اكتب موقف شاهدته او شىء نادر حدوثه الأ فى مصر

**معاذ الشرباصى** · 13-03-2008 05:44 PM

طلوع عربيات الكارو على منازل كوبرى المنيب, بالليل, و تبقى محظوظ لو شفته

**Xpert** · 13-03-2008 05:47 PM

البلد الوحيده اللي بتدفع 200% جمارك علي العربيات .. زياده عن 30% في الضرايب .. رسوم و جمارك .. رغيف العيش البيتي بقي ال 3 بجنيه ... البنزين يا موجود يا مش موجود .. و ان اتوجد بيبقي بنزين خالي من البنزين .. 20% بنزين 80% مياه لفت ... العيش بالقتال علي الافران ... الاكل مسموم ... العربيات غاليه نار .. الشقق غاليه نار .. الحديد غالي نار ... الموظف مرتبه مفيش (ده كده و ماعندناش في عيلتنا موظفين ..) .. سن المعاش 60 سنه و بعد ال 50 مابيجوش اصلاً ... الموظفين ماتعرفش تكلمهم و ان كلمتهم يعملولك قضيه تعدي علي موظف حكومي اثناء تأديه عمله (عن تجربه.. بعد كده ماهكلموش اثناء تأديه عمله ... بس لو دكر يطلع الشارع بقي ...) ...العيشه بالدراع .. السواقه بالدراع .. البيع و الشراء بالنصب و الاحتيال ...الضرايب تتعدي تمن الوعاء الضريبي .. السرقه و الشحاته زادت ..الواحد بينام باليل و هوه فاتح عينيه ..المستثمر لو معاه فلوس مابيعدش لمصر ... الكوسه زادت قوي ..
حرفياً : العيشه كلها بقت تقرف .. و يبقي انت اكيد في مصر ...
بجد : عمار يا مصر ... كل ده و مستحمله لسه .. عمااار يا مصر !
رايحه علي فين يا بلد .....

**magdi mina** · 13-03-2008 05:53 PM

اكبر العجايب فى نظرى .. انة رغم السلبيات اللانهائية التى نعيشها .. هو هذة المحبة والود الجميل بين اعضاء هذا المنتدى .. ودة فى حد ذانة دليل لايقبل الشك .. انة مصر مازالت بخير .......(اتمنى ذلك ) .

**mody_halawa** · 13-03-2008 06:04 PM

انا شايف ان مصر فيها ايجابيات وفيها سلبيات بس السلبيات اكتر بكتير من الايجابيات اولا السلبيات
1-الروتين الى يخنق علشان تخلص اى مصلحة لازم تعمل عجين الفلاحة
2-المرور فى مصر كتير بشوف ميكروباصات بتقف فى نص الشارع وولع فى نفسك ولو اتكلمت تاخد عل دماغك
3-التعليم الى الواحد يقعد يهرى نفسة مذاكرة ويتخرج يقعد على القهوة ويقولك الحق القطر فى الاعلانات الحقة ازاى لما اكون ليسانس حقوق او بكالريوس تجارة واروح اشتغل عامل خراطة ولا نقاش ولا عامل نظافة ودة اعتقد ان الواحد مبيشفوف الا فى مصر
4-السحابة السودا
5-الظباط الغير مؤهلين للعمل لانهم ببساطة بيستخدموا العنف والاكراة وقلة القيمة فى شغلهم
6-الوسايط مش فى الشرطة والنيابة بس انما كمان علشان اعمل اى حاجة فى حياتى لازم وسطة

الايجابيات
من كتر السلبيات الواحد مش فاكر ايجابيات لو حد فاكر اى ايجابيات ياريت يفكرنا معاة

**aif** · 13-03-2008 06:05 PM

مرة واحد قريبي عمل حادثة
وهو ماشي في طريق الاسماعيلية عند كوبري الهاكستب
سواق مكروباس وقف علي الشمال في مطلع الكوبري عشان ينزل ركاب
المهم الناس نزلت في نص الطريق طبعا وهو ما كانش واخد باله فخبط بنت عندها حوالي 20 سنة خبطة جامدة .. البنت طارت لفوق ونزلن علي كبوت العربية وبعدين علي حافة الرصيف
كان فيه شاب نازل من المكروباس معاها ... مايعرفهاش ولا عمرة شافها .. البنت قبل ما يغمي عليها كانت ماسكة فيه وبتقوله .. ماتسيبنيش .. وراحت في غيبوبة
قريبي عنده سكر .. وطبعا هو كمان بقي عاوز اللي يسعفه
الشاب اللي كانت البنت ماسكة فية فضل معاها وفتح الموبايل بتاعها عشان يعرف اهلها لكن الموباايل كان اتقفل من الصدمة وعلية رقم سري .. الولد طلع بطاقتها من الشنطة وطلع اسمها وفضل يتصل بالنجدة شوية وبالدليل شوية والاسعاف شوية من تليفونه
واخيرا قدر يوصل لتليفون اهلها عن طريق ناس اصحابة اتصل بهم واعطاهم الاسم وهما فضلوا ورا الدليل لغاية ما اتصلو باهلها بعد حوالي 3 ساعات

خلال هذه المدة كان هو وقف سيارة اجرة ونقل البنت للمستشفي ودخلها الاستقبال علي مسؤليته ولما مالقوش اشاعة في المستشفي اخذها لعين شمس التخصصي عملولها اشاعة مقطعية ورجعها تاني لهليوبلس وفضل معاها لغاية اهلها ما وصلوا وبعد الاجراءات اللي انتو عارفينها وما فيش جراح وبعتو جابولها جراح مخ واعصاب من مستشفي تانية دخلت للعمليات وعملولها عملية لإزالة تجمع دموي في المخ ولما خرجت من العمليات كان الولد لسة موجود ورافض انه يمشي الا لما البنت تفوق
وكان واخد رخص الراجل قريبنا وسلمها لبتوع الشرطة في المحضر وشهد باللي حصل بالتفصيل
ولما اهلها وصلوا واتأكد من شخصية ابوها اعطاه شنطتها والموبايل والذهب اللي كانت لابساه ( كان اخذو منها وهي في الغيبوبة عشان محدش يسرقو )وطبعا كل ده كان قريبي معاه لكنه كان مذهول ومش مركز
احنا لما عرفنا روحنا المستشفي بسرعة ومتخيلين ان اهل البنت عاملين مشاكل وخايفين انهم يعملوا حاجة في الراجل ( قريبنا ) لكن العكس هو اللي وجدناه .. الناس في منتهي الصبر والذوق وقاعدين يدعوا للبنت
الموضوع دة استغرق من الساعة 1 الظهر الي حوالي 2 فجرا واخيرا الولد مشي ورفض ياخد اي فلوس من اهل البنت وسابلهم تليفونه عشان لو عاوزينه يشهد في النيابة

اللي عرفته بعد الموضوع ما كان علي وشك النهاية ان الولد ده مسلم وقريبي طبعا مسلم .... والبنت كانت مسيحية

انا اتحدي ان ده ممكن يحصل في اي مكان آخر في العالم

**aif** · 13-03-2008 08:07 PM

انا نسيت اقولكم نهاية الموضوع
البنت طلعت وفاقت من البنج وحركت اطرافها واهلها اتنازلو عن المحضر وقريبي تحمل نفقات العلاج فقط واهل البنت رفضو ياخدو اي تعويض وقالو كفاية ان ربنا نجها والحمدلله انها جت علي قد كده

انا قلتلكم ان البنت مسيحية والباقي كانو مسلمين مش عشان اي حاجة بس عشان اقول ان الولد كان بيعمل اللي بيعمله بدافع الشهامة والانسانية فقط وهي علي دين غير دينه ... يمكن الناس تفهم طبيعة شعبنا
واللي انا متأكد منه تماما ان لو العكس كان هو اللي حصل كان برضه ح يكون التصرف هو نفسه

**Xpert** · 13-03-2008 08:41 PM

بتخبطونا يا شيخ احمد .. انتو عاوزين تخلصوا مننا ههههههههههههه
هوه الحمد لله لسه الناس فيها خير .. بس دلوقتي انت في زمن تحرص و لا تستأمنش ...ماتضمنش انت بتتعامل مع مين ...

**aif** · 13-03-2008 08:48 PM

المشاركة الأصلية كتبت بواسطة Xpert

بتخبطونا يا شيخ احمد .. انتو عاوزين تخلصوا مننا ههههههههههههه
هوه الحمد لله لسه الناس فيها خير .. بس دلوقتي انت في زمن تحرص و لا تستأمنش ...

ما هي البت برضه ما خلصهاش .... و صحييت تاني هعهعهعهعهععه :D

الحرص واجب طبعا لكن وقت الشدة بيبان معادن الناس
برضه يا بيشو ... برغم المساوئ الكتيييير انما الناس في مصر من جواهم طيبين ... يمكن بس ظروف الحياة صعبة عليهم

**Xpert** · 13-03-2008 08:57 PM

هعهعهعهعهعههههههههه

عادي يا عم ... بس برضه .. انا مش غايظني غير رابن التييت اللي استجرأ و جه سرق المواشي بتاعتنا ابن التييت ... لو اطوله هاسويه بالاسفلت ... بس خلاص بقي ...راح اللي راح عليه العوض و منه العوض .. اهه ده برضه موقف مايحصلش الا في مصر .. اسمع يا عم ..
عندنا مزرعه و المزرعه دي في وسط الارض بتاعتنا .. و البيه دخل لحد جوه بعربيه ربع نقل و قطع الحبال بتاع المواشي ..و خدهم حملهم علي العربيه و مشي ... كده عيني عينك علي الصبح ولا من شاف ولا من دري ...
البيه نقي الميعاد اللي ابويا مكانش لسه راح فيه .. و خللي الخارس بيطلع المواشي من الزريبه .. و حملهم و مشي ! .. كده عيني عينك ! ...