حادث وفاة وضياع حقوق الغلابة
من حوالي 3 ساعات جوزي راح بنزينة على طريق ترعة المنصورية عشان يغسل العربية وواخد معاه يوسف
اتاخر هناك واتصل قالي انه لسه هايأخر تاني عشان حصلت حادثة وفاة لاحد العاملين بالبنزينة وهو بيغسل عربية واحد .. بيقولي انه اتكهرب
مش فاهمة النقطة دي هل العربية مع المية ممكن يكون فيها كهرباء مميتة ؟؟
وعايزني اروح اخد يوسف لانه اتأثر لما شاف الرجل ميت وشاف حالة موته بنفسه
انا مقدرتش اروح وطلبت من اخو جوزي يروح يجيب يوسف
وان المطلوب من الكل يستنوا عشان الشرطة جاية هتاخد اقوالهم
وطلبوا من رواد المحطة ينكروا ان المتوفي عامل بالبنزينة
وجات الشرطة واخدوا 2 بس للشهادة من زباين المحطة وجوزي مش من ضمنهم
طبعا عايزين ينكروا ان المتوفي (( ربنا يرحمه ويثبته عند السؤال .. ارجو الدعاء له بظهر الغيب )) عايزين ينكروا انه من العمال لان طبعا مفيش تأمينات ومش عايزين يتحملوا مسئولية وفاة او يغرموا فلوس لانها حادث عمل
مش عارفة الناس مش بتتعظ من الموت ليه خصوصا لما يشوفوه بنفسهم
شوفوا كمية الذنوب (( هايشهدوا زور .. بيحرضوا الناس يشهدوا زور او يكتموا الشهادة .. اكل حقوق الناس .. ممكن يكون رب اسرة وياكلوا حقوق يتامى .. والله اعلم في ايه تاني))
جوزي قرر يطلع بعربيته وراهم للقسم ويشهد ان المتوفي كان عامل بالبنزينة وانه توفى اثناء تأدية عمله
من لم يكن الموت واعظ له _فلا واعظ له
((لَا تَكْتُمُوا الشَّهَادَةَ وَمَنْ يَكْتُمْهَا فَإِنَّهُ آثِمٌ قَلْبُهُ وَاللَّهُ بِمَا تَعْمَلُونَ عَلِيمٌ )) .. صدق الله العظيم