الي عايز يشتري فليشيا يدخل هنا
[SIZE="3"]بسم الله الرحمن الرحيم[/SIZE]
ناس كتير بتسئلني انا عايز اشتري فليشيا ابص علي ايه واشيك علي ايه وانا بشتريها
نصيحة عامة
1-اشتري فليشيا جيدة يا بلاش كل موديلاتها حلوة ولكن يفضل موديلات 97 شكل عادي و98 وش اوكتفيا و2000 انجكشن بس نادرة حبتين
2- اشتري GLX وبلاش LX الا اذا كانت ممتازة ولقطة عشان فرق الاوبشنز عزل الموتور والكبوت .
اولا فحص المحرك قبل اي شئ
طبعا غالبا الي هيبيع العربية هيكون مسخنها وهدور علي طول يعني لو في تاخير في الدوارة مش هتقفشة للأسف
1-اركب العربية ودور ممكن تديها دوسة بنزين خفيفة عادي لو العربية سندت نفسها بسرعة ومبطلتش قشطة كويس لو بطلت ممكن يكون في عيب بواجي او فلتر بنزين او جلد رداخ بس دي حجات بسيطة.
2- دارت العربية اديها دوسة بنزين تانية واستني ثواني لو صوت المكنه علي يبقي السخان بتاع الكربيرتير شغال لو مشتغلش يبقي بايظ او فيه مشكلة طبعا الكلام ده لموديلات ما قبل 2000 الكربيراتير العادي يعني.
3- لو السخان اشتغل المفروض يشتغل من 5-10 دقايق تبع ظروف الجو وبيفصل لما تديلة دوسه بنزين تانية ولو مفصلش يبقي بيعلق وهاكذا.
4- اثناء ما السخان شغال او حتي لو مشتغلش افتح الكبوت وبص هل في صوت خشونه جي من الناحية الشمال وانت واقف ادام العربية لو في يبقي الكتينة ممكن يكون في صوت اضافي زي ونه وده غالبا بيكون طرمبة المياة او بلي الدينمو الخ لو مفيش اصوات وصوت المكنه عالي عشان السخان وخلاص يبقي خير .
5- افتح غطاء الزيت عادي والعربية دايرة شوف هل في مياه علي الغطاء او لون طحيني لو مفيش كويس لو فيه يبقي محتاجة جوان وش سليندر.
6- بص علي الفاصل بين الوش وجسم المتور هل الجوان عرضة اكتر من ملي او جوانين مثلا
لو جوان دبل يبقي الوش اتخرط مرة لو جوانين احتمالية ان الوش يكون اتخرط اكتر من مرة او العربية محتاجة وش وعملت عمرة وخراطة و الخ.
7- وانت واقف لو في صوت خبط جي من ناحية التكيهات او نقر كده جي من ناحية التكيهات يبقي محتاجة زبط .
8-دلوقتي عدي اكتر من 10 دقايق المروحة اكيد اشتغلت لو اشتغلت اجري بص علي امبير الحرارة لو لسه مطلعش يبقي الصباع بتاع الحرارة خربان لازم يكون طلع فوق يعني 80 مثلا .
9-اثناء ما المروحة شغالة في صوت خارج من المروحة زي زنه هل المروحة شغالة وبتلف كويس .
10- دلوقتي المروحة وقفت اجري بص علي امبير الحرارة فصلت عند كام اهم حاجة ميكنش معدي ال90 .
11- بص علي اسلاك العربية يعني فيشة المروحة فيش الكشافات فيش التكييف ان وجدت لو لقيتها مقطعه وفي اسلاك كتير مش بتاعت العربية وملونه احمر وازرق وشريط لحام و كده يبقي سئ لو لقيت الفيش مزبوطة ومفيش لعب كتير يبقي كويس.
12- خلي حد يزود بنزين وانت واقف مكانك شوف حركة التقسيمة في بكرة بتلف ابطء من التانية لو فيه تباطء غالبا بيكون من طرمبة المياة خلي بالك .
13- اثناء ما حد بيزود بص علي الشكمان لو دخنه عادية بدون لون كويس لو دخان اسود يبقي كربيراتير محتاج زبط لو دخان ابيض يبقي متور خفيف لو دخان ازرق يبقي متور مفوت.
14- الفتيس هل في صوت خشخنة او ريحة شياط لو فيه يبقي اكيد محتاج بلية واسطوانة دبرياج سئ .
15-اركب العربية وخد غيارات وانت دايس دبرياج غالبا الاول والتاني بيبقو اتقل سنة لو غيراتك كويسة يبقي كويس
كده كشف المتور تمام
كشف الكهرباء
1-بطل العربية دور الكونتكنت
اول تكة المسوجر.
التانية اللمض بتنور بتاعت الزيت والدينمو والهاند ولو في انوار مفتوحة هتشتغل معاك حتي لو كان العالي.
الثالثة المارش هيشتغل هل في صوت خشونة او تفويت في المارش اول ما العربية تدور اللنض كلها تطفي ماعادا الهند لو كانت مرفوعة او اي نور مفتوح هيفضل دليلة موجود علي العداد في النص وهيفضل شغال.
2- جرب المساحات الامامية سريعا 3 سرعات شد الدراع عليك في اربع فساسات علي زوجين مياة موجودين امامي اضغط الذراع ضغطة خفيفة تشتغل المساحة الخلفية ضغطا اقوي للداخل تشتغل فساستين زوج واحد ورا ممكن تشوفها بالمرايا الوسطنية.
3- مراجة دراع النور والقلاب وممكن حد يساعدك.
4- لمبة الفرامل والانتظار.
5- جرب ذراير النور والنور العالي والشبورة كلو ليه دليل علي التابلوة لو نوروا ومظهرش الدليل غالبا بيكون في لعب في الكهربا حصل عشان الدليل واللمبة الشمال بيبقوا فيوز واحد الكلام ده علي نور التابلو والفوج والواطي والعالي.
يعني لو لبمة الشبروة الي في التابلوة منورتش يبقي لمبة الفوج الشمال متنورش:E_braces[1]:
6- شغل التكييف بص علي المروحة المفروض تشتغل بسرعتها الاعلي .
7- جرب البكر وشوف اتجاه الهوا والسرعات و خلافة.
8- لمبة الصالون .
9- لمبة الرجوع ولمبة المرشدير والاستوب.
10-عداد الاربي ام المفروض يكون علي 8 خد بالك وبيزيد مع التكييف الي 1 او 1.2 وكده لو وطي مع تشغيل التكييف يبقي في مشكلة في كهربة التكييف وسحب الهوا او لو وطي مع الانوار جامد يعني شغل كل الانوار المفروض يثبت او ينزل سنة بسيطة .
اختبار الفرامل
1-نزل الهاند بريك ودوس فرامل في صوت تنفيس قوي هل الفرامل محجرة لو كده يبقي السيرفو محتاج تغيير
ملحوظة السيرفو لو بايظ ممكن يخلي العربية تعلي وتوطي جامد مع الضغط علي الفرامل
2- شد الهاند تاني علي الاخر وحاول تمشي لو مشيت يبقي فرامل اليد فيها مشكلها وهي 10 تكات تبان قوتها ابتدء من التكه الرابعة او الخامسة.
3- طبعا علي الطريق هيبان الاصوات التصفير والحدف لو قي مشاكل بس ده كشف عام وموضوعنا عن الحجات الي نشيك عليها في الفليشيا بالذات.
اختبار السير
اركب العربية وامشي ومتنساش تنزل الهاند:E_braces[1]:
دوس بنزين عادي وامشي الاول عادي هات بعد كده
التاني لغاية 40 كيلو وبيكون عداد RPM 3000
الثالث لغاية 60 كيلو وبيكون عداد RPM 3000
الرابع لغاية 80 كيلو وبيكون عداد RPM 3000
الخامس يجيب 110 كيلو وبيكون عدادRPM 3000
العربية متحولش تضغط علي الغيارات بتاعتها بس ممكن توصل ل4000 عادي يعني والتاني يجيب كيلوا70
بعد ما لفيت بيها 10 دقايق بص علي امبير الحرارة لو تحت 90 قشطة
شغل التكييف هتلاقي في فرق في السحب عادي يعني متعملش الاختبار الاول وانت مشغل تكييف خد بالك
لو سخن العربية اكتر من 100 يبقي حمل وفي مشكلة خصوصا ان السربنتينة ادام الردياتير.
اقف وارجع بضهرك المرشدير اخبارة ايه لو ملقطش من اول مرة عادي هو لازم تتك يمين اوي وورا هتتعود عليه:8954[1]:
[COLOR="#ff0000"]تمام كده الاختبار خلص بس هديك ملاحظاتي علي الكلام الي اتكتب.[/COLOR]
.
1- الحالة العامة للعربية من خوارج وداوخل فبريكية لازم تكون جيدة والدواخل لازم تكون فبريكا .
2-حالة الدهان والسمكرة تقيمك انت بس الدواخل اهم وحالة الفرش والتابلوة والكراسي وخلافة.
3-اوعي تاخد بقراية العداد خلي عدادك هو حالة العربية.
حاجات متتنازلش عنها ومتشتريش العربية حتي لو كانت من بره عروسة
1- لو العربية جايبة طحينة او واخدة جوانين وش سليندر
2- لو العربية في عك في الكهربا كتير وبيبان بسهوله ( كباري واسلاك طاله متعرفش منين ولزق هنا وهنا)
3- لو العربية بتسخن اوي
4-لو العربية فيها دخنة زرقا او مفوته اوي
حاجات تنزل من تمن العربية
1- طبعا حالة الصاج الخارجي والحالة العامة.
2- لو العربية مفوته سنة العب علي موضوع الشنبر او جايز تبقي عامرة تنزل 2000 جنية وش او اكتير بس لازم تكون اي حاجة تانية ممتازة .
3- لو العربية فيها صوت عالي كتينة مثلا.
4-لو العربية فيها لعب بسيط في الكهربا.
5- حالة التكييف يعني موجود ومش شغال .
6- لو في بوش في الدركسيون.
7- في تقل في غيار نقلة معينة.
8- حاجة مش شغالة المساحات مثلا مكنة ازاز.
9- في خبطة في التصفيح الي تحت الموتور.
10-في تنقيط زيت من الفتيس.
وهاكذا وانت وشطرتك.
نيجي لتمن الفليشيا
العربية حالة يا جماعة ان شفت فليشيا ادامي اتباعت بي 47 الف كانت موديل 2001 ماشية حاجة بسيطة اوي من سنتين او تلت سنين.
وفي واحد كان عارض عربيته علي 45 الف موديل 2001 ماشية 15 الف بس كان اول كلامة بس انا استغليتها عشان هو مكنش عايز ينزل شلن بس بصراحة هي كانت واقفة اكنها في اجنس.
انا بدي مثال والاسعار دي خيالية بس لو واحد عارض عربيتة وحالتها ممتازة اكيد هيطلب فيها كتير واكيد واحد هتدخل قلبة العربية ويدفع.
عموما الرنج بتاع السوق
1- 95-96-97 فاضية من 27 الي 30 الف
2- نفس الموديلات مليانة تكييف وسنتر وكده 32 الف
3- 97 مليانة حالة ممتازة ممكن 33 الف
4-موديلات 98-99 من 29-32
5-نفس الموديلات ممتازة 35
6-موديل 2000-2001 من 33 الف
7-نفس الموديلات ممتازة ممكن 37 الف خلي بالك نادرة اوي الموديلات دي والي عنده مش بيحب يفرط فيها
