لمبة على شكل مفتح انجليزى نورت عندى فى التيجو انا سمعت ان اللمبة دى بتاعة صيانة5000كم بس انا لسة الصيانة هعملها عند6000كم لانى عملت صيانة 1000كم عند 2000كم يجرى حاجة لو سبتها لغاية معمل صيانة 6000كم...وشكرا
عرض للطباعة
لمبة على شكل مفتح انجليزى نورت عندى فى التيجو انا سمعت ان اللمبة دى بتاعة صيانة5000كم بس انا لسة الصيانة هعملها عند6000كم لانى عملت صيانة 1000كم عند 2000كم يجرى حاجة لو سبتها لغاية معمل صيانة 6000كم...وشكرا
السلام عليكم:
لن يحدث اي شيء لو تركتها منورة ولو عاوز تطفيها اعمل الآتي:
1- خلي العربية مطفية ودوس على الزر الموجود بالعدادات بإستمرار
2- شغل الكونتاكت والعربية وانت لسة دايس على الزر
3- شوية وتلاقيها طفت
لكن نصيحة لك من واحد مجرب....بلاش تأخر الصيانات دي بالشكل ده
وكمان التوكيل بيحسب الضمان على الوقت مع الكيلومتر بتاع العربية
يعني ممكن لا قدر الله لو حاجة باظت داخل الضمان وانت بتروح متأخر كدة يتلككلك ويقولك بتيجي متأخر....حصلت مع زميل هنا بالمنتدى
انا معايا التيجو وبروح اعمل الصيانة في الوقت برغم ان الكيلومتر اقل
م.ياسر
اله الاوبشن ده انا اول مرة اسمع انه العربية بتفكرك بمواعيد الصيانات... انا داخل اصلاً اقوله دي لمبة ال check engine وروح اكشف
طب بعد ال50 الف كيلو ايه بقى؟ بتبقى لمبة كده مطفية في التابلوه وخلاص؟
فعلا ابو الفتوح دلوقتى ساعت الجد حيقولك معلش انت طلعت برره الضمان مع العلم انك منتظم فى الصيانات طبقا للكيلومترات
حيقللك لا انت مش منتظم حسب ال المده
وده حصلت مع ناس كتير اعرفهم
يعنى من الاخر لبسه فى الضمان
ياجماعة انا العربية عملت 2000كم فى اقل من شهر ودلوقتى 5100 كم وبرضوة اقل من شهر يعنى لسة المدة لم تنتهى انا قصدى فقى مشاكل فى اللمبة دى يعنى فى مشكلة فى العربية ...وشكرا
السلام عليكم
ياسيدي قولت لحضرتك مافيش مشاكل انها منورة
لكن الضمان اللي معاك بيقولك تروح الصيانات في مسافات معينة أو أزمنة معينة (أيهما اقرب)
يعني لو حضرتك عملت 1000 كم في اسبوعين يبقى لازم تروح صيانة الألف
عملت 5000كم في شهر يبقى لازم تروح صيانة ال5000 وهكذا.....
أنا بأنصحك لله لو مش عاوز تاخد بنصيحتي طبعا حضرتك حر
م.ياسر
موضوع لمبة تفكرك بالصيانة ده موجود في عربيات من 10 سنين .. و بيفضل شغال طالما العربية عايشة
مافيش حاجه اسمها عملت صيانة الألف فحاروح بعد 5 اللي هو 6000 كيلو !!! صيانة ال 5000 عند ال 5000 بعد 4 من صيانة الألف
خلي بالك من المواعيد عشان ابو الفتوح ما يتلككش و نصيحتي اعمل الصيانة ف ابو غالي احسن و احجز بالتليفون قبلها باسبوع
بس علي فكرة انا هحكي اللي حصل معايا ....
انا طبعا بعمل زي الاخ اللي بيسأل... يعني بروح بعد 5000 من اخر مرة سواء بقي حروع علي 16 الف ولا لا .... بمعني عملت صيانة 1200 و 6500 و 12000 و اخيرا قبل العيد كنت بحاول احجز ال 15 علي 16500 كيلو .....
طبعا قالولي مفيش مواعيد و شرفنا بعد العيد ....
انا سافرت الساحل من يوم الاربعاء اللي قبل العيد و رجعت امبارح ..... فقلت لنفسي هطنش و مفيش مشكلة لان ابو غالي مش ملتزم بالبند السخيف بتاع كل 3 شهور
المهم و انا في اسكندرية و معايا مراتي و بنتي و اختي و جوزها و ولادها الاتنين .... عملت نقاوة حركت الدينامو الشهيرة .... التابلوه جالو تخلف و افتكر نفسه رقاصة ... فانا عرفت ان الدينامو فصل ... و كنت في محطة الرمل ... قمت راكن العربية و كلمت الانقاذ بس الساعة كانت 12:30 و طلعو بيشتغلوا من 8 ل 8 .... فقالولي هيبعتولي حد تاني يوم ....
سألتوا طب فين التوكيل قالي في شارع اسمه كليه الطب...... سألت الناس اللي في الشارع اللي انا راكن فيه اسمه اي طلع بالصدفة هوه شارع كليه الطب :)
تاني يوم رحت مواصلات من الساحل لحد العربية و كلمت الانقاذ و قالولي هنكلمك تاني و نقولك ايه الموقف ....
قمت انا معدي علي التوكيل سألت علي الدينامو قالولي مش متوفر .... سألتهم صب انا حصل كذا و كذا ... اعمل ايه ... قالولي هات العربية طالما جنبنا و ان شاء الله نشوف فيها ايه ...
رحت دورتها طلعت اصيلة و دارت و وديتها المركز "تكنو سيرفس- ابو الفتوح" و جالي المهندس محمد جلال تقريبا ... سألني علي دفتر الضمان .. و بص لقاني مش عامل صيانة ال15 و العربية عاملة 17500 ... قلتلوا انا بصين في ابو غالي و مفيش مواعيد قبل العيد و حكيتلو... الراجل متأخرش و عمل جوب للعربية و دخلت تتفحص و تعمل صيانة ال15" تغيير بوجيهات و فلاتر بنزين و هوا و تربيط بمبلغ 287جنيه"
وانا هناك في المركز بتوع الانقاذ كلموني في التليفون و لاقيتها بتقولي احنا اسفين ان الدينامو مش موجود و حضرتك تستني في التوكيل ليوم الحد ؟؟؟... قلتلها يا ماما انا قاهري و لازم اروح قامت قالتلي طب انا ممكن اخليهم يشوفوا الدينامو لو ينفع يتصلح ... قلتلها ده دينامو يعني مش فارقة يتصلح يتغير مهو كدا كدا هيبقي في الضمان ....و قلتلها بس انا في التوكيل فعلا و يا ريت بسرعة ...
فعلا متأخروش و لقيت واحد جه و قالي حضرتك استاذ محمد قلتله ايوه قالي طب الدينامو هيتصلح فعلا
......
الحمد لله الدينامو اتصلح فعلا لان طلع بس الشربون خلصان "العربية بقالها سنة بالظبط"
كنت اشتكيتلهم من ان علبة الميه بتاعت الردياتير"العلبة البلاستيك" بتنفس .... طلعت مشروخة و قالولي هنطلبها و تيجي الحد ... قلتلهم انا في القاهرة ..قاموا طلبوها للعربية و اركبها في زيارة للتوكيل هنا ان شاء الله "في القاهرة ....
ولا فرق اني معدي 3 شهور
ولا فرق اني عامل 17500 بدل 15000
الحمد لله الدينامو بقي تمام" ميفرقش جديد ولا متصلح ده صيانة الدينامو اساسا عملية تافها بيعملها الكهربائي ب 25 جنيه "
و رجعت و ان شاء الله هكلم ابو رواش علشان اصرف علبة المية لما تيجي
والله انا حاسس انك تتكلم عن توكيل جاجوار ..طمنتني الحمد لله