امكانية تركيب انجكشن لفولفو 244 gl موديل 80

**Abdoart** · 12-03-2008 03:09 PM

كنت عايز اعرف مومكن اعمل حاجة للفولفو 244gl 80 علشان توفر فى البنزين هل مومكن اركب انجكشن او اى حل تانى

**SEATLOVER** · 12-03-2008 03:32 PM

اعتقد لو موديل العربية بتاعتك نزل منة بعد كدة بانجيكشن فدة ممكن ..غير كدة ما انصحكش هاتدخل فى قصة كبيرة .. وشوف اللينك دة ممكن يفيدك جداً
http://www.nilemotors.net/Nile/showt...E4%CC%DF%D4%E4

**Xpert** · 12-03-2008 03:37 PM

بص يا مان .. احنا لينا معارف بيجيبوا ساعات قطع غيار فولفو ....
انت احسن حاجه تعملها ... تجيب موتور كامل انجكشن (مش غالي للدرجه يعني ) ... في نفس الوقت هاتجيب مكنه احدث شويه ....
هاتتعب في توصيل الموتور مره .. بس بعد كده تمام (ده غير انه هايلغيلك البيك بتاع التكييف اللي تمنه شيء و شويات و مش موجود ... و التكييف هايشتغل علي كونترول الانجكشن .. هيص يا عم ههه)

**Abdoart** · 12-03-2008 04:13 PM

شكرا يا باشا على المعلمات الغلية دة بس عايز اسال المتور دة يتكلف فى حدود كام وهل هغير اية تانى فى العربية علشان التعديل دة والمكنة الجديدة مقرفة فى اية فى تركيبها

**Xpert** · 12-03-2008 04:26 PM

انا مش خبير فولفو (ماتتخدعش بالاسم هههه) بس هاقولك علي النظام عامه ...
انت هاتجيب موتور بفتيسه ده في سكه ال 5000 جنيه ... هاتجيبها بفتيسها طبعاً و او عرفت تجيب الكرونه تقي كده برنس خالص ...
اول حاجه تعملها تفك الفتيس تكشف علي طقم الدبرياج و تركبه تاني . بعد كده تبص علي الكارتيره تحت احسن تطلع مشروخه او حاجه ( اللي باقولهولك ده من واقع تجربتي اللي عايشها حالياُ بس انا في بي ام 6 سلندر ) ..... هاتفك البوجيهات و شوف حرق البوجيه عامل ازاي ... و ارجع قفل ( لو عاوز زياده ضمان بقي ... تفك الكارتيره و تفك ركبه كرنك و تكشف علي لقمه سبيكه .. شوف الحياه فيها عامله ازاي و ارجع قفل تاني .. بس ماتقولش لحد علي الحركه دي ;) ) ...
نيجي نركب في الحوض : تجيب ميكانيكي يفك طبعاُ المكنه و يراجع و يظبط الليله ... تفك المكنه اللي عندك و تركب الجديده بفتيسها .. الاختلافات بقي ممكن تطلع في القواعد الالومونيوم بتاعه الموتور دي ممكن تركب القديمه بتاعتك او ممكن تعملها قاعديتين حديد اخر ما تغلب .. و الفرق ده ممكن يظهر لو الموتور مش من علي نفس موديل عربيتك ... تاني حاجه ممكن تفرق معاك قواعد الفتيس .. و ممكن طول الكردان (كل دي محلوله مش صعبه يعني .. انا اخر ما غلبت رحت عملت قاعده حديد للفتيس و الفتيس راكب حالياً علي قاعدتين موتور بتوع فيات 131 ... ) ...
و في الاخر هاتجيب كهربائي يوصلك الليله بتاعه الانجكشن و خلصت الحكايه ....
(ده لو انت بتتعامل مع ميكانيكيه غير متخصصين ... عم عبده الميكانيكي اللي علي اول الشارع ... انا باعمل الحوار ده في بني سويف و طبعاُ انت عارف محدش هنا بيفهم اي حاجه في البطيخ .. و حالياًُ الموتور راكب مستني البيه الكهربائي هايجيلي ...) ...
لو اتعاملت مع متخصص فولفو هوه بيكون فاهم كل حاجه .. و يقدر يأكدلك وجود اختلافات من عدمه ... و يقدر يدلك علي المظبوط ...و غالباً بياخده المكنه تركيب و دواره كمان ...

**Abdoart** · 12-03-2008 09:05 PM

معلش يا باشا تعبتك معايا اوى شكراا اوى اوى

**piezo** · 13-03-2008 09:41 AM

طيب انا ممكن افيدك في الموضوع ده علشان معانا فولفو 740 واعرف ميكانيكي متخصص فولفو بس بس الراجل ده في الجراش بس انا مش عارف ده قريب ليك ولا لا علشان مش عارف انت ساكن فين
فلو كده احنا برده كنا عايزين نغير من كربرتير لي انجكشن فاقولنا نشوف مكنه كامله احسن و نريح دماغنا فالقينا مكنه مش فاكر كام سي سي و تربو اورجينال بتاعها المكنه عامله 5000

**Xpert** · 13-03-2008 04:46 PM

ياللا يا عم .. انتو ال 2 كده خدوا بعضكم هاتو 2 موتور زي بعض و ركبوه عند نفس الراجل ... التاجر هايعملكم تخفيض جمله و الميكانيكي برضه هههه

**maraaawan** · 14-03-2008 01:45 AM

ياباشا لو انت من سكان القاهرة نصيحة مهمة جدا خد عربيتك وروح شارع شامبليون اسئل على ابو خالد الكبابجى قبل منة فى قهوة اسمها التكعيبة فى هناك ملوك الفولفو فى مصر بمعنى الكلمة هاتعرفهم لوحدك حتى من غير ما تسال هاتلاقى بتاع خمسين ستين عربيه فولفو من كل الموديلات واقفين يمين وشمال هاتعرف انهم دول اللى بقولك عليهم دول هايعملولك كل حاجة فابريقة شغل بتاع بلادة والفلوس فى الجنين موووووووت وهاتدعيلى يلا اى خدمة

**sab3aawy** · 15-03-2008 05:44 PM

المشاركة الأصلية كتبت بواسطة maraaawan

ياباشا لو انت من سكان القاهرة نصيحة مهمة جدا خد عربيتك وروح شارع شامبليون اسئل على ابو خالد الكبابجى قبل منة فى قهوة اسمها التكعيبة فى هناك ملوك الفولفو فى مصر بمعنى الكلمة هاتعرفهم لوحدك حتى من غير ما تسال هاتلاقى بتاع خمسين ستين عربيه فولفو من كل الموديلات واقفين يمين وشمال هاتعرف انهم دول اللى بقولك عليهم دول هايعملولك كل حاجة فابريقة شغل بتاع بلادة والفلوس فى الجنين موووووووت وهاتدعيلى يلا اى خدمة

بس اهم حاجة اوعى تاكل من عند ابو خالد الكبابجى لحسن بقى غالى موت، لسة واكل عنده ربع طرب وربع كبدة من غير لا شربة ولا رز ولا اى حاجة اول امبارح ودافع 40 جنيه على حسرة ايه مش عارف :)