التيجو و الa516 والـ....جيب شيروكي
السلام عليكم:
طبعا العنوان يشد شوية للقراءة...
ايه اللي جاب ده لـده لـــده ؟؟؟
الحكاية ببساطة اني والحمد لله عندي التيجو 2000سي سي...وفي الشغل بأركب عربية a516 وركبت في الشغل بردو الجيب شيروكي مو2010 وطبعا كعادتي حاولت اقارن بينهم بالرغم ان الواحد للوهلة الأولى يقول طبعا الشيروكي تكسب!!
ولكن تعالوا نبدأ :.......
1- التيجو..عربية قوية بالمقارنة بالفئات ال1600 سي سي وعالية وناعمة في الجري وناعمة في الإستخدام...بمعنى انك وانت سايقها تحس ببساطة وخفة السيدان العادية في كل حاجة بالإضافة لإرتفاعك عن الأرض وده بيزيدك احساس بالراحة والمتعة
لكن فقيرة شوية في التشطيب الداخلي رغم زيادة الكماليات فيها عن عربيات كتير زي السيراتو وحتى الجيب نفسها...مثلا فتحة السقف تقفل لوحدها لو شيلت مفتاح العربية من الكونتاكت لزيادة الأمان عكس السيراتو والإلنترا و.....
الزجاج يقفل لوحده لما تسوجر العربية بالريموت عكس الجيب وهكذا شوية حاجات كدة لكن ضعف التشطيب الداخلي لا يعطيك نفس الإنطباع الخارجي للسيارة.......خلاص
2- ال516....لأول وهلة القعدة بتاعتها سيئة جدا..تلاقيك قاعد غطسان لتحت مش قادر تجيب ابعاد العربية كويس مع ملاحظة ان الكرسي لا يرتفع عن وضعه الأصلي
العفشة بتاعتها باين جدا انها ضعيفة
العربية عزمها حلو وبتشد كويس وصوتها هادي
متزنة على السرعات العالية الى حد ما على الأقل احسن 100 مرة من الفيرنا
التكييف زي الفل احسن من التيجو لأنه بيتلج بجد في عز الحر والشمس وكمان مش بكرات زي التيجو...بصراحة كان مفروض يحطو في التيجو تكييف متقدم زي كدة...شاشة وتاتش و.....
الكاسيت بتاعها رخم جدا وخاصة صوته مش قوي ومافيش فيه تسجيل للمحطات سريع زي اي كاسيت تاني....وطبعا بدون ريموت والدلع اللي في التيجو
بصفة عامة كويسة على سعرها بس عايزة استخدام خفيف وناعم قدر المستطاع.....ماشي
3-الوحش المسمى الشيروكي 3700سي سي
طبعا مفيش مقارنة كقوة عربية لأنها أسد ماشي على الطريق...يعني تضغط بقوة على بدال البنزين تسمع صوت رعد من الموتور والعربية بتطير بيك وكل الخلق وراك....عفشتها جامدة صحيح بس ناشفة جدا...صاحب العربية بيقول ظهره بيوجعه لما بيسافر بيها مسافات كبيرة وده في رأيي عيب جامد....تكييف زي الفل...تشطيب بالنسبة للشيروكي وسعرها يعتبر متواضع...وما حدش يتفاجيء من كلامي لأني شفت أحسن من كدة في عربيات تانية
العربية ناشفة في كل حاجة...الدركسيون ناشف جدا مع انه باور...حتى دراع الإشارات ناشف
زي ما يكون عاوزة واحد عضلات يركبها مش واحد عادي....
العلو بتاع العربية جميل جدا لكن العربية على السرعات العالية في الملفات خطر جدا...سافرت بيها اسكندرية ومشيت على 160 كانت ثابتة جدا وتقيلة لكن لو ملفات بتكون هتتقلب فكنت بأهدي غصب عني
من الآخر....ربنا يبارك لنا في التيجو لأن بصراحة كدة وبدون زعل....مش لاقي سبب قوي يقنعني بسعر 340,000 ج للشيروكي.....على ايه كل ده؟؟؟
حلوة وشيك وقوية لكن السعر ده عالي جدا بالإضافة لضريبة محترمة للـ3700سي سي واستهلاك بنزين فظيع جدا جدا
بصراحة هي منظر أكتر منها كونها عربية عملية بالنسبة لنا في مصر......والله أعلم
أنا طولت عليكم بس حبيت انقل تجربتي
والسلام عليكم ورحمة الله وبركاته
م.ياسر
