أيهما افضل الفيرنا ام اللانوس ام الإسبيرانزا؟؟؟؟؟؟؟

**mostafabakry** · 28-05-2007 12:37 AM

السلام عليكم ورحمة الله و بركاته
اولا شكرا لكل القائمين علي نجاح هذا المنتدي الأكثر من رائع وبصراحة انا سعيد جدا لوجود مثل هذه النوعية من المنتديات المفيدة والتي لها مردود ايجابي في حياتنا العنلية و الواقعية مرة اخري كل التقدير و الإحترام لهذا المنتدي ولكل من يساهم في نجاحة بهذه الصورة
لقد قررت ان اشتري سيارة جديدة بإذن الله و لكني في حيرة شديدة جدا في اختيار ما يناسبني
و بصراحة محتار ما بين الإسبيرانزا و الفيرنا و اللانوس
خاصة وانا من ابناء محافظة قنا ومشكلتي هي في خدمة ما بعد البيع طبعا الفيرنا و اللانوس لها مراكز صيانه في قنا و بالطبع اكيد الإسبيرانزا لأنها تتبع لنفس وكيل الدايو في مصر ابوالفتوح
لذلك انا محتار ما بين الثلاثة
ممكن حد يساعدني في توضيح الفروق ما بين الثلاثة او علي الأقل ما بين الفيرنا و الإسبيرانزا
لكم مني جزيل الشكر
م/ مصطفي

تم النقل بمعرفتي
مشرف هيونداي

**sh_masry** · 28-05-2007 12:59 AM

نفس اللى رديت عليك بيه فى contact cars

**memo_hefnawy** · 28-05-2007 08:00 AM

منور يا باشمهندس و أهلا بيك فى نايل موتورز و يارب مشاركاتك لا تقتصر على السؤال على السيارة الجديده و بس :) عايزين نشوف لك مشاركات كثر إن شاء الله :) و تكون مندوبنا من قنا :)

شوف يا سيدى الفاضل إنت فى قنا مش فى القاهرة يعنى محتاج عربية متنزلش عشانها القاهره كثير سواء لصيانه أو قطع غيار أو أى حاجة و الأفضل فى مثل هذه الظروف أن تكون سيارة منتشره جدا و تقريبا جميع الورش و الميكانيكية حافظينها و قطع غيارها فى كل مكان و بيعها مفيش أسهل منه بغض النظر عن مراكز الصيانه بتاعت الوكيل لأن أحيانا بتحتاج تعمل حاجة بره التوكيل

و بناء عليه أرشحلك اللانوس بلا منازع لقلة مشاكلها و توافر فيها طلبك

**mostafabakry** · 29-05-2007 12:58 PM

مرة اخري شكرا لك م/ احمد علي اهتمامك بالرد علي سؤالي للمرة الثانية ربنا يكرمك و يبارك فيك

شكرا للأخ memo_hefnawy علي ردك و اهتمامك ولكني بصراحة ميولي بالنسبة للفيرنا ولإسبيرانزا اكثر شوية من اللانوس ولكن منت محتاج مقارنة فعلية بينهم حتي يكون اختياري صحيح و ليس لمجرد الإعجاب بالشكل و الكماليات
يعني انا شايف ان الإسبيرانزا الأحسن من ناحية الشكل و الفخامة و الدايو منتشرة اكتر و الفيرنا افضل من الدايو في الشكل وفي نفس الإنتشار ولكن مش بفخامة الإسبيرانزا التي تعتبر جديدة بالسوق ولسه لم تثبت كفائتها في السوق المصري

اسف جدا ان كنت طولت في كلامي وبكرر شكري لكل من رد علي استفساري

**sokasoon** · 29-05-2007 01:08 PM

انا رأيى تختار مابين الفيرناا واللانوس وبعد ماتختار بينهم قارن اللى هتختاره بالاسبرانزا

وديه مقارنة بين اللانوس والفيرنا

من هنا

وبعدين انا شايف حضرتك بتبص للثلاثة من ناحية الاوبشن فقط

لازم تبص للثلاثة من كل حاجة مش الاوبشن

**akram2010** · 20-04-2009 10:39 AM

شوف يا اخى الكريم الفيرنا افضلهم طبعآ. الصينى خسارة ترمى فيه مالك واذا كان الروسى فشل فى صناعه السيارات فما بالك الصين حديثه العهد؟ الاسبرنزا شوفها حلوة من بعيد قرب منها صدقنى تفكرنى بماركه النصر شوف قفل الابواب ومحتاج تخبط الباب علشان يقفل معاك. بلاستيك الدواخل ردىء جدآ . تنجد الكراسى سيىء فى التشطيب. عمومآ تشطيب وتجميع سيىء بس انا وضحت هو ركز على الكماليات والالوان ومش مهم اى حاجه تانيه . قطع غيارها غاليه وكآنك بتشترى قطع مرسيدس . بالنسبه اللانوس سيارة شكلها الخارجى مش قوى وخلفيتها مش اد كدة واله الجر 1500 بقوة 85 حصان والفيرنا اقوى اله جر تصل الى 112 حصان و 1600 وشكلها مودرن ومآلوف اكثر وتابلوة جميل وانوارة حلوة وتكيف حلو تلاجه يعنى اتوكل على الله واشترى فيرنا وسعرها مناسب للامكانيات حقها والله يوفقك

**abou_ruqi** · 20-04-2009 06:25 PM

رأيي الخاص جداً

حضرتك مختار أرخص ثلاث عربيات سيدان موجودين في مصر , فلا تتوقع من الثلاثة مردود أعلى من الثمن المدفوع فيهم

العيوب المشتركة في التلاتة :
الثلاثة عوامل الأمان فيهم معدومة , الثلاثة صاجهم سيئ , الخامات والتقفيل متواضع جداً

تعالى بقه نتكلم في الحاجات اللي حتحدد بيهم أيهم تختار

أنت لو أسرة يبقى مهتم بالمساحة الداخلية والشنطة , من الأكبر للأصغر
1- اسبيرانزا
2- لانوس
3- فيرنا

شكاوى ملاك التلات عربيتهم من الشكاوى الأخطر للشكاوى الأبسط
1- الاسبيرانزا والفيرنا
2- اللانوس

التوكيل من الأفضل للأسوأ
1- ابو الفتوح
2- منصور
3- غبور

انتشار قطع الغيار ورخص سعرها و توفر العديد من البدائل
1- اللانوس
2- الفيرنا
3- الاسبيرانزا

الشكل الخارجي و الداخلي من الأفضل للأسواء (مش عاوز أكد إنها وجهة نظري الخاصة )
1- الإسبيرانزا
2- اللانوس
3- الفيرنا

الأوبشنز
1- الأسبيرانزا
2- اللانوس والفيرنا

الجلوس المريح وخاصة لو في سفر طويل
1- الأسبيرانزا
2- اللانوس والفيرنا

طبعا حتلاقي ناس كتير بتتكلم عن موتور الفيرنا (ومعتقدتش إنها أحسن في أي حاجة عن الاتنين التانيين غير في الموتور) ولكن أنا شايف عربية بموتور قوي في غياب الفرامل القوية ووسائل الآمان , دي نقمة مش نعمة , كأنه التوكيل بيبيع أداة قتل وبيقولي خد دي موت بيها !

وده غير إن أنا مش شاب صغير علشان أفرح بالتسارع وكرب أسرة بشوف إن الفرق بين 13 ثانية و بين الـ 12 ثانية في التسارع من 0 إلى 100 , ولا يتبصله أصلاً ومايستهلش يدفع فيه 10 جنية