الموضوع: شكلها باظت

اللف اللف مبروك على العربيه ...
اولا بالنسبه للحراره بجد بتعدي النص ؟؟ طب اتأكد من الميه..
اما بقيت الحاجات إلى قولت عليها طبيعي جداا في اوا 5000 كيلو و بعدين لما تروح التوكيل وتغير الزيت كله هيبقى فل ..
بالنسبه لحوار الفرامل ماتقلقش منه ..و اي حاجه انا تحت امرك

ربنا يخليك ويطمن قلبك زي ما طمنتني

انا هتأكد من المية

بس لو لاقيتها ناقصة ازودها منين

واعرف منين اصلا انها ناقصة ؟؟؟؟؟؟؟؟؟؟
وايه احسن مياه ازود بيها وبتتباع فين

السلام عليكم و رحمة الله و بركاته
على فكرة ده اول رد ليه في المنتدى و اتمنى ان شاء الله افيدك
اولا الف مبروك على العربية و هيه ان شاء الله هتكون عند حسن ظنك
انا هفيدك باللي اقدر عليه علشان العربية بقالها معايا اربع سنين و اتعلمت منها كتير

بالنسبة لموضوع المؤشر الطبيعي اللي لازم و بكرر لازم تكون عليه قبل النص بحاجه ضغيرة
و الصورة اللي انا حاططهالك كنت مصورها من سنة و شهرين كده
اتفضل:

Uploaded with ImageShack.us

اي حاجه غير كده تأكد ان في مشكلة
طبعا لازم تشيك على الميه اللي هيه موجوده في القربة عبارة عن علبة بلاستيك بغطا أصفر موجوده اول ما تفتح الكبوت على ايديك اليمين اقصى اليمين من فوق في الركن
هتلاقي علامة محفورة على القربة min و max
لازم يكون مستوى الميه بينهم و غالبا لازم يكون في ضوء عالي شويه علشان تشوفه
لو اقل من ال min لازم تزودها ميه خضراء

بس انا اعتقد ان غالبا هتبقى المشكلة في القربة او الغطا علشان غيرتهم قبل كده مرتين لان بيكون في مشكلة من الاتنين دول في القربة
1. جوه الغطا الاصفر بتاع القربة في كده بلف كاوتش ساعات بيضرب و بيبخر حاجه بسيطة كده بس مع الوقت بيخلص الميه
2. من كتر فتح و قفل القربة الرقبة اللي بتتربط فيها غطاالقربة بتنعم علشان بلاستيك و بتسرب ميه

فرضا المشكلة في كده لازم تجيب غطا و قربة اصلي بكرر اصلي علشان مش كل شوية تغير

ممكن ما تكونش المشكلة مشكلة قربة خالص و تكون المروحة فيها حاجه مش مظبوطة او السنسور بتاعها او ممكن غطا الريداتر الفيبر الأسود اللي بيغطيه من فوق انشق و بيسرب مياه بسيطة لحد ماااااااا تخلص
انا بكلمك من الحاجات اللي حصلت قبل كده معايا و الحاجات دي طبيعية جدا في اي عربية خاصة مع ظروف التشغيل المصرية و طول ما ايدك عليها هتعيش معاك بجد و هتبقى تحت ايديك و ابسط مثال اديك شايف اللانوس ماشاء الله عربية رائعة جدا جدا بالنسبة لجو مصر و بكررلك بالنسبة لجو مصر العام الطرق و الشوارع و الزحام و كل شويه اول تاني و الحرارة كل ده بيأثر

علشان كده انصحك تروح ميكانيكي كويس يكشف عليها و بجد بحذرك بحذرك انك تمشي بيها كده علشان ما تدخلش في موال وش السلندر و الكرنك اصل حصلي من سنتين كده مشكله كبيرة جدا بسبب الحرارة هبقى احكيلكم عليها ان شاء الله في المنتدى

تحياتي و ابقى طمنا عليها

معلش هزودلك حاجة بسيطة
كل الحاجات اللي كاتبتهالك و اللي من الممكن تكون هيه المشكلة
تمنها بسيط مش غاليه و متوفرة بس في الاماكن اللي بتبيع حاجات الاوبترا علشان هتلافي قربة كده ب اسعار كده بسيطة حدا مش فاكر حوالي 40 انتبه و اوعه تشتريها هات اللي نفس اللي موجود عندك هتلاقيها الخامة كده سميكة و تقيلة
الغطا بيتباع لوحده

غطا الردياتر حوالي 170 جنيه بالتركيب

المروحة في أسوء أسوء الظروف الأصلي من المحلات النضيفة اللي بتشتغل في الاصلي مش التوكيل و ممكن ادلك عليها علشان مش اي محل بيقول حاجته اصلية بتبقى كده خلي بالك المهم بتبقى حوالي 250 جميه آخر سعر من 4 شهور سألت من باب العلم بالشىء

انا عمال بكتبلك كل اللي اعرفه علشان ما تقعش في اللي وقعت فيه و تصرفلك حوالي 5000 جنيه و تتحرم من عربيتك شهر لا قدر الله
بس مشكلة الحرارة ما يتسكتش عليها

ان شاء الله الحوار مش هيعدي كون ان الميه خالصانه او القربة فيها حاجه
انا بس كتبتلك المعلومات دي علشان يمكن تنفعك بعد كده
او تنفع اللي بيقراها

و بالنسبة لعداد ال rpm هيه عربيتك مانيوال و لا اوتوماتيك
لان انته بتقول لسه مش واخد عليها و كده فممكن يبقى رجليك لسه مش واخد على الدبرياج و التوازن مع البنزين بالمقارنة ب اللادا

اول حاجة مبروك على العربية
وربنا يديك خيرها و يكفيك شرها
تانى حاجة مع احترامى لكل الردود
العربية زيرو يعنى فى الضمان
يعنى كل الحجات دى من القربة الى الصاروخ فى الضمان
يعنى حضرتك تروح للتوكيل و بسرعة لان الحرارة خطر كبير جدا على السيارة و المفروض الحرارة لا تتعدى نصف المؤشر
وقول لهم على كل الشكاوى الى عندك و بأذن الله تكون بسيطة
و بلغهم فى خدمة العملاء ان عندك مشكلة حرارة علشان يدوك ميعاد بدرى و لو لاقيت الميعاد بعيد رو ح الساعة 9 صباحا فرع القاهرة الجديدة و غلس عليهم علشان يقبلو العربية بدون حجز و ان شاء الله هايقبلوها بنسبة 99 % علشان مشكلة الحرارة
و ما تمشيش عليها لغاية لما تشوف مشكلة الحرارة
و خلى بالك اول الف كم ال rpm المفروض ما يعديش 2.5 و ماتولعش التكيف
اما عن نوع المياة فا فى انواع كثير احسنهم ac delco و دة هاتلقية فى مراكز بيع قطع الغيار فى منصور
او موبيل و دة هاتلاقية فى بنزينات موبيل
او المياة من اى سوبر ماركت ملحق بالبنزينات او عند كارفور بس اختار مياة تكون made in usa ( امريكى )
لو اى حاجة غير ال ac delco تكون مجهزها معاك و انت رايح التوكيل
طب عن تزويد المياة بنفسك نصيحة ما تزودش المياة بنفسك اول مرة لان لية طريقة فى قفل الغطاء علشان القربة مايحصلهاش حاجة و كيفية اخذ الهواء بعد تزويد المياة ( خلى الفنى يشرحلك الطريقة )
و بالتوفيق

المشاركة الأصلية كتبت بواسطة kamalsalem

مبروك عليك.. انا برضه من بولونيز 88 لكروز 2010.. ونفس احساسك.. يعني ايه حساسات؟ بيبقى شكلهم ايه؟ وبرضه مشيت عالهاند بريك مرفوع

العربيات الجديدة متصممة تسخن بسرعة.. مفيش حوار تسخن قبل ما تطلع ده... بس لو بتعدي النص بص ع المية.. عادي انه عربية زيرو ميتها تنقص ماهي شافت الويل في البحر على ما جت مصر

موضوع الاربي ام متخافش الموتور ده بيحب يشتغل ع العالي سنة

المشكلة يا اخ كمال هوه كاتب ان المؤشر بيرتفع عن النص و عن الطبيعي اللي في الصورة
و بالنسبة لعربية زيرو زي ما هوه كاتب
يبقى في حاجه مش صح؟