اخ جديد ليكم محتاج مساعدة

**beterban** · 06-09-2010 04:23 PM

اولا السلام عليكم :
انا فى الحقيقه متابع جيد جدا للمنتدى من فترة طويله جدا يمكن من اكتر من 10 شهور تقريبا ومعجب جدا بالسيارة اللوجان ودة فى الحقيقه يرجع لمجهود الاخوة المتميزين الموجودين هنا فى المنتدى والى ملاحظ اعجابهم الشديد بسيارتهم الشخصيه وتفانيهم فى الدفاع عنها ومش عاوز احدد اسماء بعينها عشان ما حدش يزعل ولكن اخص بالشكر والامتنان لمجهودهم فى الرد على استفسارات الاخرين ( -bishoy-ringo - fox - sharky - nader nabile - mo7a mo7a ) وطبعا الاب الروحى col - eng - khaled ودول فى الحقيقه يستاهلوا كل الشكر مش من الاعضاء فقط ولكن من شركة رينو نفسها لانى باعتبرهم من اكبر المساهمين فى انتشار السيارة بالشكل الجميل الى انا متابعه دة .

المهم ان شاء الله انا ناوى اتوكل على الله واجيب حبيبتكم لوجى فول اوبشن باذن الله تعالى وناوى احجزها من التوكيل فى المقطم اول شهر 10 الى جاى ان شاء الله - بس فى حاجه محيارانى جدا الا وهو اللون الى اجيبه انا عن نفسى معجب جدا بالفيرانى بس فى ناس كتير من زمايلى مخوفينى منه ومن اى لون غامق ودة عشان الخدوش والتراب ومظهر العربيه وخاصة ان انا ساكن فى منطقة ريفيه فى المنوفيه وباشتغل فى القاهرة . وبيرشحولى الالوان الفاتحه وخصوصا اللون الفضى .
بس انا لسة محتار ونفسى الاخوة الاعزاء يساعدونى وخاصة ملاك الالوان المتميزة فى اللوجى ( البترولى - الفيرانى - الفضى - البيستاج ) لانى عاوز استفيد من خبرتهم فى التعامل مع لون عربيتهم ومدى رضاهم عن لون عربيتهم بعد فترة من الشراء وان شاء الله زى ما عودتونا الموضوع دة يكون مرجع لكل الى محتار فى اللون زى حالاتى .
وثانيا اية ملاحظتكم على التوكيل الى فى القطاميه .
وعلى فكرة دى اول عربيه لى ويا رب ربنا يباركلى فيها ويباركلكم فى عربياتكم
ولكم جزيل الشكر والامتنان .

**frhateg** · 06-09-2010 04:38 PM

1000 مبروك عليك مقدما . انا معايا الأسود . و لكني ارشح لك اللون الفضي .

**MoHaMed HaMeD** · 06-09-2010 04:43 PM

مبروك مقدما ان شاء الله
انا معايا الون الاسود بس تعابنى جدا انه بيتوسخ بسرعه جدا بس لما العربيه بنتظف شياكه انا ارشحلك الفضى والنبيتى ويأتى اخيرا البترولى

ومبروك مقدما مره اخرى

**amr.elsayed** · 06-09-2010 05:17 PM

الف مبروك مقدما وان شاء الله تكون وش السعد عليك
بالنسبة للالوان كل حاجة وليها تمن او حتضحى بحاجة قصاد حاجة بمعنى
الالوان الغامقة رائعة وبتعطى للوجان شكل جميل خاصة بالليل مع ظهور انوار العربية .. بس فى نفس الوقت حتضحى بالعملية بمعنى ان الالوان الغامقة ليها عيوب زى اظهار الخدوش و امتصاص حرارة اشاعة الشمس وكثرة النضافة
..............................
ان معايا اللوجان الفيرانى لون جميل وانا راضى عنه جدا ولكن اللون انا موفر له العناية اللازمة من مستلزمات العناية بالدهان بالاضافة ان البواب بينضفها كل يوم
لو عندك المقومات دى مش حتحس بعيوب اللون الغامق ... نصيحتى ليك تجيب اللون الفضى انا شايف انه لون جميل وعملى فى نفس الوقت
وان شاء الله تحجز وتستلم على خير وربنا يباركلك فيها

**M.Radwan** · 06-09-2010 07:32 PM

المشاركة الأصلية كتبت بواسطة ringoo

الف مبروك مقدما وان شاء الله تكون وش السعد عليك
بالنسبة للالوان كل حاجة وليها تمن او حتضحى بحاجة قصاد حاجة بمعنى
الالوان الغامقة رائعة وبتعطى للوجان شكل جميل خاصة بالليل مع ظهور انوار العربية .. بس فى نفس الوقت حتضحى بالعملية بمعنى ان الالوان الغامقة ليها عيوب زى اظهار الخدوش و امتصاص حرارة اشاعة الشمس وكثرة النضافة
..............................
ان معايا اللوجان الفيرانى لون جميل وانا راضى عنه جدا ولكن اللون انا موفر له العناية اللازمة من مستلزمات العناية بالدهان بالاضافة ان البواب بينضفها كل يوم
لو عندك المقومات دى مش حتحس بعيوب اللون الغامق ... نصيحتى ليك تجيب اللون الفضى انا شايف انه لون جميل وعملى فى نفس الوقت
وان شاء الله تحجز وتستلم على خير وربنا يباركلك فيها

رينجو باشا قالك المفيد
ان معايا اللون الفضي، العربية مش بتحتاج مني غير أنظفها بالرياشة كل يوم الصبح تبقى زي الفل.
ربنا يباركلك فيها ويملاها خير ان شاء الله،

**ahmedbakr50** · 07-09-2010 01:59 AM

أنا معايا البترولى ولونها مع النواكل جامد جداً

**cheetos_892005** · 07-09-2010 04:15 AM

فضي ثم بترولي
علي فكره انا عربيتي بترولي

**fox198626** · 07-09-2010 06:15 AM

أنا أرشحلك النبيتى ثم البترولى وأنا معايا بترولى..وألف مبروك مقدما

**AirForces** · 07-09-2010 08:04 AM

انا معايا فيرانى بس بيحتاج نظافة دايمة حتى لو مغطى العربية بيتوسخ بسرعة
فبرشحلك النبيتى ثم الفضى لأنهم الوان عملية

**best2010** · 07-09-2010 12:35 PM

الفضى اكيد طالما موضوع التراب ده هيبقى مشكلة عندك ..
وانا كنت محتار بين الفضى لانه عملى اكتر والفيرانى لانه أشيك .. ورسيت على الفضى

الموضوع: اخ جديد ليكم محتاج مساعدة

LinkBack

أدوات الموضوع

عرض

-

-

-

-

-

-

-

المواضيع المتشابهه

انا جديد فى الماروتى محتاج مساعدة..

انا بايكر جديد محتاج مساعدة

نوبيراوى جديد و محتاج مساعدة

جيتزاوي جديد محتاج مساعدة

عضو جديد محتاج مساعدة

الكلمات الدلالية لهذا الموضوع

المفضلات

المفضلات

ضوابط المشاركة