب ده موجود في مصر و لا لا

و يا ترى فيه سيراتو بزجاج فاميه و لا لا و لو لا ازاي اركبه و فين و ازاي اثبته في الرخصة

و شكرا