موضوع مهم جدا لكل مالكي سيارات بروتون

**spiderloking** · 08-09-2010 06:06 PM

عاوز اقول نصيحه لأي حد يا جماعه حاولوا مش تدوروا العربيه ايلا لما لمبة الاير باج تطفي علشان ده غلط علي العربيه و ساعات ممكن مش تدور معاك من اول مره يعني اول ما تفتح الكونتاكت سيب العربيه حوالي 5 ثواني و بعدين ابدأ دور العربيه مش اول ما تحط المفتاح تقوم مدور علي طول علشان غلط ياريت يا جماعه كلوا ياخد بالو من اللحته ديه.

واللي مش عارف شكل اللمبه ديه يا جماعه هتلاقوها في الصوره ديه هتلاقوا لمبه زرقاء لمبه الاير باج هيه اللي علي يمينها و هيه لونها احمرو علي شكر شخص قاعد علي كرسي و في زي بالونه منتفخه قدامه

و ياريت يا جماعه نسمع اّراء الاخوه الكرام في الموضوع ده و نشوف لو في حد كان عندوا مشاكل في تدوير العربيه يجرب الطريقه ديه و يقولنا حصل ايه معاه

**midosalah** · 09-09-2010 01:30 AM

طيب ايه السبب؟؟؟

**M.almaghraby** · 09-09-2010 01:33 AM

ليه غلط؟

انا عامة بعمل كدا فعلا بستني لحد ما اللمبات تطفي

**araouf222** · 09-09-2010 02:05 AM

اهم حاجه من كل ده ان طلمبة البنزين تكون اشتغلت و دي حتعلرفها اول ما المؤشر يديك مكان البنزين الباقي مش مهم

**spiderloking** · 09-09-2010 07:08 AM

يا جماعه انتوا ناسيين ان العربيه كلها شغاله علي نظام كمبيوتر و كدا طبعا انا مش خبير في الموضوع ده اوي بس انوا العربيات الجديده بتبقي شغاله زي نظام الكمبيوتر و مينفعش انك مثلا تيجي تشغل الكمبيوتر بتاعك علي طول و بعدين تفتح كذا حاجه في نفس الوقت اكيد هيهنج و هيحتاج ريفريش ده نفس النظام

**أبومعاذ** · 09-09-2010 08:47 AM

المشاركة الأصلية كتبت بواسطة araouf222

اهم حاجه من كل ده ان طلمبة البنزين تكون اشتغلت و دي حتعلرفها اول ما المؤشر يديك مكان البنزين الباقي مش مهم

فعلا هو دا سبب الانتظار إن تكون طرمبة البنزين حضرت ودخلت شوية البنزين بتوع الدوارة

**ahmadelsaeed** · 10-09-2010 01:50 AM

المشاركة الأصلية كتبت بواسطة m.almaghraby

ليه غلط؟

انا عامة بعمل كدا فعلا بستني لحد ما اللمبات تطفي

أنا برده بعمل كده على الرغم من إنى مش عارف ليه

**mostafashokry** · 10-09-2010 02:03 AM

المشاركة الأصلية كتبت بواسطة araouf222

اهم حاجه من كل ده ان طلمبة البنزين تكون اشتغلت و دي حتعلرفها اول ما المؤشر يديك مكان البنزين الباقي مش مهم

و تسمع صوت تحضير الطلمبه (زنة) لمدة ثانتين

**msafa** · 10-09-2010 03:35 AM

ايوة ايوة
هي الزنة دي
انا عارفها :)

بس عموما في ناس كتير بتاخد موضوع لمبة الايرباج كمؤشر عشان انا مثلا قعدت اسبوع عشان آخد على موضوع الزنة دي و مكنتش بسمعها خالص