الموضوع: البطاريه.........

المشاركة الأصلية كتبت بواسطة amrdiab

بص يا سيدي انا في موال البطاريه ده برضه والغريبه انها بتختار الوقت الغير مناسب لكن الحمد لله اختارت المكان المناسب عشان تقل اصلها فيه كنت جمب البيت حوالي ميت متر
المهم كان تاني يوم العيد السبت طبعا مسلمين قافلين مسيحيين نفس النظام وداخل الاحد
المهم لسه راجع البيت من شويه بعد لفه غريبه وعجيبه بين محلين فقط لا يفصل بينهم غير 30متر
كنت عند المحل الاول الساعه 9 صباحا ...اني الاقي حد في الشارع كله قافل واحد من اللي فاتحيين بدري قالي دول ملهمش مواعيد جرب واتصل ارقام الموبايل اهي مكتوبه ع المحل في اليافطه
ان حد يرد كله مغلق واخيرا ردت نمره منهم
الو حضرتك انا واقف قدام المحل انت هتفتح امتي قالي 10.30 قلت ايه طب هسيب لحضرتك البطاريه عند السوبر ماركت اللي جنبك ..طيب..سلام ...وسبت البطاريه عند بقال ...رحت الشغل...ومقولكمش علي بهدله التاكسي ...المهم رجعت كانت الساعه 2 بعد الظهرا ...ايه الاخبار..مش قابله شحن..يعني ايه ...عايزه بطاريه جديده..عندك انواع ايه..عندي كلورايد..نسر فارتا...وبلاتنيوم كوري..كام يا عم اسمع الارقام واتعجب
كلوريد سائل..... 440 جنيه
فارتا نسر ....... 430 جنيه
بلاتنيوم ......... 520 جنيه
اي سي ديلكو........... 660 حنيه
وهياخد القديمه ب 70 جنيه
كل ده بسمع مش مستوعب "بس حاسس انه عايزيشتغلني وينصب عليا مش عارف ليه"
-------------------
اتصلت بزميل وقلتله اللي حصل دلني علي واحد يصلح البطاريات وييشتغل فيها ..لحسن الحظ كان جنب صاحبنا الاولاني اقل من 30 متر اسمع يا سيدي العجب
كلوريد جافه .....300 جنيه
فارتا الماني 60 ... 460 جنيه
كلوريد سائل .... 240 جنيه
نسر سائل .... 220 جنيه
هوجل تركي جافه 70 ... 370 جنيه
وهياخد القديمه 50 جنيه
ازدادت الحيره اكتر
ولغايه دلوقت مش عارف اقرر

المهم شكل الهوجل التركي تحفه وضمان سنه استبدال علي طول بس ادور ع النت اني الاقي هوجل ولا حاجه يطلعلي صور لاعب كوره وجمال ايه ياعم دي شركه من تحت السلم ولا ايه

شكلنا مستهلكين بطاطا ...ازاي محلين بينهم 30 متر والاسعار بالتفاوت ده
فين الرقابه...احنا بنتعرض للنصب يا جدعان ومحدش دريان واكلمه يقولي ياباشا كله غلي ده كيلو الطماطم ب 7 جنيه ايه اللي دخل الطماطم في البطاريه
ولا لما سمع فيكترا قال اه دي بطاريه معكوسه زود علي العاديه دى20 جنيه ايه ده

وايه الماركات دي ...هي دي صيني وقايلين تركي ولاتركي المحطه ولا ايه بالظبط
ولما نستورد مش نستورد من اماكن معلومه ده هوجل دي طلعت عيني في البحث ...
النت اللي عليه لبن العصفور ملقتش هوجل خالص مع ان تقفيلها تحفه بس خايف بكون من بره هلا هلا ومن جوه يعلم الله

وكل عام وانتم خير

ربنا يستر علينااااا من الناس دي الناس ملاهاا الجشع والطمع خلاص ....

المشاركة الأصلية كتبت بواسطة lancerevolution

بص يا باشا
ال66 أمبير شغالة معايا كويس الحمد لله و لو مش مركب سماعات و حركات ال66 كفاية قوى

تماام يا باشا ربنا يبركلك فيها . انا مركب ال 70 امبير بس الراجل دا بيقلي ان 66 دي اقوي ب3 اضعاف ال70 امبير مش عرف ازاي والثمن بردو يعني ال 70 ب 380 ج و ال66 ب 600 و حاجا .........

السلام عليكم

والله انا البطاريه طلعت عينى مع ان بقالها 3 سنين وشويه فى العربيه بس بدئت تتعب

المهم نزلت ادور على فارتا المانى الراجل قالى معدتش المانى بقت تشيكى ومتخزنه ومش حلوة

قمت شارى هوجل التركى الى amrdiab بيقول عليها بصراحه لقيت تقفيلها انضف من الكورى وشكلها حلو و مخدومه جبتها ب 375 بالقديمه مع انه كان بيقولى 400 هى 60 امبير
وقعدت ادور على موقع ليها بس فى الاخر لقيت و اطمئن قلبى هههه لحسن انا برضه كنت قلقان لتطلع مضروبه

والموقع اهو

Car Batteries (ultra) Manufacturer & Wholesale Supplier From Turkey

شوف بقى وقولى ايه رأيك اتدبسنا ولا ايه

المشاركة الأصلية كتبت بواسطة tananybasha

الله يكون فى عونكم
1. ابعد عن الكلورايد بتضرب لوحدها ( بتجيب ربع و غالباً ارضى (
2. ابعد عن الفارتا و الديلكو مبقوش زى الأول
3. هات بطارية كورى او تركى مش فارق بس هاتها 66 امبير
بجد ال 66 امبير اقوى بمراااااااااااحل و خاصة مع الأوبل
انا مركب هانكوك و شغاله كويس قوى

طب انا نفسي اعرف ايه الفرق بين ال66 وال70 وايه سر قوتهااا ........