الموضوع: رحلتي لابو ظبي (مقارنه بمصر)

تمام يا كابوس باين عليك لفتها كعب داير زي ما بيقولوا
يمكن كان حظي وحش في المرات اللي اكلت فيها هناك
popeyes بحب فيه البطاطس المحمره و المهروسه بالصوص بتاعها :D ريقي جري و الله
بس للاسف معرفش ممكن اسافر تاني و لا لأ لأن فيه حاجات كتيره شوفتها قلقتني لسه حتكلم عنها

الفسح
قعدت اول اسبوعين في حاله خمول و زهق و قرف مش مرتاح مع جو ابو ظبي لدرجه ان بقيت انزل اتمشى لوحدي في الشوارع رغم ان الجو زباله بلانهار مفيش رطوبه بس فيه شمس بتحرق شمس مصر بتسخن الواحد لكن شمس ابو ظبي بتحرق بمعنى الكلمه
اكتر معاناتي كانت مع الهنود في تعاملاتهم العربي و الانجلش بتاعهم ضايع ليهم لكنه غريبه لدرجه اكتشفت لما لقيت سواق هندي بيكلمني عربي و انا مش عارف و فيه واحد من افغانستان بيقولي هو انتا منين قولتله من مصر قالي ما المصريين بيتكلموا عربي فضحكت و قولتله عندي مشكله في السمع مرضتش اقوله انتا العربي بتاعك ضايع و الانجلش كمان

بعد فتره بتبدي تتعود على اللكنه بتاعتهم و تفهمهم عدا الارقام لحد دلوقتي معرفش اسمعها منهم لحد دلوقتي لدرجه بخليهم يقولوهالي براحه سواء عربي او انجلش

للاسف معرفتش ازور اماكن كتير لكسل مني بالاضافه لظروف خارجه المهم كان فيه نادي كاراكال ده قريب من مسجد الشيخ زايد و ده بيعلموا و بيمرنوا فيه المواطنين و الاجانب ضرب النار

مسجد الشيخ زايد استغفر الله العظيم متحسش انه مسجد من كتر الترفيه الماظ و دهب و رسومات على الرخام بالليزر و السجاد مش عارف منين فلوس هبل
دا غير اطول ساريه علم في العالم
مول ابن بطوطه عبقريه كنت مستغرب من اسمه لحد ما عرفت لما دخلته معمول على هيئه اجنحه مصر لوحدها ليها جناحين الجناح الفرعوني و الجناح مصر القديمه و ده في دبي

كان فيه مولات تانيه بس صغيره في ابو ظبي الى حد ما عدا مارينا

مشيت على كورنيش ابو ظبي في عز الرطوبه بس علشان استكشف البلد اخدته مشي من اوله لاخره في حوالي ساعه وربع كورنيش راس البر و اسكندريه برقبته

لاحظت ان ابو ظبي بيردموا البحر كل شويه علشان يوسعوا مساحاتها
دخلت فيلم 3D في مارينا مول كان تمن التذكره 50 درهم يعني 75 جنيه عادي رخيص بالنسبه للرواتب و اسلوب المعيشه

كان فيه قدامي مرسيدس شبح S500 موديل 93 ب 7 الاف درهم يعني حوالي 10500 جنيه لا تعليق
ميزه ابو ظبي الفقير و الغني حيعرفوا يعيشوا بس تظل صغيره جدا ابو ظبي لدرجه ان سالت عن عدد السينمات فيها 20 سينما لمدينه تعتبر العاصمه طب هي كام مليون قالي 3 مليون مش الاهل لأ السكان يعني المواطنين بالاجانب

المهم اخر جزء اتكلم عنه التعامل بين الجنسيات و بعضها و الناحيه النفسيه بعد ما شرحت الناحيه الماديه في المعيشه في ابو ظبي

رغم التلوث و الفساد و الانحرافات و انعدام الأمن و انهيار النظامو ارتفاع الاسعار المبالغ جدا


مصر أحسن بلد نعيش فيها

اللي مجربوش رطوبة الخليج بجد هيتصدموا لو راحوا هناك

رطوبه بشعه بجد

أنا ممكن استحمل الحر بتاعهم بس الرطوبه مستحيييييييل

الحمد لله على سلامتك ولازم تحسن العربي بتاعك شوية وتاخد كورسات علشان تفهم الهنود والافغان اللي بيتكلموا عربي

المشاركة الأصلية كتبت بواسطة crazylambada

ميزه ابو ظبي الفقير و الغني حيعرفوا يعيشوا بس تظل صغيره جدا ابو ظبي لدرجه ان سالت عن عدد السينمات فيها 20 سينما لمدينه تعتبر العاصمه طب هي كام مليون قالي 3 مليون مش الاهل لأ السكان يعني المواطنين بالاجانب

اكيد انته بتهرج في موضوع ان ابوظبي الفقير والغني يعيشوا فيها علشان الايجارات في ابوظبي خياليه لدرجه توصل للغرفه و الصاله من 80 الف لحد 120 درهم في السنه وحولها لوحدك مصري وطبعا مع خدمات زباله مش زي دبي خالص يعني تلاقي العماره من بره شكلها وهم ومن جوه تعبانه ومش نظيفه خالص...

عدد سكان الامارات كلها اقل من 5 مليون معظمهم موجود في دبي او شغال على الاقل في دبي...

اماكن الخروج في الامارات عموما هيه المولات ثم المولات ثم المولات وبعد كده ممكن البحر والقهاوي وعموما الاسعار بتاعه اللبس بقت هنا خياليه وبأسعار مبالغ فيها للماركات والي يلاحظ الموضوع ده الي كان عايش هنا من فتره الاسعار نطت 5 او 6 اضعاف...

اسعار الاكل هنا مبالغ فيه جدا وبالنسبه لسعر اللحوم الي ارخص من مصر علشان هنا المجمد بيتباع عادي والناس بتاكله مش زي مصر الناس بتبص للمجمد بقرف ومحدش بيقرب منه لكن اللحوم الطازه غاليه جدا بالاخص الجزيري او البلدي هنا يعني لو جربت وجبه مندي باللحمه هنا بتوصل ل 45 درهم وانته طالع في المطاعم المتوسطه علشان لحمه جزيري او بلدي لكن لو لحمه وصله الي بتكون خروف استرالي بتلاقيها 17 درهم ل 20 درهم

البلد هنا بلد شغل وخلاص ومعظم يومك بيروح في الزحمه والشغل وبالاخص لو كان فيه عقاب يومي زي الي ما بين الشارقه ودبي في شارع الاتحاد الي طوله 4 كيلو وبتمشي فيه زياده عن ساعه ونص من اول الشارقه لاول دبي...

لو عاوز ملخص للايجابيات والسلبيات الموضوع هيكون طويل اوي وبالاخص انا عشت فيها زياده عن 29 سنه...