افيدوني بفكر انزل من 6 اكتوبر واعيش في فيصل

**mohamedrabia** · 14-09-2010 01:39 PM

[justify]
طبعا الكل هيستغرب ويقول حد يسيب الهدوء وينزل للزحمة بس هشرح ظروفي باختصار علشان مطولش عليكم بس عايز رايك بمنتهي المصداقية علشان رايكم يفرق معايا كتير انا الحمد لله متزوج وعندي بنتين وان شاء الله الثالث جي المهم اعمارهم متقاربة جداااا شغلي في القاهرة الجديدة مشوار صعب كل يوم بروح وارجع 130 كم بالعربية بنزين نار عربيتي نيسان صني 1600سي سي المهم الي خلاني افكر في القرار ده اني بجد تعبت من المشوار جدااا وكمان ارخص حضانة مدخل فيها البنتين هي الحصري بياخدو مني في الثلاث شهور للبنتين 1100ولازم اشترك 3 شهور مش عارف ليه وده ارخص شي في اكتوبر ومش عارف ليه برده في حضانة سالت عليها قالتلي 600 للطفل في الشهر مرتب عامل عندنا في الشغل يعني قلت كويس وتاني حاجة الرعاية بقا الطبية اكتوبر لتلاقي فيها مستشفيات كبيرة لو فكرت اروح ببنت مثلا علشان شوية كحة اصرف وانا واقف 200 او 300 جنية ويقولي جلسة بخار واكسجين وحوارات كتير جدااا مع العلم تحت دكتور كشفة 50 جنية مثلا زي الفل وكمان الخدمات قليله جداااا في اكتوبر بالرغم من انها مدينة قديمة في بجد مش عارف افكر ابيع الهدوء واستقراري باني اشتري شة في فيصل واستحمل الزحمة مع العلم ان اغلي حضانة في فيصل مش هتزيد عن 100 جنية تقريبا في الشهر وكذلك المدارس الخاصة مش غالية اوووي ولا انا عارف اني طولت عليك بس بجد يهمني رايكم اووووي وخصوصا اني محتار وخايف طبعا من تغيير الحياة بالكامل
[/justify]

**FunnyMickey** · 14-09-2010 01:44 PM

في اكتوبر وتروح فيصل

بالظبط زي اللي شغال مهندس في الكويت او السعوديه
وفجأه تقرر انك تيجي مصر
:)

طب طالما شغلك في القاهره الجديده
متيجي ياباشا التجمع الاول الخامس الرحاب لو امكانياتك الماديه مرتاحه

لو نص نص
ممكن الزهراء وتبقي جاري
وممكن الحي العاشر
وممكن الشروق العبور

اي حاجه من دول قريبه واسعار الحضانات والعلاج والمستشفيات وكل ده تمام جدا

وفيه الغالي اوي وفيه العادي اللي في المتناول

**ZALABANY** · 14-09-2010 01:58 PM

هو يا باشا بالنسيه للمسافه انت هاتوفر هوالي 30 كيلو اللي هما من فيصل لأكتوبر رايح جاي طبعا
بص الموضوع ليه مميزات وليه عيوب انا هاقولهالك بما اني من ساكني فيصل
اولا فيصل لو هاتستخدمه هاتكره نفسك من الزحمه يبقى تظبط نفسك عايز تسكن في فيصل تسكن جنب الدائري عندك بأه الطوابق وعندك اللبيني والأسعار متفاوته على حسب امكاناتك يبقى ما تفكرش انك تسكن بعيد عن الدائري لو عايز تسكن في فيصل
الجو في فيصل سئ جدا عادم سيارات ودخان وبلاوي على عكس جو اكتوبر
موضوع الحضانات اللي ب 100 جنيه مين قالك ان دي اغلى حضانه دي احلام يا باشا الحضانات في فيصل وصلت ل 500 و 600 جنيه وام 100 جنيه دي هاتلاقيها تعبانه جدا
طبعا فيصل يميزها كثرة الخدمات والمحلات التجارية والمواصلات
عايز نصيحتي تشوف زهراء مدينة نصر هاتبقى قريبه من شغلك
أو لو عايز ناحية فيصل والهرم خد في حدائق الأهرام جو حلو ونضيف زي اكتوبر وقريبه من فبصل والهرم والجيزه يعيبها فقط ان انت ما لكش مخرج غير من طريق الفيوم او تطلع الدائري من جنب دريم ودي لفه بعيده وما فيش تليفونات أرضي حتى الأن كله هوائي

**KoDaK_Gti** · 14-09-2010 02:17 PM

لو هتسكن فى فيصل يبقة شوف حاجة جمب الدائرى
غير كده هتكره نفسك

**hazoom2006** · 14-09-2010 02:21 PM

فيصل الناس دلوقتى نفسهم يسيبو فيصل

تقريبا ازحم منطقة فى العالم ودوشة جداااا مع احترامى لكل سكان فيصل

زى ماقال ميكى باشا خد شقة فى الامكان دى هتكون قريبة من شغلك وبرده هدوء وجميله

**mohamedrabia** · 14-09-2010 02:38 PM

[quote]هو يا باشا بالنسيه للمسافه انت هاتوفر هوالي 30 كيلو اللي هما من فيصل لأكتوبر رايح جاي طبعا
بص الموضوع ليه مميزات وليه عيوب انا هاقولهالك بما اني من ساكني فيصل
اولا فيصل لو هاتستخدمه هاتكره نفسك من الزحمه يبقى تظبط نفسك عايز تسكن في فيصل تسكن جنب الدائري عندك بأه الطوابق وعندك اللبيني والأسعار متفاوته على حسب امكاناتك يبقى ما تفكرش انك تسكن بعيد عن الدائري لو عايز تسكن في فيصل
الجو في فيصل سئ جدا عادم سيارات ودخان وبلاوي على عكس جو اكتوبر
موضوع الحضانات اللي ب 100 جنيه مين قالك ان دي اغلى حضانه دي احلام يا باشا الحضانات في فيصل وصلت ل 500 و 600 جنيه وام 100 جنيه دي هاتلاقيها تعبانه جدا
طبعا فيصل يميزها كثرة الخدمات والمحلات التجارية والمواصلات
عايز نصيحتي تشوف زهراء مدينة نصر هاتبقى قريبه من شغلك
أو لو عايز ناحية فيصل والهرم خد في حدائق الأهرام جو حلو ونضيف زي اكتوبر وقريبه من فبصل والهرم والجيزه يعيبها فقط ان انت ما لكش مخرج غير من طريق الفيوم او تطلع الدائري من جنب دريم ودي لفه بعيده وما فيش تليفونات أرضي حتى الأن كله هوائي [quote]

**أحمد كمال** · 14-09-2010 02:38 PM

من اكتوبر لفيصل مش هتوفر كتير من مشوار التجمع

تعالى مدينة نصر او التجمع الاول او الخامس

**msafa** · 14-09-2010 02:48 PM

كأحد ضحايا فيصل بقولك بلاااااااااااااااش
انتبه فان فيصل فيه سم قاتل

نتكلم جد:

مميزات:
خدمات 24 ساعة
ميكروباضات شغالى 24 ساعة
مطاعم 24 ساعة
افران عيش 24 ساعة
لو جنب الدائري تروح اي حتة في مصر في زمن اقل من ساعة (كارفور اقل من 30 دقيقة)
قبل العربية كنت بروح الساعة 4 و امان عشان في ونس
قريب من مدارس كتير محترمة اشي لغات اشي امريكاني اشي بريطاوي
خطة الغاز الطبيعي شغالة كويس

عيوب

الميكروباص قبل الساعة 1 بيقسم الخط يعني لو حد جايلك ممكن يستنى كذا ساعة لو جاي بعد محطة الطالبية
اوعى تفكر مجرد تفكير انك تمشي في فيصل قبل الساعة 3 الفجر و بعد الساعة 6:30 صباحا لأنك ببساطة ممكن تكمل 3 ساعات في فيصل بس
الشقق جنب الدائري غليت جدا، يعني انا شقتي غليت الضعف في 3 سنين و الاسعار اغلى من حتت في مدينة نصريعني انت هتبدأ تفكر من 200 الف نص تشطيب
الناس معاها فلوس بس غريبة ولا ينصح بالاختلاط
عوادم السيارات نتيجة للزحمة كتيرة
المدام هتلاقي صعوبة تروح مشوار لوحدها لو مفيش عربية عشان المواصلات
اسعار الفاكهة غالية شوية لازم تروح سوق التعاون
اسعار الخضار غالية شوية لازم تروح سوق التعاون

اتمنى اني اكون فيدك
لو حبيت اي مساعدة انا رقمي 0121876000

-

-

الموضوع: افيدوني بفكر انزل من 6 اكتوبر واعيش في فيصل

LinkBack

أدوات الموضوع

عرض

افيدوني بفكر انزل من 6 اكتوبر واعيش في فيصل - انشر الموضوع فى :

-

-

-

-

-

المواضيع المتشابهه

عايز انزل شويه افلام اجنبي ... انزل افلام ايه ؟

ازاى اروح 6 اكتوبر من فيصل

بفكر اعمل الصيانه للواجا في اوتو ماجد افيدوني

بفكر ابيع الغالية افيدوني ابادلها بايه

إقتراح لتعديل مروري بميدان الرماية (اكتوبر، الفيوم، الصحراوي، فيصل، الهرم)

الكلمات الدلالية لهذا الموضوع

المفضلات

المفضلات

ضوابط المشاركة