عن تجربة سنتين يونايتد جروب لأ لأ لأ - السبع يكسب يكسب
ححاول أختصر قدر الإمكان
عربيتي صني 2009 اتوماتيك ex عاملة 50000 كم كانت استلام 10/2008 لون كحلي
كل صياناتي كانت في يونايتد + 3 حوادث اتصلحت في يونايتد ( لأني ساكن بمدينة نصر بس من الظاهر أصلا بوديها الصيانة و أروح استريح عند والدي )
في البداية كان مركز يونايتد مش زحمة و الدنيا كانت زي الفل و اتعرفت علي المهندسين هناك و كله تمام
- الحادثة الأولي : شهر 2 / 2009 تعرضت لحادث جامد خلص علي مقدمة عربيتي
( واحد دبل كابينة 4*4 مركب عتب فولاذ ماشي في شارع عكس الأتجاه بالدراسة عند مركز دايوو سرعته كانت عالية لدرجة انه شافني بعدي التقاطع و هو في بداية الشارع و فرمل بس عربيته زحفت فوق ال20 متر و اخد عربيتي من جنبي اليمين ادام معاه 5 او 6 متر كمان و ربنا ستر اني طلعت من العربية اصلا و نزل شتمني لأني كنت بعدي التقاطع علي مهلي و طبعا اتنازلت عن اني اتهمه بأي حاجة بعد ما مأمور القسم نبهني للبهدلة اللي حتترتب علي اتهام الطرف الأخر من ترحيل لنيابة و تقليب لعربيتي في الحجز بتاع البوليس و كمان واسطة عشان مهندس المرور ييجي يعاين العربية و ادام محدش مات يبقي الدنيا زي الفل و اتحرق انت لو لك حق في البلد دي لأنه في الأخر كل القصة تعويض ب100 او 200 جنيه و انتهينا بكتابة محضر لشركة التأمين فقط ! ! )
- المهم وديت العربية لمركز يونايتد لأنه اول الشارع اللي عملت فيه الحادثة و الحق يقال استقبلني المهندس مختار ( المسئول عن السمكرة و الحوادث ) بمنتهي الأهتمام و خلصلي العربية في وقت قياسي 3 اسابيع و اتكلفت 20.000 جنيه اخدت منهم 15.000 من التأمين و العربية كانت تمام و عدت علي الخير و المركز كان فوق الممتاز بس رحت ضبطت الزوايا برة في بريدجستون عشان مكنتش متظبطة مع ملاحظة فرق يكاد لا يذكر في درجة اللون
- الصيانات كانت كويسة لكن كان عندي مشكلة الكلاكس اللي كل شوية بصوت شكل و الكلام ده من صيانة ال5000 و كل مرة يقولولي في التوكيل مشكلة سلك و اتربط ( كل شهر او اسبوعين اعدي عليهم يضبطولي الكلاكس )
- الحادثة الثانية : شهر 10/ 2009 الباب بتاعي
( صلاح سالم عند كوبري الفنجري سائق ميكروباص ماشي بيعد الفلوس سرح بعربيته يمين لحد ما دخلي في جنب عربيتي طبقلي الباب بتاعي و كل اللي طلعت به منه انه اعتذرلي عشان واحد قفل عليه )
- طبعا وديت العربية يونايتد بدون تردد و استقبلني المهندس مختار - بقينا اصحاب بقي - و العربية اخدت اسبوع معاه و كان الكرسي اللي جنبي بيزيق لما حد يقعد عليه و قال حيصلحه معاه و اتكلفت 600 جنيه علي حسابي
و دي كانت بداية العك
عربيتي لونها كحلي الباب اللي اتصلح اترش 4 مرات في التوكيل عشان يجيب درجة اللون و في النهاية تسببت في جزاء للعامل المسئول عن الدوكو بعد ما قالولي ان كان فيه مشكلة في جهاز الكمبيوتر اللي بيجهز اللون و ضربوا اللون يدوي و رحتلهم بعدها 3 مرات عشان الباب بيخبط و هو بيقفل و كمان الكرسي اللي جنبي برضه بيزيق
و دي كانت بداية اني الاحظ ان مفيش حد بيراجع ورا العامل , انا بستلم العربية بافتراض من كبير المهندسين و الأستقبال ان العامل ادي عمله 100%
- الصيانات مستمرة بالمركز مع ملاحظة جوانب قصور بسيطة مثل انهم كانو المفروض يبدلو وضع العجل كروس ادام و ورا بس المركز كان زحمة فقالولي انه مش مهم مع برضه نفس مشكلة الكلاكس و برضه كل مرة مشكلة الكرسي اللي بيزيق و بستلم العربية المفروض انها تمام و الاقيها زي ما هيه
- الحادثة الثالثة و مش الأخيرة : شهر 4/ 2010 الجزيرة الوسطي علي الدائري
كنت راجع من 6 اكتوبر لحقت صاحبي عند هايبر معاه نفس عربيتي طار بها فوق الرصيف الفاصل بين الطريق الرئيسي و الطريق الجانبي الموازي له ( و للأسف بعته يونايتد و عربيته لسة فراملها مش مظبوطة )
المهم و أنا في طريق العودة علي الدائري بعد امبابة كدة و انت رايح اتجاه السلام عربية نقل وراها مقطورة واحد غرز ادامه و هو ماشي 140 ( كنت ماشي 120 شمال الطريق و هو عدي زي الصاروخ من يميني ) العربية اتطوحت في ايده و المقطورة اللي وراه كبست عليا من اليمين اتضطريت الزق عربيت في الفاصل الأسمنتي اللي بين الأتجاه الرايح و الجاي ( لأن ورايا نقل تاني لازق فيا بيسابقه ) و فجأة انتهي الفاصل الأسمنتي و بقت جزيرة عرضية امامي ( العربية اللي ادامي اتفادتها بمعجزة ) و النقل لازق في يميني مدستش اصلا فرامل بس لحقت استشهد و الحمد لله طارت العربية بجنبهخا الشمال فوق رصيف الجزيرة و اتأخرت العجلة الأمامية شمال ورا بشكل واضح و ربنا ستر و النق اللي ورايا اتفاداني و محدش فكر انه يهدي اصلا و لا يبص وراه
- و طبعا رحت تاني ليونايتد - صاحبي بقي - اخدت اسبوعين و اتكلفت 6.500 جنيه اخدت منهم 5.000 من التأمين
و دي كانت القشة التي قسمت ظهر البعير ( أنا البعير ) استلمت العربية زي الفل بس لاحظت لخبطة في الأشارات رجعت التوكيل اكتشفت ان الفني نسي يرجع الأشارات مكانها تاني , عديتها و ركبوها و مشيت و الشك مالي قلبي رفعت العربية في بنزينة موبيل بالدراسة امام يونايتد اتفاجأت ان لحامات تغيير صدر العربية ادامي و العربية مش مرشوشة من ورا الأكصدام بعد ما غيرو جزء من الصدر رجعت للمهندس مختار اللي برضه ادي جزاء للعامل الفني و دخلت العربية اتظبتت و استلمتها
-في الوقت ده التكييف ابتدي يفصل و الكباس يقطع في الحر رحت يونايتد قالو ان ده شيء عادي عشان موجة الحر اللي موجودة اذاي انا اشغل تكييف في الحر ده العربية برضه لها حدود
- الكلاكس فصل عشان واحد قطع الطريق فجأة و فضلت دايس علي الكلاكس ثواني فصل خالص و لمبة البطارية نورت رحت برضه يونايتد كشفو علي العربية و قالو الكلاكس بايظ و لازم يتغير بس انا معملتش صيانة ال40000 و ماشي بالعربية 45000 ( علي الرغم اني مغير عندهم زيت الموتور و الفتيس الأتوماتيك في ال40000 ) و ده يخرج العربية برة الضمان و المهنس خايف يغير الكلاكس احسن الشركة تحمله تكلفته و بيترجاني اغيرة في صيانة ال 40 و كانو عاوزين يدفعوني كشف بس مدير الصيانة مخلنيش ادفع لما قليت ادبي و صوتي علي عليهم
- بعد شهر استعمال و 1000 كم العحل الأمامي بيصفر علي كل السرعات و الملفات رحت لمركز بريدجستون اكتشفت ان التوكيل قفل العجل الأمامي للأمام 2 in و ده تسبب في تأكل للعجل الأمامي ( اسهل من ظبط زوايا العربية )
رجعت التوكيل يونايتد علي خناقة قالولي قبل ما يشوفو العربية عربيتك زي الفل انت اللي مش فاهم و بعد خناق دخلوني للزوايا و المهندس بتاع الأستقبال شاف بنفسه لقي العجل مغلق للأمام و عليت صوتي و دخلت غصب عنهم صالة الصيانة و شفت العربية بنفسي علي الجهاز شاشته بتدي لون أحمر للعجلة الشمال و قعد يظبط فيها ربع ساعة
بعد كده المهندس مختار - صديقي - جايلي بتقرير يقوللي العربية زي الفل زي ما استلمتها الأول كلفت نفسك زوايا 88 جنيه و العربية سليمة اصلا
و لما وضحتله موضوع العجل المغلق للأمام قالي اكيد انت خبطت رصيف أو طوبة بس مش واخد بالك
ما علينا من قلة ادبي في الرد لأني رحت دفعت و استلمت العربية و دخلت بها في مدخل المركز قفلته و طلعت كل اللي نفسي اقوله من زمان
