مشاكلى معى الكيا سيراتو اللى بموت فيها

**Abo.Moazz** · 13-09-2010 06:36 AM

السلام عليكم ورحمة الله وبركاتة
أنا كنت عرضت قبل كده موضوع عن مشكلة حصلتلى قبل كده مع الكيا النيو سيراتو
أولاً ... أنا عربيتى كيا نيو سيراتو موديل 2010 خليجى سعودى توب لاين لون فيرانى جنط 17
ثانياً .... كان الموضوع اللى شاركت فيه قبل كده عن موضوع إنى أول ماجبت الكيا كنت بسافر بيها كتير لظروف عملى فى مدينة شرم الشيخ... وكنت بوصل بيها لسرعات عالية جداً ... ووصلت بيها مرة لسرعة 215 كم / ساعة ... وكنت كل مرة بسافر بيها الطريق كله مابنزلش عن 160...
وفى إحدى المرات اللى سافرت بيها لقيت العربية مابتزيدش عن ال 160 مع آخر دواسة البنزين
المهم كشفت عليها عند مركز أمير وجوزيف وغيرت الزيت والفلتر وفلتر الهوا وفلتر البنزين والبوجيهات وكشفت عليها على جهاز كشف الأعطال ومفيش فايدة العربية زى ماهية....
المهم واحد صاحبى نصحنى إنى أنسى الموضوع وماحطهوش فى دماغى
وماقدرتش أشيل الموضوع من دماغى وبقيت متضايق جداً إنى مش عارف أمشى أكتر من 160
لحد ماتصدمت صدمتين كانو أكبر من بعض والفرق بينهم 5 أيام... والصدمتين همه وفاة إثنين من أعز أصدقائى فى حادثتين مختلفتين بس على نفس الطريق بتاع شرم الشيخ... أول حداثة كان واحد صاحبى راكب دايهاتسو تيريوس وكان وركب معاه 3 أفراد بالصدفة شاوروله على الطريق... وخبط فى عربية نقل كان راكب فيها 3 أفراد .... يعنى المجموع 7 أفراد كلهم ماتو..
الحادثة التانية بعديها ب 5 أيام .. صاحبى راكب فى عربية جنب السواق وفيه كمان اتنين ورا والعربية اتقلبت التلاته طلعوا سلام ماعدا صاحبى هوه الوحيد اللى مات... الله يرحم الجميع
المهم... إحترمت نفسى ومابقتش بعدى 120
لحد آخر مرة كنت مستعجل شوية وقلت أدوس بنزين... وأنا مشغل التكييف مع آخر دواسة البنزين العربية ماعدتش 140
ده غير مشكلة الكلاكس اللى كل شوية بيعلق
ده غير مشكلة الكاوتش ال 17... بعد ماجيبت العربية بشهرين طلعلى بزبوز فى فردة كاوتش غيرتها ونزل الاستبن مكانها.... وفضلت ماشى عليها لحد مرة فى طريق مصر السويس أمام مدينة بدر وقعت فى بلاعة مفتوحة ( إتقفلت خلاص ) والكاوتش إنفجر لما نزلت مصر رحت لمحل فى شارع أحمد سعيد إسمة مركز الفردوس ... قاللى الكاوتش ال 17 الكومهو الأصلى نفس النقشة ب 750 جنية والتقليد ب 450 جنية.... اشتريت التقليد وبعديها ب شهرين طلع بزبوز فى فردتين تانيين... قلت بقى أشترى كاوتش نضيف... دورت على بريدجستون مالقيتش... وبعد تعب ولف ودوران لقيت ميشلان الفردة الواحدة ب 1450 جنيييييييييييييييييييية...� �شتريت فردتين مضطر لظروف السفر والطريق... ولحد دلوقتى ماشيين زى الفل والحمد لله
آخر مشكلة إنى مرة لقيت الفتيش معلق ومش راضر ييجى على الـp .... ويقوم يبقى كويس ويوم يعلق...
أنا بحب عربيتى جداً بس المشاكل دى خنقتنى...
حد يقول أغير الكلاكس فين وأجيب أى نوع
هل فى مشكلة لموضوع سرعة العربية اللى مابتزيدش عن 140 مع التكييف و 160 بدونة
وبالنسبة للفتيس برده أعمل أيه
مع العلم إن عربيتى عاملة 30000 كم
انا ماعملتش غير صيانة ال 10000 وبعديها ماعملتش أى حاجة فى العربية غير إنى بغير زيت وفتر وبربط عافشة بس
أنا أسف على الإطالة

..................................

**ahmad--ezzat** · 13-09-2010 06:55 AM

الجنط ال 17 دة داهيا خصوصا عندنا.....

حضرتك اكشف فى التوكيل واعرف العيوب فين واعملها بره ...بصراحه انا مش شايف سبب بعد تغير كل الفلاتر دى الا لو رشاشات الانجكشن مسدوده مثلا

طب ايه اخبار البنزين طيب؟

واستنى برده رأى الناس هتفيدك....

**mastr_n** · 13-09-2010 09:33 AM

بخصوص الكلاكس كان فى عضو معانا هنا بس مش فاكر اسمة غير الكلاكس بتاعة

عند بنزيمة موبيل ش الطيران امام توكيل منصور شيفورلية وفية نوعين
mixso ب 70 جنية و fiaam ب 90 جنية
وهما فى البنزيمة بيركبوهولك وانا ناوى اروحلوهم ان شاء اللة

اما بالنسبة للسرعة حاول كدة مع مركز تكنو وان وهتلاقى ناس فاهمين انا ماروحتش لسة بس الاغلبية بيشكروا فيهم

**amrnagy** · 13-09-2010 09:46 AM

طيب اكشف عليها في الوكيل ولو فيها مشكله صلحها برة
بالنسبة للجنط ال 17 هوه فعلا مشكلة ان الكاوتش بيبقي رفيع اوي فمع المطبات والحفر بيبوظ الكاوتش

**yasso0101** · 13-09-2010 09:50 AM

المشاركة الأصلية كتبت بواسطة mastr_n

اما بالنسبة للسرعة حاول كدة مع مركز تكنو وان وهتلاقى ناس فاهمين انا ماروحتش لسة بس الاغلبية بيشكروا فيهم:s_thum1[1]:

جرب تروح لتكنوا وان

**ahmedsamir5edr** · 13-09-2010 09:52 AM

حضرتك بما ان ظروف شغلك كلها سفر .. مؤكد بيحط بنزين في الطريق
و 90% من البنزينات علي طرق السفر بيغشوا البنزين .. ممكن يكون ده السبب .. الأنجكشن فيه مشكله .. خصوصا كمان لو مع البنزين الوحش ده بتسيب التانك يفضي
و رأي الشخصي .. أكشف عليها و طبعا يجب تغيير فلتر هوا و بنزين و بوجيهات لأنهم كده ماشيين 20.000

تقبل مروري

**Amr A.salam** · 13-09-2010 10:18 AM

دة اللينك بتاع الكلاكس يا سيدي ...ولا تحمل هم :)

http://www.nilemotors.net/Nile/165138-a.html

بالنسبة للسرعة القصوى ..روح على تكنو وان وخليهم يكشفوا عليها بالجهاز

**gazzar91** · 13-09-2010 06:32 PM

بالنسبة للكلاكس.....
الكلاكس ده تقريباً عاوز رجلاش ومش محتاج يتغير... و ممكن تروح لكهربائي يغيرهولك من غير ما يجرب الرجلاش....
ممكن حضرتك تشرفني في النزهة الجديدة و أنا أعملهولك تحت البيت زي ما عملتوا فعربيتي

و بالنسبة للكاوتش... دور على هانكوك .... ناشف و مش بيعملا بلالين خالص الحمد لله لكن أكيد الميشلان أنظف بس فرق السعر ممكن يكون كبير.... إنما الكومهو مشهور ببلالينه (و عن تجربة)
في رعاية الله...

**Abo.Moazz** · 14-09-2010 03:25 AM

السلام عليكم ورحمة الله وبركانة
أنا متشكر جداً ياجماعة على موضوع الكلاكس... أنا هاروح بكرة إن شاء الله بنزينة موبيل وأعمله زى مانصحتونى...
أما لموضوع البنزين انا عايز أقولكو حاجة جميلة جداً فى السيراتو... هيه موفرة جداً للبنزين... أنا فولت التانك فى بنزينة وطنية اللى على أول طريق مصر السويس... التانك كفانى لحد شرم الشيخ وفضل فيه ربعه كمان..... بس بشرط... ماتزيدش سرعتك عن ال 130 وماتقلش عن ال 90.... وماتشغلش التكييف علطول... يعنى شوية وشوية.... بس أنا لما ببقى مستعجل وبدوس على الدواسة شوية لازم أمون إحتياطى غصب عنى... وأنا عارف إن البنزينات اللى على الطريق بيغشو... طب أعمل أيه... بس أنا كل 3 أو 4 مرات أحط 92 ... بحط مرة بنزين 95
بس برده مافيش فايدة... وحطيت السائل اللى بيتحط مع البنزين علشان ينضف الدايرة وبرده مافيش فايدة
أنا بصراحة كنت ناوى اوديها لمركز الميكانيكيون العرب اللى فى شارع النزهة... فى ناس بتشكر فيه أوى...
ياريت عنوان تكنو وان بالتفصيل بعد إذنكو
ماحدش قاللى إيه السبب فى مشكلة الفتيس اللى بيعلق وساعات مابيرضاش ييجى على وضع ال p