السلام عليكم ورحمة الله وبركاته
اخى الفاضل اسمحلى اقولك رأى فى السياره من واقع عملى
العربيه البرليانس عربيه محترمه واثبتت كفائتها زى ماركات صينى اخرى وبصراحه اغلب الى راكبين العربيه ماشتكوش كتير منها الافى حاجات بسيطه ولا تعد عيوب فى السياره
وسبب قلة انتشارها مش عشان العربيه وحشه الفكره كلها (من وجهة نظرى الشخصيه وقد تكون صحيحه او تكون خاطئه) ان فى فرق لما يكون وكيل بيخدم ماركه واحده او حتى ماركتان فى نفس الفئه بتلاقى اهتمامه كله بيصب فى مصلحة الماركتان بالتساوى لكن لما يكون الوكيل لديه ماركتان واحدهما اقوى بكتير من الاخر فأكيد الاهتمام كله هايصب فى مصلحة الماركه الاقوى حتى وان حاول العكس فأكيد الماركه الاقل هاتتظلم
وعايز اقولك ان فى عربيات فى بلدنا جميله جدا بس للأسف بتحتاج اهتمام وفى نفس الوقت فى عربيات مش قد كده وواخده اهتمام زائد
وعايز اقولك انى مازلت بقول ان انتشار العربيه ليس مقياس للنجاح انا معاك انه فعلا بيبقى عامل رئيسى فى رخص اسعار قطع الغيار بس صدقنى صعب الواحد يركب عرييه وحشه وفيها عيوب ويتغاضى عن كل ده فى سبيل ان قطع غيارها منتشره وفى نفس الوقت صعب الواحد يبعد عن عربيه حاببها لقلة انتشارها والدليل على كده ان اكتر عربيه كانت الناس بتشتم فيها وتقوك دى افشل عربيه حصلت (بدون ذكر ماركات )اصبحت دلوقتى سيارة المصرين الاولى والسياره الاكثر انتشارا فى مصر (بناءا على الاحصائيات)ومافيش شارع ماتشوفهاش فيه
اما بالنسبه لاسعار قطع الغيار انا معاك ان فى توكيلات اسعار قطع غيارها غاليه بس ده شئ طبيعى بالنسبه لعربيه زيرو لكن صدقنى ده بيكون فى بداية ظهور العربيه لكن فى فتره قليله بتلاقى الامر اختلف وفى بعض التوكيلات بيراعى موضوع رخص قطع الغيار لأنه اهم اسباب انتشار السياره
وعايز اقولك ان اول حاجه تعملها فى شراء السياره تصلى صلاة استخاره زى ماقال العضو المحترم
وتانى حاجه تسأل الى راكبين العربيه هما اكتر ناس هايفيودك مع العلم انك هاتلاقى اراء مختلفه تماما يعنى ممكن تلاقى ناس راكبينها تقولك دى افشل عربيه وافشل توكيل وتلاقى ناس تقولك ده انجح عربيه وانجح توكيل واختلاف الاراء ده شئ ناتج عن اعتماد الناس على مقاييس مختلفه للحكم على نجاح السياره او فشلها ومن الممكن انها تكون مقاييس صحيحه او خاطئه
والخلاصه فى الحاله دى لما تسأل الى راكبنها ويقولولك العربيه ممتازه اسألهم ممتازه ازاى وايه الحلو الى فيها والى يشجعنى اشتريها وايه اكتر حاجه عاجباكوا شخصيا فيها
ولو قالولك دى فاشله اسألهم طب فاشله ليه وايه اكتر حاجه مضايقاكم فيها ؟
لأن ممكن يكون شخص مش عارف يتعامل مع العربيه وبالتالى ظهر معاه حاجه نتيجه للموضوع ده فيحكم عليها بالفشل
وبعد ماتسمع اكبر قدر من الاراء تحاول تفلتر الاراء دى وتشوف العيوب والمميزات
وتقرر هل الحاجات الى الناس حكمت عليها انها عيوب فى العربيه ممكن انك تتغاضى عنها فى سبيل انك شايف انها حاجه ممكن تكون طبيعه من وجهة نظرك او ماتضايقكش
وفى نفس الوقت المميزات هل هى كافيه بأنها تخليك تتغاضى عن الحاجت دى
وفى النهايه ارجو انى اكون افادتك وماكنش طولت عليك ولو عندك اى استفسار بخصوص اى عربيه انا موجود
وربنا يخترلك الاصلح والاحسن
مشاركتى دى مش هجوم على ماركات اخرى او هجوم على اراء الاخرين ده راى الشخصى وللافاده فقط ومن الممكن ان يكون صحيحا او خاطئا
ولو حسيت ان الامر دخل فى الجدال او الهجوم غير المجدى مضطر انسحب لانه مضيعه للوقت مش اكتر