مدخل الاسكندرية من الصحراوي

**faron525** · 12-09-2010 05:01 PM

باذن الله بكرة انا رايح الاسكندرية وتحديدا ميامي وده اول مرة اروح سايق ومش عارف الطريق من بعد البوابات فياريت مساعدة من الاخوة الاسكندرانية بوصف الطرق بدقة ولكم جزيل الشكر

**amr.elsayed** · 12-09-2010 05:32 PM

اول ما تخلص الصحراوى حتلاقى كارفور على شمالك وحتلاقى الطريق مقسوم نصفين ... نصف طوالى .. والنصف التانى تلف شمال
انت اول ما تلاقى كارفور على شمالك تدى اشارة شمال وتلف مع العربيات شمال وتكمل وتطلع الكوبرى (ما تدخلش اى داخلة يمين تفضل مكمل طوالى لغاية البحر)
بعد كدة تدخل طريق البحر وتفضل ماشى حتعدى على فندق سان ستيفانو والمحروسة وتفضل مكمل وحتلاقى شارع خالد بن الوليد وحتلاقى عنده الدنيا زحمة اوى
فاضل حاجة تقولهالنا انت رايح فين بالظبط فى ميامى علشان نقولك على الطريق الصح

**M.Osama** · 12-09-2010 05:40 PM

بالظبط تمام .. بس لو انت رايح ميامي حاجه قريبه من شارع 45 مثلا بدل ما تقف في خالد ابن الوليد ساعه عشان تعدي ممكن تطلع محور التعمير وانت جاي من الصحراوي وتفضل مكمل فيه طوااااااااااااااااااااااا اااااااالي لحد ما حتلاقي يفط ميامي من جنب الكوبري وحتلاقي قدامك كوبري تدخل من تحته شمال وتمشي طوالي حتلاقي نفسك في شارع 45 في ميامي علطوول

**faron525** · 12-09-2010 05:58 PM

الف شكر ليكم يا جماعة علي سرعة الرد انا باذن الله رايح شارع 45

**M.Osama** · 12-09-2010 06:01 PM

يبقي تاخد محور التعمير احسنلك بكتير هوا يمكن اطول شويه بس زي الدائري هنا كده بيختصر الوقت لان الطريق من جوه البلد دمار شمال وخصوصا انت فأجازه وعيد كمان يعني ممكن تتزنق فخالد بن الوليد لصلاة الفجر :) ورحله سعيده ان شاء الله