ال 405 الإيراني طلعت جر خلفي يا للهول!!!!!!!!!!!!!!!!!!!!!!!

بسم الله والحمد لله والصلاة والسلام على رسول الله وعلى آله وأصحابه أجمعين

وبعد
كنت سامع إشاعات أن البيجو 405 الإيراني جر خلفي ولقيت العربية في مصر الجديدة وبصيت تحتها
ولقيت المفاجئة

العربية جر خلفي على كرونة
عملوا كده ازاي الإرانيين وطوروا الشغل الفرنساوي بنظام جر خلفي يناسب الطرق المكسرة
إستطاعوا يطوروا بدل القص واللزق اللي شغال عندنا من الأزل

لو مصر عملت حاجة زي كدة من عشرين سنة كان زمان ال 128 أحسن من الانوس والشاهين أحسن من النوبيرا
عموما الحمد لله ربنا يوفقنا للخير
وعقبال مصانع مصر لما تفكر تطور حاجة

م/أحمد

يا باشمهندس انا اسمع من زمان ان كان في بيجو 405 فرنساوي جر رباعي و دي ما نزلتش مصر نهائي و كانت بتخش راليات و كده ف مش بعيد ان دا يكون تطوير للموديل الي بحكي عنه

مظنش ان دي ليها علاقه بعربيه الراليات. هوه الموضوع مش هيبان الا لما نعرف ايه الموتور اللي موجود فيها. يا اما موتور قديم بنظام جر خلفي.. يا اما نفس موتور الجر الامامي و اتصمم ليه نظام جر خلفي

انا مش قصدي انها زي عربيه الراليات انا قصدي ان كان في 405 فعلا بنظام دفع رباعي يعني فيها كرونه ورا انما هيا مختلفه نهائي و الكلام دا انا كنت قريته في مجله عام 1990 و كان بينزل منها للستهلاك العادي مش الراليات بس.
الجديد بقي انا سمعت ان موتوره مش بيجو!!!!!!!!!موتور من تصميم شركه تانيه نمساوي باين و ماشوفتهاش مع حد لحد انهارده علشان احكم عليها

توضيح بسيط بخصوص ال405 الإيرانى ذات الجر الخلفى :

هذة السيارة تشابه ال405 فى الشكل الخارجى والصالون فقط مع اختلاف كل ما هو عدا ذلك، علشان اقرب لك الصورة علاقة هذة السيارة بال 405 الفرنساوى هى بالضبط نفس علاقة الشاهين بالريجاتا، الشاهين مطورة من سيارة اخرى لا علاقة لها بالريجاتا هى ال 131 التى تختلف فى كل شئ عن الريجاتا، ولكن الشاهين تم تعديل شكلها الخارجى من شكل ال131 الأصلى لتصبح تقريبا مطابقة للريجاتا فى الشكل الخارجى مع اختلاف كل ما هو غير ذلك(نظام ميكانيكى مختلف تماما)

نفس الحال بالنسبة للسيارة RD التى تباع فى مصر باسم مخالف هو405 ROA ولا ادرى سبب تغير الإسم ولكنها موضه طالع فيها الوكلاء المحليين حاليا هى اختيار اسماء للسيارات المباعة فى مصر تخالف اسم السيارة فى اى مكان آخر فى العالم حتى لا يستطيع العامة من مستخدمى السيارة جمع معلومات عنها من على الإنترنت، والأمثلة كثيرة منها على سيبل المثال لا الحصر الإسبرانزا والفيرنا وال ROA، المهم ان هذة السيارة ROA لم يتم تطويرها من ال405 نهائيا ولكن تم تطويرها من سيارة اخرى ذات جر خلفى فى الأساس تنتجها شركة تسمى بيكان فى إيران، وحتى الآن احاول البحث عن الأصل الفنى لهذة السيارة الاخرى لكنه محصور بين جنرال موتورز ورينو، لأن بيكان كانت تحصل على تصميماتها من هذة الشركات،المهم ان شركة خودرو المنتجة للسيارة RDالمسماه فى بلدنا ROA قامت بتعديل الشكل الخارجى للسيارة بيكان لتصبح من الخارج نسخة طبق الأصل من البيجو 405 مع الاحتفاض بكافة التفاصيل الميكانيكية للسيارة بيكان كما هى فى الشكل المعدل، اى ان الإيرانيين لم يقوموا بتطوير ال 405 لتصبح دفع خلفى ، ولكن قاموا بتطوير سيارة دفع خلفى لتصبح بيجو 405(من الخارج فقط)
ارجو ان كلامى لا يفهم منه اننى امدح او اذم فى السيارة ROA فانا لم اعنى اى منهما وانما مجرد اسرد بعض الحقائق، فقط اللى عايز اقوله ان سياسة الشركات الإيرانية فى تصنيع السيارات حتى الآن تقوم على الحصول على تصميمات من الخارج، مثلهم فى ذلك مثل الأتراك وجنوب افريقيا وهى الدول التى تسبقنا بخطوة واحدة فى مجال صناعة السيارات حيث انها تقوم بناء اشكال خارجية خاصة بها على سيارات قديمة مصممة بمعرفة شركات عالمية(نفس ما قام به البولنديين حينما حولوا الفيات 125 الى بولينيز، والأتراك بال131 التى حولوها الى شاهين بمعونة فيات، والروس حين حولوا الفيات 124 الى لادا ايضا بمعونة فيات، وهكذا)، لكن لم تصل شركات السيارات الإيرانية بعد ان ان تقوم بتطوير ضخم من نوعية تحويل سيارة جر امامى الى دفع خلفى، فمن لديه مثل هذة القدرة لن يحتاج الى تصميمات من الخارج اصلا، ولا زال الإيرانيين امامهم مرحلة أخرى قبل الوصول الى هذة الدرجة من الخبرة ، هى بناء سيارات خاصة بهم ممعتمدة على مجموعة من التصميمات من شركات عالمية ولكن مصممة خصيصا لهم، وهى المرحلة التى تمر بها الصين وماليزيا حاليا وتخطتها كوريا منذ سنوات قليلة جدا، وبالتالى فايران لا تزال بعيدة عن مثل هذة التغيير الضخم فى ميكانيكا سيارة،

طبعا ساجد من الردود من يحدثنى عن ثورة ايران الصناعية والقنبلة النووية والكلام الكبير دا كله ، فارد عليه ببساطة واقول ان كل هذا لا يخصنى، انا بتكلم عن واقع الحال عند منتجى السيارات الإيرانيين من واقع ما اراه من منتجاتهم، حيث ان التقدم فى تكنولوجيا تخصيب اليورانيوم لا يعنى بالضرورة التقدم فى امكانية انتاج سيارة بتصميمات محلية وتكلفة اقتصادية وقدرة على المنافسة فى الأسواق العالمية ، ولعل روسيا وباكستان والهند مثال واضح لذلك، لذلك لا يجب ان نحمل الأمور اكثر من نصابها، اقصى امكانيات الشركات الإيرانية فى تصميم السيارات فى الوقت الحالى هى تعديل الشكل الخارجى

السلام عليكم ورحمة الله وبركاته
اولا نشكر الاستاذ سبعاوى على التوضيح اللى قاله عن البيجو الايرانى
بصراحة انا فرحت اول ما لقيت اسم سبعاوى فى منتدى البيجو قلت اخيرا انا كان نفسى حد من اهل الخبرة فى المنتدى اللى الناس بتثق فى كلامهم يتكلم عن العربية على الرغم من ان العربية بقالها معايا اكتر من شهرين اهو ولكن الحمد لله لسه برضه محستش باى حاجة مش كويسة فيها ...
لكن برضه راى اهل الخبرة بيطمن الناس .
لكن مش زى ماتوقعت استاذ سبعاوى تدخل فى مناقشة عن الفرق بين ايران والدول النامية والدول المتقدمة وصناعة السيارات فى ايران وتركيا ودول الصف التانى وازاى ان البيجو الايرانى دى تطوير لعربية قديمة مالهاش علاقة ببيجو زى الشاهين مالهاش علاقة بالريجاتا وان ايران طورت شكل بس .
جميل يا استاذ سبعاوى واتفق معك نحن لايخصنا ولا يهمنا الحديث عن ثورة ايران الصناعية والقنبلة النووية (على الاقل ونحن بصدد الحديث عن سيارة ايرانى) وان كان يخصنا فى احاديث اخرى .
ولا يهمنا ان نعرف ترتيب ايران فى قائمة الدول المصنعة للسيارات حتى وان كانت فى آخر القائمة .
وايضا ان كانت البيجو الايرانى اخذت نضام سيارة قديمة مثل البيكان او غيرها حتى ولو كانت تطوير للسيارة سيات 133 -على فكرة انا مش بغلط فى السيات- وقاموها بتطويرها والبسوها رداء البيجو 405 كل هذا لا يؤثر فى وجود السيارة بيننا وفى شوراعنا بالفعل الان فهى اصبحت امر واقع هى السيارة بيجو 405 roa .
لذلك كل ما يهمنا ويهم المستهلك فى مصر هو معرفة هل العربية حلوة ولا وحشة ، موتورها جامد ولا اى كلام ، بتسحب وبتجرى ولا عربية عبيطة ، ان شاء الله الموتور ده فى المستقبل هيبقى صيانته سهلة ولا هيكون زى عربيات كتير انقرضت بسبب ان محدش بيحب يشتغل فيه ، قطع غيارها هتكون متوفرة ورخيصة ولا هنلف وندوخ عليها ، معمرة ولا بتبوظ بسرعة ، عفشتها نوعها كويس ولا مش بتستحمل ، اتزان العربية حلو ولا تعبان ، كماليات العربية وامكانياتها تستاهل تمنها ولا كتير عليها ، اداء العربية بشكل عام ايه حكايته؟ وغير كده كتير من الحاجات اللى تهم الناس فى اى عربية.
طبعا انا مش بطلب من حضرتك او من اى حد يجاوب على الحاجات دى لان معظمها مش هيبان غير بمرور الوقت وبالتجربة لكن عايز اقول هو ده اللى يهمنا ويخصنا فى العربية حتى لو العربية دى انتاج الصومال او انتاج دولة مالهاش فى العربيات اساسا .
عايزين اراء تقولنا من الاخر العربية دى حلوة وتستاهل نشتريها ولا لا وايه الاسباب بعيدا عن تاريخ ايران خودرو وتاريخ ايران وان كان طبعا التاريخ ده كله هيعرفنا الشركات دى ليها فى انتاج السيارات وعندها خبرة او معندهاش انتاجها ناجح ولا لا طبعا كل ده حلو بس برضه بقول ان اللى يهمنا هو العربية اللى بين ايدينا دلوقتى اللى بقت خلاص عربية مصرى تحمل ملاكى القاهرة او اى محافظة وماشية فى شوارع مصر .
آسف للاطالة وشكرا للاستاذ سبعاوى وشكرا لجميع اعضاء هذا المنتدى المحترم .

العضو الفاضل وليد عباس

شكرا جدا لاهتمامك بالرد على رسالتى ، بالطبع انت لك وجهة نظرا لها وزنها فيما يهمنا معرفته عن السيارة

لكن انا فيما يختص بمعلومات الاداء والصيانة للسيارة هتلاقينى واقف جنبك فى صف المنتظرين للحصول على المعلومة،

انا حتى هذة اللحظة لم تتح لى فرصة التعامل معها سوى برؤيتها من الخارج فقط وكان انطباعى الوحيد عنها ان عرضها اقل شوية من ال405 القديمة

لكن حت هذة اللحظة لم تتح لى حتى تجربة قيادة لها حتى استطيع ان اكتب تقريرا عن ادائها، وكذلك معنديش اى معلومات عن العمر الإفتراضى المتوقع لها،

لكن انا كان قصدى بمداخلتى البسيطة ان اوضح ما لخصته فى جملة واحدة

ان هذة السيارة ليست بيجو 405 معدلة للجر الخلفى، ولكن هى سيارة جر خلفى معدلة لتشبه البيجو 405

وهى مجرد معلومة اضعها فى حسبان من يفكر فى شراء الROA ، انه مينفعش يشتريها قياسا على سمعة ال405،
ولكن يشتريها بناء على ما يجمعة من معلومات من معارفه واصدقائة والشبكة الدولية بعيدا تماما عن اى شئ له علاقة بال405 القديمة

زى مثلا تخيل من 15 سنة لو واحد كان بيفكر يشترى الشاهين، شبيهة الريجاتا، قياسا على سمعة الريجاتا،انا امتلكت دى وامتلكت دى وأوكد انهما بعيدتين كل البعد عن بعض فى كل ما له علاقة بالأداء

إعتبار تشابه الشكل الخارجى مصدر لأى حيثية للحكم على تشابه معايير الأداء والصيانة هو اسلوب خاطئ تماما لدعم التخاذ القرار، وهو ما اهتممت ان اوضحه لأن هذة هى حدود معلوماتى فى الوقت الحاضر، ان شاء الله بمرور الزمن وتوافر السيارة واتاحتها لى للتجربة سأستطيع اضافة المزيد من المعلومات

برضه احب أوكد تانى انى لا اذم فى السيارة ROA ولا امدح فيها، انا لسة معرفش عنها حاجة سوى ما ذكرته من معلومات موجودة على الشبكة الدولية، وحينما تتاح لى الفرصة لمزيد من المعرفة سيكون لى بعض القدرة ان امدح او انتقد

شكرا على التوضيح وعلى سرعة الرد
وانا ايضا معك لا امدح فى السيارة ولا اذم فيها وكتبت قبل كده راي فى اداء العربية واللى قدرت احكم عليه منها فى الوقت الحالى والباقى طبعا هيبان مع الوقت.
واتفق معاك ايضا ان بالتاكيد من قبل مانشوف العربية هى عمرها ماهتكون نفس ال 405 القديمة مع تعديل من جر امامى لدفع خلفى لا طبعا الموتور الدفع الخلفى اكيد مختلف كليا عن الجر الامامى وايضا الات الجر ونظام التعليق والعفشة وده شئ طبيعى بس المهم اللى عايزين نعرفه بعد كده هل فعلا الموتور ده كويس والات الجر والتعليق كل ده كويس ولا اى كلام سواء كان من انتاج شركة بيجو او غيرها المهم النتيجة وربنا يسهل ويبان بمرور الوقت.
وربنا يوفقنا ويجمعنا على الخير ...

مبدئيا انا لا بدافع عن المنتج الايراني ولا ضده علما باني راكب عربية ايراني بس حبيت اكد المعلومة المختلطة علي ناس كتير للاسف وهي ان البيجو روا او ال 405RD (علي فكره الاسمين بتوع ايران خودروا مش بتوع الاباظية) مذوده بمحرك غير معروف !!!
علي عكس البيجو 405 بارث المذوده بمحرك XU7JP/L3 وهو محرك من تصميم وانتاج شركة بيجو

مرفق بيان باكواد محركات بيجو بمواصفاتها والموديلات التي استخدمت فيها ونظام تغذية الوقود

اكواد محركات بيجو

البيجو 405 ... التي تنتج بواسطة شركة ... أيران خودرو ... تباع أيضاً فى إبران .. تحت نفس المسمي ROA ... مرفق صورتين للعربيه أثناء عرضهم ب أيران ...

أما عن البجو بارس ... فدى أنا سئلت الوكيل مباشرة ... عنها ... وكانت الأجابه أنها فرنساوي ... تقفيل مصري .... مش إيراني ... وده كان من حوالي 4 شهور فى يناير 2007 .... لكن ممكن يكونوا غيروا رأيهم ... وهيجمعوها فى إيران ... الله وأعلم ... ومرفقBrochure ... الخاص بالعربيه البارس PARS

تحياتي للجميع ...

م/ حسام منير

أشكر كل من شارك في هذا الموضوع

وفعلا منقدرش نحكم عليها من مجرد منظرها
لكن لو حد موجود هنا وإشتراها ممكن يتكلم عن ملاحظاته عليها
سعرها كام ضمانها كام إحساسه بقوتها أيه
وشكرا
:D

اكيد قاعده العجلات او الشاسيه بتاع بيجو علشان عمرهم ما يقدرو يحطو كلمه بيجو او الاسد بتاعها علي عربيه مافيش منها حاجه من بيجو علي الاقل خالص الشاسيه بتاع بيجو

شكرا لكل الناس اللى اهتمت وبتحاول تعرف اخبار عن البيجو الايرانى .
وشكر خاص للاستاذ وائل مجدى ابو نورا مش عشان شارك فى منتدى بيجو بس لا لان الراجل ده انا بحترمه من زمان وطبعا احترامى لكل اعضاء المنتدى ايضا
وحبيت اضيف معلومة ان البيجو 405البارس غير 405الروا لان البارس فعلا موتورها فرنسى بس الله اعلم الموتور تصنيع ايرانى او تقفيل ايرانى او تصنيع فرنسى بالكامل وطبيعى انه يكون بيجو لانه جر امامى وبيجو مواتيرها امامى يبقى ايه اللى يخلى ايران خودرو تجيب موتور من بره زى ماعملت فى الروا لان مفيش مواتير دفع خلفى فى بيجو (ومش معنى انه مش بيجو يبقى وحش ولا برضه انه يكون كويس) لكن كمان عايز اقول ان البارس ايرانى فعلا وهتتجمع فى مصر يعنى هتبقى فرنسى تعديل ايرانى تجميع مصرى
(والتعديل الايرانى فى الشكل وكمان فى الموتور والموتور ده احسن من اللى كان فى البيجو ال405 القديمة)
ده على حد علمى والكلام اللى سمعته من التوكيل ومواصفات الموتور وانه كمان كان نازل فعلا فى ال 406.

فرنساوي
تعديلايراني
تجميع مصر
يا للهول

اقتباس:

---

ده على حد علمى والكلام اللى سمعته من التوكيل ومواصفات الموتور وانه كمان كان نازل فعلا فى ال 406.

---

لو تقدر تقول مواصفاته اية و كان نازل فى موديل كام يبقى كتر خيرك

بصراحة اللى وصلنى من مواصفاته مش اكتر من كلام من التوكيل وعلى موقع ايران خودرو http://www.ikco.com/products/pars.aspx وهو انه 1600 و100 حصان وبقية مواصفات العربية كتبتها فى موضوع تانى عن البارس على نفس المنتدى اما بالنسبة لان الموتور تزل فى ال 406 ايوة نزل فى موديلات من 96 ل 98 ونزل فى 405 البرستيج .

اقتباس:

---

المشاركة الأصلية كتبت بواسطة waleedabbas

شكرا لكل الناس اللى اهتمت وبتحاول تعرف اخبار عن البيجو الايرانى .
وشكر خاص للاستاذ وائل مجدى ابو نورا مش عشان شارك فى منتدى بيجو بس لا لان الراجل ده انا بحترمه من زمان وطبعا احترامى لكل اعضاء المنتدى ايضا.

---

انا بشكرك علي الاطراء الرقيق ده واتمني اني اكون عند حسن ظنك وظن الاعضاء بيا ، ربنا يجمعنا دايما في الخير وعلي الخير ان شاء الله

اما بخصوص استخدامات محركات البيجو الرابط ده عبارة عن قائمة بمحركات بيجو وموديلات السيارات المستخدمة فيها

[web:520e4e4c37]http://www.clubpeugeotuk.org/articles/peugeot_engine_codes.html[/web:520e4e4c37]

بمراجعتة هتلاقي ان المحرك ده في صورتة الاولي استخدم في البيجو 405 و406 بداية من عام 92 لل 405 وفي عام 96 في 406 وفي كلا الحالتين


XU7JP 92-96 405 GRX (Automatic) 1761 EFI Bosch 103hp
ديه النسخة الاولي من المحرك واستخدمت من 92 ل 96 في الموديل 405GRX مذود بمغذي وقود اليكتروني (EFI) من بوش وقدرة المحرك 103 حصان وسعتة 1800 سي سي

XU7JP4/L 96- 406 16V SL,ST 1761 EFI Bosch MP5.1.1 110hp
ديه النسخة التانية منه والواضح من كود المحرك انة نسخة معدلة من المحرك الاصلي واستخدمت فى 96 في الموديل406 مذود بمغذي وقود اليكتروني (EFI) من بوش وقدرة المحرك 110 حصان وسعتة 1800 سي سي

وبناء علي ذلك فالمحرك XU7JP/L3 هو نسخة مطورة من المحرك XU7JP المستخدم في 405.
Type of Engine : XU7JP/L3
Displacement : 1761 cm3
Maximum Power : 100 HP at 6000 rpm
Maximum Torque : 15.3 Kgm at 3500 rpm
Fuel Supply : Injection system
Speed : 186 km/h
Acceleration : 0 to 100 kph at 11.8 seconds

وبالتالي المحرك XU7JP4/L4 نسخه معدلة من المحرك XU7JP4/L المستخدم في 406
Type of Engine : XU7JP4/L4
Displacement : 1761 cm3
Maximum Power : 110 HP at 5500 rpm
Maximum Torque : 155 Kgm at 4250 rpm
Fuel Supply : Injection system
Speed : 192 km/h
Acceleration : 0 to 100 kph at 11 seconds

الإخوة الكرام

أنا لا أظن أن السيارة لاتمت للبيجو بصلة
أمال ليه مكتوب عليها بيجو وعليها من جوه أسد بيجو
أكيد ده تابع لبيجو وإلا كانت الدنيا أتقلبت وقالوا إن إيران سرقت العلامة التجارية لبيجو
إذن هي تبع بيجو والتعديل ده ممكن متفق عليه أو إشتروا خط الإنتاج وأصبح عندهم حق التغيير في الأساسيات مع الإحتفاظ بالعلامة التجارية

والله أعلم
م/أحمد :D

كلامك سليم طبعا ياباشا
وان اراء كتير بتقول ان الموتور ده مش بيجو فده لانه مش انتاج شركة بيجو الام لكنه خلاص دلوقتى نزل فى عربية بتحمل اسم بيجو ومن تصميم بيجو وموديل معروف جدا فى البيجو يبقى خلاص بقى موتور بيجو والشركة المنجة ليه هى مش مجرد وكيل لبيجو لا شركة ايران خودرو هى امتداد لشركة بيجو الفرنسية فى ايران يعنى فرنسا نفسها بتستعين بيها فى انتاج بعض الموديلات وبعض قطع الغيار وبيجو الام ادت لبيجو الايرانية حق اناج العربية دى بعد الموافقة على التعديلات اللى تمت فيها والا كان مستحيل تسمح ان اسم بيجو ينزل عليها ايوة طبعا مفيش تهريج مع الشركات الكبيرة دى .

والدليل كمان ان زى ماقلت قبل كده ان الصفقة بين وجيه اباظة وايران خودرو مكنتش من طرفين بس لا كان فى طرف تالت وهو شركة بيجو الفرنسية واللى تعهدت بان العربيات الايرانى دى مسئوليتها وكأن العربيات دى خارجة من فرنسا مش من ايران .
على فكرة الكلام ده مش فتى ده كلام بجد على لسان الاباظية نفسهم.
يبقى مين بقى يقدر يقول ان العربية دى مش بيجو او مالهاش علاقة بالبيجو اه هى مختلفة عن ال 405 القديمة ويمكن مالهاش علاقة بيها غير فى الشكل الخارجى والصالون لكن هى بيجو موتورها مانزلش فى بيجو قبل كده لكن خلاص اهو نزل زى اى موديل جديد.
يعنى العربية بقت بيجو حتى ولو كانت مش مصنعة فى فرنسا لكنها مصنعة فى مصنع تابع لبيجو تحت اشراف بيجو ( وبارادتها مش غصب عنها ) زى اى شركة متعددة الجنسيات بتنتج فى دولة فى العالم لكن المنتج بيحمل اسم و تحت اشراف الشركة الام ومحدش يقدر يقول ان المنتج ده مش بتاعها .
انا مش بدافع عن العربية ممكن بعد كل ده تكون العربية زى الزفت وده شىء عادى مفيش ماركة عربيات معملتش عربية ومفيهاش عيوب لكن انا كل اللى اقصده ان سواء العربية حلوة او وحشة مفيش حد او اى عقل يقدر ينكر انها بيجو وباسم بيجو او ان ايران هتنتج العربية بدون علم فرنسا وهتسكت والامور تمشى عادى كده.

بالبحث عن كود الموتور وجدت أنه من إنتاج بيجو سنة 1997
ومستخدم في بيجو 306 موديـــلات من 1997 إلى 2001

إذن العربية فرنســـــــــــــــــــــ ـــــــــــــــــاوي تجميع إيراني
كود الموتور المركب في 405 الإيراني هو Type of Engine : XU7JP/L3
والكلام ده من مــــــــــــــــــــــــ ـــــــــــــــــــــــــ وقع خودرو
http://www.ikco.com/products/405.aspx
وإليكم لينك الموقع الذي وجدت عليه كود محرك البيجو 405 التجميع الإيراني وأين كانت تستخدمه شركة بيجو
http://mypugclub.tripod.com/id23.html

أظن الأمور أصبحت واضحة العربية بيجو والتعديل فيها بيجو برضه والتجميع في إيران
والله أعلم
م/أحمد :D

هل من الممكن تغيير كامل المجموعة للسيارة 405 روا يعني موتور دفرانسة كورانة حيث يقال ان مجموعة تويوتا جر خلفي يتركب عليهابدون تعديلاتكثيرة عليها ارجو الايضاح و لكم الشكر