الموضوع: مسلسل «كويتى» يسىء للمصريين .. ويصور المرأة المصرية بـ«الانتهازية وغير النظيفة»

فعلا والله...احنا بقينا ملطشه من كل الدول...

المشاركة الأصلية كتبت بواسطة mazagangee

ده كان زمان
دلوقتي همه حقهم يبصولنا بقرف
شوف بلدنا و شوف بلادهم على كل المستويات
احنا بقينا في مزبلة العالم
و همه عدوا العالم الأول
مع ان كل النظافة دي اللي عملها مصريين
و لكن الشيخ البعيد باتع

واللهي ياسيدي الفاضل انا عاوز اقولك كام حاجه كدا:
اولا من ناحية الشعب فاحنا عندنا ناس مميزه جدا وبتفهم في حاجات كتيره وبتخترع كمان ومتفوقه في مجالات كتير بس النظام طاحنها . ده احنا عندنا كام واحد فابزين بجائزة نوبل في مجالات عديده يعتبروا فخر لاي دوله
ثانيا لازم تراعي ان البلاد دي بتعوم فعليا على برك من البترول واللي من غيره ماكنتش حتى حتعرف اسمهم . بالاضافه ان الدول دي ماعندهاش اي بحث علمي او نهضه صناعيه تفخر بها يعني هما ما استفادوش بالفلوس دي . هيا دول مستهلكه فقط .
انظر لكم التنازلات الاخلاقيه اللي عملتها الدول دي تحرروا من كل التقاليد الاسلاميه وبقوا ماشيين في ديل الاجانب وعقدة الخواجه عندهم في كل شئ . مثال واضح على كده دبي.
وكمان عماد العماله في الدول دي كلها هم الاجانب مما يخل باستقرار البلد . في حين ان اهل البلد لايعملوا الا في الوظائف اللي فيها راحه ومكاتب وتكييف .
وبعدين مين قال ان الدول دي عدوا العالم المتقدم ؟؟ او هما اصلا متقدمين؟؟!!
عزيزي التقدم مش بالمولات والطرق وناطحات السحاب وملاعب الجولف وحفلات شاكيرا ..... لالالا التقدم فقط بالنهضه والصناعه ... تقبل احترامي

ننضف بلدنا احنا كده الأول من جوه
و بعدين نبقى نشوف بره بيقولوا إيه علينا ..

أنا ماشفتش الفيديو
لكن عارف إننا مش بنحب نبص فى المراية
بنتخض
لازم نبص فى المراية ونعرف الناس شايفانا إزاى

المشاركة الأصلية كتبت بواسطة grumby78

اولا من ناحية الشعب فاحنا عندنا ناس مميزه جدا وبتفهم في حاجات كتيره وبتخترع كمان ومتفوقه في مجالات كتير بس النظام طاحنها .

هيه دي مشكلتنا النظام ككل مش صحيح و محتاج ازالة و اعادة بناء من أول و جديد


ثانيا لازم تراعي ان البلاد دي بتعوم فعليا على برك من البترول واللي من غيره ماكنتش حتى حتعرف اسمهم . بالاضافه ان الدول دي ماعندهاش اي بحث علمي او نهضه صناعيه تفخر بها يعني هما ما استفادوش بالفلوس دي . هيا دول مستهلكه فقط .

ده مش صحيح خالص , همه فعلا عندهم بترول لكن كما همه جابوا المصريين عشان يبنوا البلاد دي و يعملوا ليها نظام و يكونوا ليها دول و ارجع لحلقات القاهرة اليوم مع محمد الفايد و انت تعرف هوه عمل ايه في دبي كمثال
و كمان فيه دول كتيرة زي النمور الآسيوية و لا عندهم بترول و لا حتى مساحات أراضي لكن عندهم نظام للحياة خلاهم من دول العالم الأول

انظر لكم التنازلات الاخلاقيه اللي عملتها الدول دي تحرروا من كل التقاليد الاسلاميه وبقوا ماشيين في ديل الاجانب وعقدة الخواجه عندهم في كل شئ . مثال واضح على كده دبي.

كل الدول العربية دلاديل مش همه لوحدهم و أول و أكبر دلدول كلنا عارفينه

وكمان عماد العماله في الدول دي كلها هم الاجانب مما يخل باستقرار البلد . في حين ان اهل البلد لايعملوا الا في الوظائف اللي فيها راحه ومكاتب وتكييف .

في مصر أغلب الناس برضه عايزه تعمل كده ده حتى كمان العمال اللي لا بيقروا و لا بيكتبوا عايزين كده و ده بناء على تجارب شخصية مع أكتر من 10 أنفار بدون مؤهلات و بدبلومات و كمان مش لاقيين ياكلوا و كنت عايز أساعدهم لوجه الله و بمرتبات مش بيحلموا بيها

التقدم فقط بالنهضه والصناعه
مضبوط و شوف يا سيدي المناطق الصناعية في السعودية كمثال هتلاقي فيها مصانع ضخمة و تسهيلات حكومية و مساعدات و قروض أحيانا بدون فوايد و أرض ببلاش ....... عارف أكبر شركة بتروكيماويات في الشرق الأوسط مين .. سابك و فيه كتير بس أصغر منها و أفضل بسكويت حضرتك بتشتريه هنا في مصر اسمه ديما ده برضه سعودي و فيه حاجات تانية كتيرة زي البامبرز احنا بنسيب المصري و بنشتري السعودي عشان أفضل كتير و أجود ..

تعالى بقى انت بفلوسك و من غير قروض و اغلط و روح لجهاز أي منطقة صناعية في مصر و قولهم انك عايز أرض عشان مصنع هيقلبوك و يقلعوك هدومك و مش هتاخد حاجة غير بالرشاوي و العافية و بعد كده هتشتري الأرض تاني من العرب لو انت جيت الصعيد و لو عايز تجرب أنا مستعد ألف معاك أوريك على الطبيعة في 6 مدن صناعية جديدة على الأقل , و لو عايز تشوف حال المصانع الموجودة تعالى أقعدك مع أصحاب 10 مصانع على الأقل و تشوف بنفسك
... تقبل احترامي

آسف ان أسلوبي في الآخر كان وحش لكن الصناعة دي شغلتي و زعلان عليها و ليا فيها تجارب كتيرة وحشة

سيدي الفاضل احب ارد على حضرتك في النقاط التي اشرت اليها :
اولا النظام الناجح والفعال ينتج نوابغ وعلماء ومخترعين ومبادرين في كل المجالات وهو مالم يحدث في دول الخليج بمعنى لاوجود لنوابغ او مخترعين او رواد هناك . احنا علمناهم وخرجوا ايضا في بعثات علميه في كل انحاء الارض ولكن الرفاهيه الاقتصاديه اللي بيعيشوا فيها جعلتهم شعوب بلا نبوغ بلا دافع للتقدم و التميز والمنافسه فكانت نقمه عليهم ولم تفدهم بشئ . ده حتى مجال التعليم عندهم تردى جدا بعد احلال المواطنين مكان المدرسين المصريين وغيرهم
ثانيا من الظلم مقارنة دول مصدره للبترول اعضاء في اوبك بالنمور الاسيويه اللي خدوا السلم من الاول وارتقوا بالفرد تعليما وتدريبا حتى اصبحوا اسياد للصناعة في كل صورها مزاحمين دول الغرب ومتفوقين عليها في احيان كثيره والامثله كثيره لتفوقهم في مجالات السيارات والفضاء وهندسة البناء وتكنولوجيا المعلومات والهندسه النوويه والصناعات الاستهلاكيه والالكترونيات ... فقل لي ماذا صنعت دول الخليج غير تصدير البترول والتسابق ببناء ناطحات السحاب والمولات وحلبات الفورميولا وان ؟؟!!
كل ده والنمور الاسيويه اللي حضرتك بتقارها بدول الخليج عملوا ده بلا ثروات طبيعيه جباره .
ولما قلت على الدول دي انها تابعه للغرب انا قصدي القواعد الامريكيه والجيش الامريكي اللي بيتمشى في الدول دي زي مايكون في بلده بالاضافه لعدم قدرة هذه الدول حتى الدفاع عن نفسها . وده اظن كان واضح في حرب الخليج زمان والان في التهديد الايراني لها .
ولما قلت الناس هناك مش عاوزه تشتغل الاشغل انتخه ومريح ده مقارنة بمصر التي يعمل شبابها كل انواع الاعمال بلا استحياء وبيحفروا في الصخر عشان بس الكفاف . يبقى مين احق بالاحترام . شعب بيناضل للعيش رغم صعوبة الظروف ولاشعب عاوز يتكيف ويتهز على كرسي المكتب . ده غير ان الطفره البتروله وتحسن الوضع الاقتصادي لهم لم يزدهم غير الاحساس بالتعالي النابع من عربيات البورش والفيراري والفورد اللي راكبينها مش من قيمة الانسان وسعيه ومكانته بين الدول وكلنا عارفين نسبه كبيره منهم بتعمل بالفلوس دي ايه في اوروبا ولبنان وغيره وغيره .
وزي ماهما عندهم بسكوت وبامبرز و pvc ودهانات وبتروكيماويات تنتج من مصانع يديرها ويشغلها كفاءات اجنبيه ومصريه في احيان كثيره ولا وجود للمواطن فيها الا كمدير على المكتب ... زي مافي كده احنا برضو رغم النظام الزفت عندنا صناعات يديرها مصريين فقط لان البلد دي فيها مميزين كتير في كل مجالات الدنيا في من البسكوت و نهاية بتجميع السيارات والحديد والصلب والاسمنت وغيره .
توجد في مصر عقبات كثيره في وجه المستثمر ورجل الصناعه وده يرجع للنظام وقصر النظر احيانا ولكن في الناحيه الاخرى عندك مهندسين علماء حازوا على نوبل . جيولوجيين في ناسا . ادباء ومفكرين على اعلى مستوى . مدرسين واكاديميين . اطباء منهم عالميين في مجالات عديده . مخترعين . رجال دين تحت مظلة الازهر الشريف هم الافضل عالميا . جنود مربطين واخيرا مصر فيها ناس صابرين ..... ما اردت ان اقوله انك لو قارنت المصريين كشعب بكل اطيافه بشعوب الخليج لوجدت الكثير مما يحسدوننا عليه وده اللي يفسر محاولاتهم المستمره للانتقاص من مصر والمصريين للاحساس باننا الافضل كشعوب ....
اخيرا احنا ننتقد نفسنا نعم ولكن نتقبل الاساءه من شعوب بتاعت لندن وبيروت وشوارعها لا والف لا ....
تقبل احترامي

كل العرب في البالوظة ....

أحنا معناش فلوس و متنعتظين على الفاضي

و هما معاهم فلوس و متعنتظين بها ..........
و في الآخر ........... أمريكا و الصهاينة بيعملوا اللي هما عايزين يعملوه فينا

أمة متخلفة مستهلكة ...

من ناحية مناقشة السلبيات الخاصة بالمجتمع ......... مش عارف أحنا ليه أصبحنا بنزعل من بعض قوي كدا
فيها أيه لما مسلسل كويتي ينتقدني ....... و مسلسل مصري ينتقد الكويتي
ده دليل على التفرق .... و العنتظة الكدابة .....

و أعتصموا بحبل الله جميعا و لا تفرقوا ..... صدق الله العظيم

لعبة مكشوفة من إعلام ممول

الإعلام الكويتي = الإعلام المصري = الإعلام الجزائري = الإعلام العربي كله = التفرقة بين الشعوب الإسلامية
ولو إن فيه منهم عنصريين كتير فعلا