عمره ولا موتور استيراد

**asaadpw** · 12-09-2010 05:03 PM

السلام عليكم ورحمة الله
ارجو المساعده من اخواني في النتدي معايا عربيه نوبيرا 2 موديل 2001 واعتقد انها مصري الموتور رحمة الله عليه يعني خلاص بيودع طبعا دخنه بيضاء وصعف في السحب وبياكل زيت وبينفخ من فتحات الزيت وترشيح علي البوجيهات وصوت تخبيط فيه من جوه وصوته خشن والميكانيكي قالي طقم شنبر ده اول حاجه لحد لما نفتح ونشوف ممكن تحتاج نصف عمره وقولتله اجيب موتور استيراد قالي وايه عرفك انه مش هيطلع فيه نفس اللي عندك واكتر وبعدين افراج جمركي واثبات علي الرخصه قالي العمره بترجع الموتور شبه جديد وقالي طقم شنبر هيكلف تقريبا 800 جنيه لاكن نصف عمره تقريبا 1500 بدون سير كتينه او بلي كتينه وسالت علي الموتور عند واحد معرفه قالي 3250 كامل بطقم التشغيل يعني علي التسقيط وممكن اوصله معاه لحد 3000 بس طبعا لسه فيه اجرة تسقيط واجرة نقل واجرة ميكانيكي هيجي معايا يجرب الموتور لان انا من المنصوره وهجيب الموتور من الحرفيين ارجو المساعده ايهما افضل اعمر ولا اجيب موتور واكيد الموتور الجديد ممكن يطلع فيه حاجات زي ما الميكانيكي ما قال

**karimfahmy99** · 12-09-2010 07:12 PM

الرد طبعا مش سهل . دا يتوقف العربية هتفضل معاك و لا ناوى على بيعها ؟؟ طقم شنبر دا مسكن و ليس علاج . و طبعا امكانياتك المادية

**Adham** · 12-09-2010 07:18 PM

بص صوت تخبيط يبقى سبيكة وحاتحتاج معاها خرط كرنك و بيلات

و دخان يبقى تفويت من شنابر و صبابات و بساتم

عايز تشتري راحه بالك اشتري موتور استيراد و خلص نفسك

الميكانيكي عايزك تعمر الموتور علشان يلم منك قرشين مصنعية حلوين غير طبعاً مصالح بالعبيط في لستة حايعملهالك اشي جوان اية و افيز لزوم ربط اية و مسمار معرفش اية وخراط علشان يفك اية و كهربائي علشان سلك ابصر اية و طبعاً كلها مصالح يا مسمسر فيها يا مش عامل فيها اصلاً

و يلم منك 300 - 400 جنية اشتغالات

انما موتور استيراد يبقى هما ال 150 جنية تسقيط مكنة و شكرا مش حايعرف يشتغلك فتح و نصب و العربية واقفة و موتورها متفور و عمال يقولك ادفع هات

عن تجربة المواتير الاستيراد انضف مليون مرة

و اضمن من العمرة و حاتعيش اكتر و حاتبقى انعم

لان الخامات هنا في السبايك و الشنابر و غيرها من مستلزمات العمرات زي الزفت

و كمان فرق التقفيل من المصنع للكفتجية بتوعنا

**karimfahmy99** · 12-09-2010 07:23 PM

المشاركة الأصلية كتبت بواسطة adham

بص صوت تخبيط يبقى سبيكة وحاتحتاج معاها خرط كرنك و بيلات

و دخان يبقى تفويت من شنابر و صبابات و بساتم

عايز تشتري راحه بالك اشتري موتور استيراد و خلص نفسك

الميكانيكي عايزك تعمر الموتور علشان يلم منك قرشين مصنعية حلوين غير طبعاً مصالح بالعبيط في لستة حايعملهالك اشي جوان اية و افيز لزوم ربط اية و مسمار معرفش اية وخراط علشان يفك اية و كهربائي علشان سلك ابصر اية و طبعاً كلها مصالح يا مسمسر فيها يا مش عامل فيها اصلاً

و يلم منك 300 - 400 جنية اشتغالات

انما موتور استيراد يبقى هما ال 150 جنية تسقيط مكنة و شكرا مش حايعرف يشتغلك فتح و نصب و العربية واقفة و موتورها متفور و عمال يقولك ادفع هات

عن تجربة المواتير الاستيراد انضف مليون مرة

و اضمن من العمرة و حاتعيش اكتر و حاتبقى انعم

لان الخامات هنا في السبايك و الشنابر و غيرها من مستلزمات العمرات زي الزفت

و كمان فرق التقفيل من المصنع للكفتجية بتوعنا

دا كلام صح . بس زى ما قلت هو ناوى على اية القرار راجع لية . و الافضل استيراد لو مش ناوى على تغير العربية

**Adham** · 12-09-2010 07:32 PM

دة غير انك حاتخللي حاجات من الموتور القديم زي قطع غيار كتير عندك

و كمان الموتور الاستيراد حايبقى فية طلمبات و دينامو و مارش و كل شيء فية بيبقى انضف من العربيات اللي هنا ولو ماشية 100 الف كيلو بس

لانهم برة صيانات صح و قطع غيار صح الصح

**karimfahmy99** · 12-09-2010 07:38 PM

لسة مردش يظهر بيشاور نفسة

**Adham** · 12-09-2010 07:52 PM

بص الحكم الصح

انك تفتح الموتور و تشوف الشمايز فيها عتب و للا لأ (بيبان لما تحل وش السلندر و الموتور راكب في العربية)

لو فيها عتب يبقى انسى حاتخش يا في خراطة شمايز تركب شحط جوة الشمايز
ودي مابتعيشش اكتر من 50 الف كيلو لأن خامة الصلب المستخدم مابتعيشش كتير و بترجع الخلوص تزيد تاني

يا اما توسع الشميز خراطة
و تركب بستم اكبر

و هنا حاتتكلف تمن طقم بساتم جديدة اكبر شوية (020)

يعني في الحالتين التكلفة كبير, يا خراطة فوق ال 500 جنية يا طقم بستم ياعالم بكام
و دة غير بقية الحاجات زي الصبابات و الشنابر و السبايك و خراطة كرنك و بنوز و غيرة و غيرة و في الاخر الموتور خشن و مش بيسحب زي الاول و مشاكل ما بتخلصش

انزل بنك الاسكان في بورسعيد و اشتري من هناك

الحرفيين اغلى طبعا لان معظمهم جايب من بورسعيد و حاطط هامش ربح, و اللي بيستورد و بيبيع في الحرفيين بيحط مكسب اعلى و مصاريفة بتبقى اعلى

انت ممكن تجيبة اقل من ال 2500 من بورسعيد لو اتشطرت و تعبت و لفيت شوية و فاصلت

**karimfahmy99** · 12-09-2010 08:00 PM

من غير بص و لا فتح . من كلامة فى عيوووووب كتير تخبيط و ترزيع . لية مصاريف تفوير الموتور ؟ بلاها فك . لو ناوى على بيع يلم الموضوع بطقم شنبر او يبيع على كدة و الشارى يتصرف بمعرفتة و لو مش ناوى يبقى استيراد و يكبر دماغة

**samirayad** · 12-09-2010 09:19 PM

وقالي طقم شنبر هيكلف تقريبا 800 جنيه لاكن نصف عمره تقريبا 1500

بالله عليك تسألهولنا

أيه الفرق بين النصف عمره وطقم الشنبر

من رأيى

شوف ميكانيكى تانى يحل الموتور ويكشف عليه صح ( بلوك من الداخل وركب كرنك )

لو دول كويسين

غير طقم شنبر وأعمل روديه وكده أنت كسبت مكنه أحلى وأرخص بكتير من الأستيراد