رجاء للساجاويين وكل من هو مقبل على شراء الساجا أو عنده استفسار

الإخوة الأعزاء أعضاء نايل موتورز بصفة عامة والبوتوناويين بصفة خاصة

لاحظت في الفترة الأخيرة كثرة الاستفسارات وبعض الاتهامات للساجا
والكلام ده كله ردينا عليه قبل كده وللأسف يبدو أن بعض الإخوة بيستسهلو ومبيعملوش بحث في المواضيع القديمة

عمموماً علشان احنا شعب بيحب يفتي وده مش عيب بس لما نفتي في حاجة مجربناهاش أو نفتي بناء على إشاعات غير معلومة المصدر يبقى ده عين الغلط

وللمرة الألف برحب بأي استفسار أحاول بمعرفتي المتواضعة كوني مش خبير سيارات ولكني جربت الساجا فترة مش بطالة

(من شهر 12 2009)

موبيلي 0101696033

وطبعاً مع إن العربية دلوقتي منتشرة وبقت معروفة ومع ذلك برحب بأي حد يشرفني في العاشر لو عايز يتفرج على العربية

وعلشان احنا بنكسل :36_1_50[1]: قررت وضع رابط الموضوع الجامع لأهم المواضيع التي تخص الساجا

http://www.nilemotors.net/Nile/160796-proton-saga.html

وعلشان محدش يقول لأ في حاجات متكتبتش ياريت تساعدوني والردود تشمل كل المواضيع عن الساجا واللي مش موجودة في أهم المواضيع

نقطة أخيرة أتمنى من ملاك الساجا واللي تشرفت بمقابلة بعضهم يكتبوا تجربتهم ببعض التفصيل من وجهة نظرهم بصرف النظر الموضوع ده اتكتب عن طريق ناس تانية قبل كده لأن زي ما احنا عارفين في الإعادة إفادة علشان محدش من حبايبنا هنا يحصله زي ناس شفتهم اشترى عربية تانية وندم انه مجبش الساجا لأنه مكنش عنده معلومات كفاية عنها أو لأنه وصلته معلومات غلط من ناس مبتراعيش إن رأيهم ده أمانه

شوف يا اخي العزيز انا قرأت جميع المواضيع الخاصة بالساجا في القسم وحفظتها عن ظهر قلب وده بسبب اني مقبل في الفترة المقبلة على شراء السيارة وحجزتها بالفعل واستلامي سيكون في غضون بضعة ايام ان شاء الله وعايز اقول لحضرتك انو انا كنت واضع ميزانية 50 الف في البداية لـ الإسبيرانزا ال 113 ولكن رفعت الميزانية شوية وبقت بيكانتو ولكن لما شفت حجم الساجا وامكانيات المحرك الخاص بها بصراحة خلعت من الـ i10 والبيكانتو ولزقت في الساجا ولكن انا مقتنع تمام الإقتناع بأنو يا اخي من جاب العربية عن اقتناع وفيها مصايب وفيها بلاوي وعيوب تصنيع سيتقبلها ويتماشى معاها بل ويمكن كمان يحول يطور من اداء العربية لكن لو مفروضة عليه وحاسس انها غصب عنو لو الإزاز بينزل ببطأ شوية يا يقولك ده عيب تصنيع والتوكيل اصلوا وبيعمل وبيفصل حكايات في السيارة وعايز اقول لحضرتك انو لو انا اشتريت مثلا اي سيارة اخرى بدون تسمية إحتراما للسيارات الأخرى التي تصل لـ 72 الف لو 66 الف او او او والناس كلها عارفة انا اقصد ايه وجيت بعدها شفت محرك الساجا اللي الكل بيشهدوا بالعالمية ومعلش لما اشوف انو في شركة منزلة فيتيس اوتوماتيك عالمي بـ 68 يبقى الشركة دي تستاهل اني ارفعهلها القبعة وشكرا لكل الكوري والياباني اللي اقل خاحة اوتوماتيك فيه بـ رقم فلكي عشان كده ها احس بنغصة في حلقي مما ها اقعد بقى اقول اصلي مجبتش الساجا عشان مش ثابتة على سرعة 200 كم:d وهل ده يعتبر تقييم عقلاني للسيارة !!!!!!!!!!! او اللي يقولك صاجها ضعيف !!! صاجها 6 ملم وانا والدي معاه الشارك وصاجها حوالي 8.5 وعايز اقولك انو بيتني من اقل سندة عليه هوة انا جبت العربية وقدمت المشيئة وكمان قدمت انو العربية بدأت تتخبط والصاج بتاعها كمان ضغيف وبيتني يبقى احتراما لكل السيارات اللي ماشية في مصر احنا محتاجين دبابات هية الوحيدة اللي صاجها كويس :d ولكن انا بصراحة وعشان اكون موضوعي انا شايف انو يعيب الساجا غلو قطع غيار السيارة ولكن ابعد عن مشاكل استهلاك البنزين والكلام الفاضي ده لأنو انتا شاري عربية عارف امكانيات محركها وعارف هيا ايه وبتمشي ازاي ولكن حتة غلو قطع غيارها مقدور عليها لأنو انا مجبتش عربية موديل 2010 عشان افكر اني ها احتاج قطع غيار قبل الـ 50000 كم ودي كانت نفس مشكلة الـ الجين تو والبيرسونا ولكن نقدر نقول انا ان شاء الله مدام مقتنع بيها ها ابلعها وها تبقى على قلبي زي العسل ههه وعلى فكرة انا بحيي حضرتك لأنك كنت اول من اشترى السيارة في المنتدى واول موضوع انتا اللي عملتوا عشان تكذب الناس كلها واشترتها عن اقتناع وحبك ليها كان بيزيد يوم بعد يوم وتحياتي الشديدة لك اخي والف الف الف مبروك وعقبال 100 سنة بيها يا رب ومتأسف جدا للإطالة عليك يا اخي الكريم ..

وعايز اقول لحضرتك على حاجة معنى او انا ابقى شخص مستهلك ومقبل على شراء سيارة ممتازة بهذه الكائة وحتى معرفش انو بروتون منزلة سيارة جديدة ده عيب فظيع من التوكيل كفاة انو في عربية مشابها لها من قبل ما تنزل مصر فضلوا يقولوا العربية بتطير بس مبتشربش وبتغيير بس مبتقلش وحاجات غريبة كده :-d وكانت فعلا العربية صفقة رابحة لأصحابها وملاكها وفعلا ربنا يباركلهم فيها لأنها فعلا عربية تستاهل ولكن كلمة سعر اعادة البيع ده شق انا حتى مش عايز اتكلم فيه لأنو بصراحة بحس انو استهتار بعقول الناس ......

أشكرك أخي الكريم على ردك واتفق معاك في كل اللي قلته

بالنسبة لعدم وجود إعلانات فعلاً ده عامل مؤثر وان كانت في عربيات تانية ملهاش إعلانات وبرده شغالة بس منكر تأثير الإعلانات

عموماً الساجا وضعها مختلف لأنها بتكتر في السوق بمعدل سريع (نسبياً رغم محدودية الكمية المتاحة للبيع)

وكلمة واحدة تسمعها من مالك السيارة أبلغ من ألف إعلان حتى لو قالو فيه العربية بتجيب عروسة معاها :C_laugh[1]:

نحن لا ننتقص من قيمة أي سيارة أخرى

احنا بس بنقول العربية دي حلوة وتستاهل

هو يا باشا انا بفكر حاليا في حاجة اوتو و في نفس الوقت مفيش فلوس كثير و بفكر فعليا في الساجا بس لما بقارنها باللوجان بصراحة بحس اني مش قادر ابعد عن لوجي و هقلك ليه و قلي انا صح في ايه و غلط في ايه علشان انا بفكر جديا اني استنى شوية و اعلي شوية و اجيب صني او اوبترا
1- بحس انها ضيقة انا مركبتهاش بس بشوفها من برة
2- شنطتها اخبار وسعها ايه؟
3- سحبها مع الاوتوماتيك عامل ايه؟
4- اسعار قطع الغيار مقلقاني خصوصا بعد ما رينو ما رخصت اسعار قطع غيارها
5- ايه موضوع علبة الدريكسيون اللي بيتغير في بعض العربيات ده؟
6- التوكيل بردو مخليني مقلق لأني قرفت من الميكانيكية في عربية الوالد و قلت مش هصلح غير في التوكيل و رينو كمصنعيات مبيفرقش عن برة كثير

اقتباس:

---

المشاركة الأصلية كتبت بواسطة gebreel

هو يا باشا انا بفكر حاليا في حاجة اوتو و في نفس الوقت مفيش فلوس كثير و بفكر فعليا في الساجا بس لما بقارنها باللوجان بصراحة بحس اني مش قادر ابعد عن لوجي و هقلك ليه و قلي انا صح في ايه و غلط في ايه علشان انا بفكر جديا اني استنى شوية و اعلي شوية و اجيب صني او اوبترا
1- بحس انها ضيقة انا مركبتهاش بس بشوفها من برة
2- شنطتها اخبار وسعها ايه؟
3- سحبها مع الاوتوماتيك عامل ايه؟
4- اسعار قطع الغيار مقلقاني خصوصا بعد ما رينو ما رخصت اسعار قطع غيارها
5- ايه موضوع علبة الدريكسيون اللي بيتغير في بعض العربيات ده؟
6- التوكيل بردو مخليني مقلق لأني قرفت من الميكانيكية في عربية الوالد و قلت مش هصلح غير في التوكيل و رينو كمصنعيات مبيفرقش عن برة كثير

---

1- العربية مش ضيقة خالص وهي اوسع من اللوجان .
2- شنطتها واسعة جدا جدا انا ما شوفتش اللوجان بس هي واسعة فعلا .
3- السحب معقول جدا لو انت مش من محبي الجري يعني 140 وما فوق انا عشان لسه بلين فمعدتش ال 100 وفي الكباري لو ماشي 90 مثلا بتلاقي العربية اوتماتك بتجيب 80 وده طبيعي غير كده العربية موتور رياضي .
4- قطع غيار الرينو اللوجان ارخص بس العربية جديدة يعني على الاقل سنة انشاء الله وتفكر تغير حاجة وساعتها اكيد عتكون رخصت انشاء الله مع انها مش غالية بالطريقة اللي انت متصورها وفي موضوع في المنتدى عن الاسعار .
5- انت ممكن تتاكد من علبة الدريكسون قبل ماتاخد العربية من مكان زيت الياور لو اقيته على max يبقى تمام وعلى فكرة الموضوع ده في عربيات قليلة جدا بجد .
6- التوكيل لحد دلوقتي محترمين وعشان اطمنك ان فيه متابعة دايما من مالزيا وممكن تشتكي لهم لو ما حلوش في مصر عشان كده هما بيخافوا ويحلوا علطول او هما محترمين من غير حاجة والله اعلم .
حاجة اخيرة انا اخوي كان عاوز يجيب مازدا 3 لكن بعد ما ركب عربيتي بقى عاوز يجيب الجن 2 قاللي على الاقل ارخص وامكانيتها جامدة بس بصراحة انا نفسي يجيب المازدا ومع احترامي للجن 2 المازدا وهمية.

الأخ gebreel أهلاً بيك معانا

انا متفق مع الأخ totosaga في كل النقط اللي قالها وأحب أضيف نقطتين

الأولى تأكيد على قوة سحب العربية (اللي معايا مانيوال)

رحت بيها مشوار العين السخنة وكنا 4 كبار واربع أطفال وكنت مشغل التكييف وماشي على سرعة 165 واتاخدت رادار

التانية شوف انت عندك ايه زيادة في الساجا مش موجود في غيرها (بارك سينسور-جنوط اسبور-جهاز انذار) وشوف يفرق معاك كام

أخيراً حضرتك بص على اللوجان من تحت وبص على الساجا من تحت وياريت تقولنا رأيك إيه

بص انا ليا راي حاول تشوف تست درايف للعربية عشان تجربها وصدقني لو جربتها عتشتريها علطول لانها عتكون احسن من اللي انت متوقعه لان ده اللي حصل مع كل اللي جابوا الساجا انا شخصيا عجبني موضوع الاوتوماتك فيها وسحبها للبنزين كويس جدا مش زي ما كان الناس مخوفاني منها ويقولوا سفاحة بنزين احنا للاسف بنهول المواضيع جامد وعلى العموم في كل الاحوال صلي استخارة طالما محتار وربنا يوفقك للي فيه الخير

اقتباس:

---

المشاركة الأصلية كتبت بواسطة allo

أخيراً حضرتك بص على اللوجان من تحت وبص على الساجا من تحت وياريت تقولنا رأيك إيه

---

رأيه فى أيه ؟

الف شكر يا جماعة بس نفس سؤال ذكر الله على موضوع ابص على ايه؟ اصلا اللوجان مصفحة من تحت

اللوجان فعلاً عالية بس جنب العجلتين اللي ورا جزئ نازل

تاني حاجة بص على تقفيل الساجا من تحت هتلاقيها زي متكون متغطية بشكل نضيف

هحاول أصور العربية من تحت لما أروح المغسلة وياريت حد من ملاك اللوجان يصورهالنا من تحت

أنا ما شفتش الساجا من تحت بس شفت اللوجان
اللوجان متفقله تماما ومفيش اى حاجه باينه
مش فاهم حضرتك تقصد ايه بحاجه نازله جنب العجل