هل الزجاج الامامى ممكن يتغير على حساب التأمين

**semsem8100** · 08-09-2010 01:36 AM

كنت بعدى من عربيه نقل والحمدلله نطت ظلته عملت نقره فى الزجاج الامامى هى نقره صغيره بس خايف تكبر أو أن الازاز يتكسر فجأه فتنصحونى بأيه هل الحمه ولا ممكن يتغير على حساب التأمين ولو هغيره أغيره فى التوكيل ولا أيه العمل بالضبط وهل علشان يتغير على حساب التأمين لازم يكون الشرخ كبير ولا ممكن يتغير علشان نقره صغيره .. وأيه الاجراءات اللى لازم أعملها علشان يتغير على حساب التأمين ..أفيدونى أفادكم الله ولكم الشكر

**SeaShark** · 08-09-2010 02:36 AM

والله كانك بتتكلم عني

برضه طوبة في الزجاج الامامي و عملت نقرة صغيره حوالي نص سم

و وديتها لبتاع الزجاج قالي سيبها كده دلوقتي متعملهاش عشان احتمال تكبر و لما تكبر نبءي نلحمها

و انا برضه عايز اعرف هل التأمين يغطي الموضوع ده ولا لا المفروض يكون مكتوب في الوثيقة

و انا لو هغيره مش عايز اجيبه من برة التوكيل عشان مش هيكون عليه كلمة نيسان و كمان فك و تركيب الزجاج بالذات لازم يكون كويس و مفيهوش مشاكل.

انا متابع الموضوع معاك لو حد ممكن يفيدنا

**semsem8100** · 09-09-2010 02:48 PM

أنا سألت فى المعرض قالى التأمين شامل ولو دفعت حاجه هدفع 10% ضريبه مبيعات بس أنت أسأل برضه على التأمين بتاعك برضه شوفه شامل ولا فيه نسبه تحمل أنا لما كلمت مسئول التأمين فى أبوغالى الى أنا مشترى منه العربيه قالى بعد العيد نغيره بس مهندس التأمين لازم يشوفه الاول وبعد نغيره وتدفع 10% من التكلفه ضريبه مبيعات س المشكله لازم أروحلهم مركز الخدمه بتاعهم فى العبور وأنا فى مدينه السادات .. وبرضه لسه ماحدش أدانا رأيه .. ياريت لو حد يعرف حاجه عن موضوع اللحام بتاع الازاز بيتعمل أزاى وهل بيبان بعد كده ولا الكسر بيختفى وهل لازم يكون الكسر بحجم معين علشان يتلحم ولاأيه الموضوع

**kamalsalem** · 09-09-2010 02:54 PM

لو تمنه هين اعمله على حسابك عشان شريحة التأمين متزيدش.. معرفش ده رأيي وانت حر.. انا ان شاء الله ناوي لما اأمن ابقى اخلي التأمين ده لحاجة لا قدر الله كبيرة

**Adham** · 09-09-2010 03:00 PM

لو سيبتة كدة عرضة انة يزيد بالذات مع الجري بسرعه عالية في طريق سفر مثلا لان السرعه بتخللى ضغط الهواء عالزجاج كبير و بالتالي يخللي الشرخ اللي النقرة يجري

الحمة بال "حقن" مش حايتكلف الا 20 - 50 جنية

و اللي اعرفة ان التأمين مش عالزجاج الا لو حادث شامل

انما سرطان او نقرة متهيألي بيبقى برة التأمين

و الموضوع مش محتاج تغيير الزجاج الاصلي كفاية الحقن

**semsem8100** · 11-09-2010 03:10 PM

فين ألاقى حد بيعمل اللحام ده

**Adham** · 11-09-2010 05:32 PM

كتير بس انا ماعرفش حد قريب منك في الجيزة

انا اللي اعرفة واحد جنبي في مصطفى النحاس - مدينة نصر

**tarekmomo** · 11-09-2010 06:25 PM

انا واحد صحبى معاة كيا سيراتو وغير الزجاج الامامى على حساب التامين

**Bishoy.Girgis** · 11-09-2010 11:04 PM

الزجاج بيتغير عادي جدا علي حساب التامين انما العربية ممكن تتاخر عليك طبعا علي ما اجراءات التامين تخلص و يتركب الزجاج الجديد فعشان كده برجح انك تحقنه افضل عشان متضيعش وقتك و كمان عشان شريحة التامين متعلاش عليك في القسط اللي جاي
و من الاخر الزجاج الاصلي زي الزجاج اللي مش اصلي كله بيتكسر و كله بيتحقن
انا كان معايا تويوتا كورولا و كان زجاجها اصلي و لما اتكسر ركبت زجاج تركي بـ 300 جنيه و مكتوب عليه تويوتا و عاش معايا زي الفل بدون مشاكل
حضرتك احقنه لأن العربيات النقل مش هتبطل و برده هتمشي جنبك علي الطريق
حافظ علي تأمين العربية لحاجه كبيرة لقدر الله

**Adham** · 12-09-2010 12:21 AM

المشاركة الأصلية كتبت بواسطة Peaceman

و من الاخر الزجاج الاصلي زي الزجاج اللي مش اصلي كله بيتكسر و كله بيتحقن
انا كان معايا تويوتا كورولا و كان زجاجها اصلي و لما اتكسر ركبت زجاج تركي بـ 300 جنيه و مكتوب عليه تويوتا و عاش معايا زي الفل بدون مشاكل

مش موضوع يعيش او مايتكسرش

شوف حضرتك انا اشتغلت في جريش فترة و عارف ان الزجاج اللي بيتصنع هنا نوعين أو بالاصح فرزين

زجاج شركات و زجاج تجار

زجاج الشركات او التوكيلات بيبقى خالي من عيوب الصناعه و دي لا تظهر بالعين المجردة و انما الزجاج بيتم علية اختبارين

1 - انة يتحط عالدليل Guide : و دة بيبقى علشان يبين اذا كان الزجاج فية اي عيب زي انة "مفتول" او فية جنب اعلى من جنب و لو مليمتر

2- البروجكتور: بيتحط لوح الزجاج و وراة زي البروجتور و بيرسم نقط و خطوط يتم مطابقتها على لوحه عالحائط

و دة يبين اي انكسار في مرور الضوء من خلالة من خلال اعوجاج الخطوط دي

غير طبعاً العيوب اللي تبان بالنظر زي انة يكون فية هواء في طبخه الزجاج, بين البلاستيك الPVC و الزجاج الخارجي في الزجاج التربلكس او شطف في الحروف او غيرة

و الزجاج اللي بيترفض من الشركات (التوكيلات) بيتم بيعه للتجار (محلات الزجاج اللي في السوق)

و طبعا دة بيبقى في حدود معينة

يعني من الاخر الزجاج بتاع العربية الاصلي اللي جاي من برة (مش تجميع محلي برضة بيبقى جريش) زي ماركات مثل Saint Gobain بيبقى نقي و صافي و خالي من اي عيوب في الانعكاس او "مفتول" او غيرها

و اللي بيبقى في التوكيلات هنا بيبقى زجاج (فرز أول) بس ممكن يتم التجاوز عن عيوب بسيطة في الانكسار احياناً (أنت و بختك) مندوبين التوكيلات في الاستلام برضة بيمشوا حالهم ماحنا في مصر برضة

و اللي بيبقى عند التجار في المحلات بيبقى "غالباً" فرز تاني فية عيوب قد لا تستطيع تمييزها بالعيون المجردة

الم يلفت نظرك احياناً انك تلاقي برابريز سيارة تحس انة مبقع !!! زي مايكون منقط و مهما تنضفة تحس ان فية بقع و نقط فيها بياض شوية بتبان في الشمس دة برضة من عيوب الزجاج

الزجاج اللي تروح تشترية من جريش في المصنع فيالعاشر من رمضان بيبقى احيانا لسة ماتفرزش يعني ماتحددش ان كان شركات و للا تجار و ساعتها انت و بختك فية

و خللي بالك ان برضة فك و تركيب الزجاج ساعات مش بيبقى بالجودة زي المصنع من حيث خامات التركيب زي السيليكون السيء او باكتات بتتأثر نتيجه انها كانت في الشمس و الغسيل لفترة و ضعفت فنتيجه فكها و تركيبها تلاقيها مش مضبوطة زي الأول و فيها فروقات بسيطة من الحروف