مش عارف هو دا صاحب الموضوع عنده عضويتين ولا دا حد تاني
انا عشان كده محتار... انا برضه صليت استخارة على نفس العربيتين.. ونزلت منصور احجز لقيتها اغلى 3000 جنيه
قلت انا مش هاخد دي علامة واسكت.. ربنا لو عايز يصرفها عني هيصرفها عني... وكلمت كذا معرض واحد فيهم قاللي ممكن ادهالك بسعر العرض فاتوكلت على الله
وللي أكدلي انه دي مشيئة الله انه مجرد ما نويت.. الفلوس ظهرت اصلاً قبل معاد ما كنت عامل حسابي.. واستلمتها يوم بدري
الموضوع مش انهي عربية فيهم احسن.... مفيش حاجة اسمها احسن اصلاً لأن دي سلع ولو في واحدة احسن من التانية على الاطلاق يبقى التانية موجودة في السوق ليه؟
كل واحد بيسأل ربنا المشورة في الحاجة اللي فيها نفعه هو شخصياً مش حاجة مطلقة.. ممكن يكون في ناس كتييييير شايفين انه الكروز عربية فاشلة... وتطلع بالنسبالي انا الذات السيراتو اختيار وحش لسبب ليه علاقة بطريقة سواقتي مثلاً أو براحتي النفسية
والله اعلم واللي معاه عربية ربنا يملاهالو بركة... والخناقى اللي حصلت في موضوع فيات دي غربية فعلاً.. ليه الناس متحفزين لبعض كده؟
متوسط السرعة في مصر دلوقتي 23كم في الساعة... في السعودية 40... يعني الناس اللي بتتخانق على اداء عربيات كلها اصلاً معمولة للمدن مش للسباقات.. اسمحولي اقولكوا انه في الاخر محدش فينا بيجري اوي... وعمالين اصلاً يركبولنا رادارات في كل حته... ف بالسلامة الجري اصلاً... اشتروا العربيات اللي تريحكوا عالبطيء عشان تستحملها في الزحمة
ﻷ مفيش مشاكل بس (مش إنت) هي الي دايقتني لإن حضرتك متعرفنيش عشان تقولهالي وحصل خير مفيش مشاكل
وأنا قولت في الاول بين الإتنين دول أختار السيراتو
عندك حق يا غازي باشا وأنا اكتر حاجة تهمني الأمان وطبعا الفيات أعلى في الأمان من الي كل في نفس السعر
سبف بلاش الكلمة دي لإن واضح إنها بتزعل الناس
طيب هو واضح أن الموضوع خلص والناس هديت وأنا مش عايز أفتح الصراع من جديد
لكن كعاده كل المناقشات عن الفيات و الكيا
وبالاخص السيراتو واللينيا
نفس المفاهيم
عالم فاكره فيات بى إم وكيا شركه تجميع عربيات فى بير السلم
وأخرين مش عارفين تاريخ فيات وفى خلط فى الاوروبى والكورى
يعنى من الاخر مفيش جديد
الحقيقه واحده ومتقبلش خلاف بين راشدين
أى واحد سواء بيفهم فى العربيات ولا مبيفهمش يعرف أن فيات تكنلوجيا وتاريخيا يعنى حاضر وماضى أفضل من الكيا
لكن الكيا فى مصر "الى أحنا عايشين فيها دى" منتشره أكتر من الفيات "الجديد" ودا دليل على حاجه واحده
أيه هى؟
أن الكيا فى سوقنا أفضل من الفيات
دى حقيقه
والله الى حابب يفهمها يفهمها
والى عايز يعيش فى الوهم وفيات بردو أجدع فى مصر لكش الزمن بيضحك على نفسه قبل غيره
ممكن حضرتك تفهمنى يعنى أيه كورى منزوعه الامان لأنى مستوعبتهاش
معندناش أير باجز مثلا
ولا مفيش abs
ولا مفيش esp
ولا مفيش ستيل براز كفايه
ولا الصاج ورق
ولا يمكن واخده نص نجمه فى الكراش تست
ولا يمكن سقطت وأنا مش متابع
ولا بنفرمل برجلينا على الاسفلت زى البسكلته
ولا أيه وسائل الامان فى مفهومك لو كيا مفهاش أمان
دى مشكلتنا
علشان عايز تقول كلمه حلوه فى حق عربيه أنت راكبها
وفى نفس الوقت تقلل من عربيه منافسه
تجور بكلام غلط على عربيه
فتصبح مخطأ فنيا فى كلامك ومتحيز فى وجهه نظرك
رغم حبى الشديد لعربيتى وأقتناعى التام أن سوق الفيات فى مصر ميت إلا أنى مقلتش فى يوم كلمه غلط ولا جورت على اللينيا
ودا الفرق
الكلمه دى ماشيه على الكل
الكل ميعرفش والكل بيقول هجس
ده الكلام المظبوط, و ده اللي كلنا محتاجينه و لازم نفهمه فعلاً...
حبك لاي براند او عربيه مايكونش على حساب التقليل من اي براند او عربيه تانيه او الاستهانه بيها...
فيات فعلا مالهاش سوق في مصر دلوقتي, لكن ده مش معناه انها قليله زي ما قال نورمال...
اوبل مثلا سوقها في مصر مش على حجم اسمها الكبير... هل ده يقلل من اوبل..؟؟ لأ طبعاً
كيا سوقها ما شاء الله شغال بنجاح, و ده معناه ان اكيد كيا بتعمل عربيات محترمه ترضي الناس,
و لو عوامل الامان في سيارات كيا في مصر قليله, فده مش عيب كيا, قد ماهو عيب البلد
و عيب الوكيل... احنا ماعندناش مواصفات قياسيه مصريه, يبقى العمليه هتبقى مالهاش ظابط و لا رابط
كيا لو بتنزل عربياتها في مصر بمواصفات بره كامله, و سعر بره كمان..!! مصر كلها هتشتري كيا
دي مش مشكلة كيا بس, لان كل البراندات اللي في مصر كده (إلا من رحم ربي) زي مرسيدس و بي ام مثلاً
حتى فيات و غيرها من الاوروبي بتنزل بدون esp و عوامل امان كتيير بتتشال منها, ده غير الكماليات...
يعني من الاخر ماحدش احسن من حد, لان كل البراندات دي في مصر بتحكمها سياسه واحده و نظام واحد
احنا متفقين تماماً ان فيات براند عريق و محترم و ليه تاريخ طويل في صناعة السيارات...
و كمان لازم نكون متفقين ان كيا بردو براند محترم و كبير, و بقى ليه باع في صناعة السيارات...
و الفكره الاساسيه و انت بتشتري عربيه مش البراند قد ما العربيه كويسه و محترمه و تناسبك ولا لأ
بغض النظر عن البراند, و الصناعه, و الانتشار, و كام واحد اشترى............. الخ
يبقى السيراتو مناسبه, و اللينيا مناسبه... لكن كل عربيه مناسبه لناسها, يبقى ليه نقلل من واحده فيهم..؟؟!!
لو في فرق او نقطة تميز عربيه عن التانيه نوضحه, لكن مانعيبش في اي عربيه بدون سبب او كده و خلاص
ده رأي بشكل عام, و اتمنى ان الموضوع ينتهي و مافيش حد زعلان من حد
تحياتي للجميع...