ببساطة انا بفكر اشتري كام فدان و اعمل مزرعة للموالح و غيره فياريت اليقدر يفيدني بمعلومة عن احسن الاماكن للشراء او الاسعار او اي شي يخص الموضوع يساعدنييييييييييي:ask::ask:
عرض للطباعة
ببساطة انا بفكر اشتري كام فدان و اعمل مزرعة للموالح و غيره فياريت اليقدر يفيدني بمعلومة عن احسن الاماكن للشراء او الاسعار او اي شي يخص الموضوع يساعدنييييييييييي:ask::ask:
انا كنت بفكر برضه اشتري كام فدان في الصحراء
بس مش هزرعها نجيلة
بس للاسف مش عارف اي معلومات عن الموضوع دا ولا سعر اراضي ولا اماكن
بس الي اقدر افيدك فيه شبكات الري لانها شغلي
لو احتجت اي حاجة ابقي قولي وان شاء الله افيدك
في العبور جمعية عرابي وبيبقي فيها نسبة مباني وفيه كمان في العاشر من رمضان او منطقة قريبة منها.
استصلاح الاراضي مكلف جدا و يحتاج لفتره زمنية 5 سنوات لتبدأ في جني ارباح من الزراعة
و أفضل الاماكن في غرب وادي النيل من غرب بني سويف و حتى اسوان و كمان اراضي الواحات و السبب توفر المياه الجوفية بكميات كبيره جدا و السبب التاني ان التربة لا يوجد بها صخور و ده هيقلل التكاليف في تسوية الارض بنسبة كبيره جدا
اقل مساحة للاستصلاح و تكون اقتصادية30 فدان وده عشان انت هتحتاج تحفر بير و عشان البير يكون ليه جدوى اقتصادية لازم يكون بيروي المساحة دي و تكلفة البير بتكون في حدود ال 120 الف جنيه شاملة المواسير و الطرمبة و الحوض و بعض القنوات
كمان انت هتحتاجتعمل معلف للبقر او الجاموس و مزرعة دواجن عشان يكون عندك دورة رأس مال سريعة لمصروفات الارض
هتحتاج تشتري جرار بمجموعة الملحقات بتاعته و ده يبدأ من 50 الف للروماني لحد 150 الف للمعدات الجديدة و على حسب الجرار بكارونة واحده و لا اتنين كارونة و لازم يكون عندك جراش للمعدات
هتحتاج مولد كهرباء عشان تغذي البير و المباني و ده يختلف على حسب الاحمال الاجماليه و ممكن تشتري مولد مستعمل في حدود 30 الف
الموضوع مكلف جداااااااااااااااااااااا لو الارض جديده هتقعد تصرف سنين لحد ما تجيب عائد
لطبيعة الارض الرملية و عشان توفر في تكاليف تشغيل المولد و طرمبة الميه محتاجة عمل شبكة ري بالتنقيط و دي بتختلف تكلفتها حسب التصميم و الخامات اللي هتجيبها و في المتوسط الفدان 2000 جنيه
طبعا من الاخطاء اللي انا و ناس كتير عملوها المحاولات المستمره في تغيير طبيعة التربة و ده عن طريق نقل كميات كبيره من الطمي للصحراء و دي تكلفة عالية جدا ممكن توفرها بالصبر و بزراعة محاصيل صحراوية و كمان باستخدام مخلفات المعلف و مزرعة الدواجن اللي هتعملهم
افضل محاصيل للزراعة من حيث قلة الري و قلة التكاليف و ارتفاع سعر المحصول
السمسم , الاعشاب الطبية , كركديه , طماطم
و لرفع و تحسين خصوبة التربة البرسيم الحجازي
عشان تشتري ارض محتاج تعمل مراحل كتيرة
اول حاجة لازم تكون في بلدك أو على الاقل في بلد قريبة و ليك فيها اصحاب او قرايب عشان في المشاكل تلاقي حد يقف معاك
تاني حاجة تشتري الارض من العرب اللي واضعين ايدهم على الاراضي الصحرا و دي في حدود 500 جنيه للفدان لو بعيد عن الطريق السريع و بتزيد على حسب القرب من الطريق و على حسب اهمية الطريق ده
طبعا الاسعار دي فيها فصال جامد
تالت حاجة بعد العرب تروح للمحافظة و وزارة الزراعة عشان ترسم على الارض و تدفع جزء من تمن الارض و ده بعد ما تكون زرعتها و طبعا الحكومة مش هتملكك الارض على طول فيه دوره كبيره للورق بس ده روتين عادي و بيخلص
مش عايزك تتصدم من الارقام دي و لا من الدوخة بين العرب و الحكومة
انت مش هتقوم الصبح تزرع المساحة كلها لأ طبعا
انت هتقسمها لمراحل على مدى 10 سنوات عشان مايحصلش ارهاق مادي ليك
يعني كل سنة تعمل حاجة و مع الزمن معدل زيادة التصليح بيزيد معاك يعني انت اول سنة هتحفر البير و تجيب مولد و تصلح 5 فدادين و بس
تاني سنة تجيب الجرار و تصلح 5 فدادين كمان
تالت سنة تعمل المعلف
رابع سنة تعمل مزرعة الدواجن و تصلح 5 فدادين كمان او تجيب باقي ملحقات الجرار
خامس سنة تصلح 10 فدادين
سادس سنة هتعمل تجديد و احلال لشبكات الري و الطرمبات و المولد
سابع سنة تصلح 10 فدادين الباقيين
و ربنا يبارك و يرزقكم في المشروع الممتاز و المربح ده بس كمان محتاج بال طويل و صبر
موجود عندى ارض مستصلحة و متساوية (منسقة ) و جاهزة للزراعة و ارض تانية مش متساوية للبيع
واحدة 10 فدان و التانية 5 لو حد مهتم يبعت على الخاص
قرية اسمها زيان على بعد 10 دقايق من مصيف جمصة و فى قابلية للتأجير برضة
بالنسبة للايجار فى المنطقة ( زيان ) بيتراوح ما بين 1000 و 2000 للفدان فى السنة على حسب الارض نفسها موقعها .. الرى بتاعها ... حالتها ..
و ممكن حضرتك تتفق مع المؤجر انك تاخد الارض و متدفعش ايجار لمدة سنة او اكتر فى مقابل اصلاح الارض و تسويتها ..
الاستصلاح ده قصة طويلة و عويصة و انا بدأته من اول 2008
خد لينك الموضوع بتاعي من منتدى آخر , انا مشترك فيه منذ سنوات
و أقرا تجربتى و تجارب بعض الاعضاء هناك و ربنا يكرمك و يكرمنا كلنا
استصلاح الاراضى الصحراوية .حلم ابيض و لا اسود.
يا جماعا طب في اراضي قدامي في طريق اسيوط و في اسماعيلية و في وادي النطرون و كلهم حسب كلام السماسرة مزروعين بس بيختلفو في وسائل الري يعني مرة ري نيلي و مرة ابار جوفية و انا مش عارف انهي احن مكان و احسن طريقة للري دا غير هل بدام مزروعين يبقي مش حتحتاج سنين صح؟؟؟؟؟
فعلا حضرتك الاستصلاح عملية صعبة جدا و خدت مجهود و سنين كتيرة 15 سنة او اكتر
و ملحوظة صغيرة الارض الغير مستصلحة اللى انا ذكرتها فوق دى عبارة عن قطعة 5 فدان منهم 2 فدان تمت زراعتهم قبل كده و متساويين و ال 3 فدان فيهم تل رمل كبير محتاج يتنقل و تتساوى الارض و تكون جاهزة للزراعة ..
مشروع استصلاح الاراضي الصحراوية ده ناجح جدا لكن ليه شروط .. لازم تكون عندك القدره على الصرف لمده لا تقل عن 5 سنوات ,,, لازم تكون عندك المعدات و المولدات و شبكات الري بتصميمات خاصة
دلوقتى يا باشا زارعين رمان ولكن نصف الارض فقط
والباقي يا مسهل . وهكمل الموضوع في منتدى شئون مصرية و ابقى تابعه من هناك و بالصور بأذن الله
و هتحتاط من تلات حاجات اهم من بعض :
اوراق الارض تكون سليمة و قانونية , يعنى تشترى من حد ثقة ( شركات او جمعيات او افراد )
ووضع اليد هادئ و مستقر
و المياه تكون متاحة طوال الوقت !!!
مع العلم ان الموضوع مكلف ومجهد ولازم له اهم حاجة تفرغ .. و هتلاقي الدنيا وردي بأذن الله :S_thum1[1]:
ياريت حد يفهمنى اية اسباب ان المشروع دة ناجح لانة انا شايف انك عمال تصرف طول الوقت ومستنى على الاقل 10 سنين
هل بعد 10 سنين دول هاتعرف تجيب الى صرفتة لانة المصاريف الى بتتكلمو عليها كتير ولا هاتصرف وفى الاخر يادوب لانة بصراحة استصلاح اراضى صحراوية مكلفة جداا دة غير انها عايز صبر كتير:fdsa: http://www.nilemotors.net/Nile/image...ajd%284%29.gif
الري النيلي أو البحري هوه الري بالغمر و في الغالب لا يحتاج الى معدات و احيانا يحتاج الى طرمبة صغيره تعمل بالسولار و هذه طرق ري غير مكلفة و منتشره في الأراضي السوداء أو الاراضي الطينية
ري الآبار في الغالب بيكون في المناطق الصحراوية البعيده عن النيل و يكون بحفر بير و دق ماسوره تصل للطبقة الصخرية التي تكون حاملة للمياه الجوية العذبه و كلما زادت طول الماسوره زادت التكاليف و زادت قوة طرمبة الأعماق و هيه طرمبة خاصة بالابيار و قد تكون عاملةبالكهرباء حينها نحتاج لمولد او تكون المزرعه بها كهرباء او تكون الطرمبة تعمل بالسولار
و الري من الابار مكلف جدا لأن الارض ر ينفع ريها بالغمر لو صحراويه و نحتاج الى شبكة خراطيم للري بالتنقيط لتقليل كميات الماء المطلوبة للري و توجيهها فقط للمكان المطلوب ريه ...
طب يا جماعا حد يعرف شركة او جمعية ذو ثقة اتعامل معاه قبل كده عشان اشتري منه
ياريت يا جماعا الي عنده معلومة عن المزارع الزراعية او الحيوانية يفيدنا برضه
عشان تكسب من استصلاح الأراضي ممكن تعمل حاجة من اتنين :
1 - معاك رأس مال متوسط أو صغير و بيه ممكن تحفر بير و تصلح مساحة لا تزيد عن 30 فدان و تبني معلف و مزرعة دواجن و بير و تزرع زرعة أو 2 بالكتير و تبيع على كده و هتحقق مكسب ممتاز
2- لو معاك مبلغ متوسط أو كبير و ناوي على امتلاك الأرض هتصرف شوية أكتر و هتصلح برضه 30 فدان ( عشان دي المساحة المتوسطة اللي تعادل متوسط ربحية معقول ) بس مع كل زرعة كمية الفلوس اللي انت بتحطها من جيبك بتقل مع الزمن بس مش هتقعد 10 سنين أبدا ممكن 5 أو 6 بالكتير و تكون بتكسب منها كويس جدا ..
عارف كيلو الطماطم و لا الخيار بكام ؟
ربطة الجرجير , الفلفل الرومي
هيه مربحة جدا فوق ما تتخيل بس عايزة مصاريف تقيلة في أول سنتين و بعد كده هتبدأ تقل بالتدريج لحد ما تاخد منها رزق
يا جماعا حد يعرف ايه حوار اراضي الخريجين و ايه الشروط بتاعتها؟؟؟؟؟؟؟؟؟
يا جماعا حد يعرف حاجة عن الاراضي بتاعت طريق الفيوم و طريق اسيوط الغربي؟؟؟؟؟؟؟
ده موضوع محتاج انك تكون عارف حد من البلد اللي عايز تشتري فيها عشان يحللك مشاكل العرب و وضع اليد
اراضي الخريجين موجودة بس مش عارف نزل جديد منها و لا لأ
شوف اعلانات الأهرام و الوسيط بتكون موجودة كتير
السلام عليكم
متابع باهتمام وشكر خاص للاخ مازاجنجي على المعلومات القيمة
ممكن اعرف تكلفة المشروع بالكامل ولو تكرمتم حديعرف حاجة عن الاراضي في طريق مصر اسكندري
ممكن دي تصلح للزراعة انا شايف انها معظمها مزروعة تين
واية اجرءات الشراء ان سمعت ان المفروض اشتري من الجمعيات فقط وابعد عن العرب لانهم واخدنها وضع يد
وبيصعب عليك التسجيل بعد كدا
بص ياباشا انا ممكن افيدك شوية فى الموضوع ده
لو عايز ارض تعمل يها مزرعة فواكه ممكن اقولك ان افضل وارخص مكان هو ارض بنجر السكر على طريق مصر اسكندرية الصحراوى وهى بين القاهره والعامرية وبرج العرب وفى ترعة هناك اسمها ترعة النصر وديه بتغذي المنطقة كلها
وعلى فكرة طلعت مصطفى واخد هناك 3 الاف فدان وسيراميك كليوبترا عامل هناك مزرعة كبيرة جداا ووزير العدل له هناك مزرعة ومستشارين هناك كتير وبتلاقى فيها ارض الشرطه واض القضاه والدنيا كلها هناك واسعار الارض بتعلى كل يوم وفيها كل المرافق الا الصرف الحي
وبنجر السكر دلوقتى بقى بيغذى مصر كلها وبيصدر كمان
ولو عايز نصيحتي لو انته عايز تعمل مشروع مزرعة يبقى اعمل مزرعة ابقار بغرض استيلاد العجول وبيع الالبان
المشروع ده تقدر تسيطر عليه ومربح جدا
بس خلى بالك ابعد عن شراء العجول الصغيرة وتسمينها لان ديه هيه المشكلة اللى ممكن تواجهك لو عايز تسمن عجول يبقى العجل مولود عندك
ولو عايز معلومات عن اض بنجر السكر ان ممكن افيدك ان شاء الله وبرضه عن المزرعة الزراعية او الحيوانية وخلى بالك متروح مكان مفهوش ناس علشان العمالة هتكون اغلى كتير واي سوال انا فى الخدمة
جزاك الله كل خير يا اخ حسان ممكن تقولي هي تقريبا في الكيلو كام واخبار الاسعار ايه سعر الفدان ؟ان شاء الله لو في امكانية للشراء اية الزراعات المربحة ممكن ازرعها غير البنجر وتصلح مع نوع الارض ولو تكرمت ممكن تقولي تكلفة المشرع تقريبا كام انا جادي في موضوع استصلاح الاراضي الزراعية وربنا يسهل
على فكره انا طرفى ارض وضع يد مضمونه بأذن الله الفدان ب من 700 جنيه الى 2000 جنيه حسب موقعها من الطريق الارض دى فى منخفض القطاره والمياه هناك ابار فقط بس ارض جديده وكلها رمليه وليست صخريه ومن الواضح من التحاليل التى اجريت على المياه المستخرجه من الابار انها ارض عفيه جدا وعلى فكره انا اخذت عينة مياه وحللتها كى اقتنع وكانت النتيجه انها تصلح لجميع انواع الزراعه لو عايز تفاصيل اكتر انا ممكن افيدك ده تليفونى 0102023242 فتحى
وضع يد يعني ايه
هاقولك انا يعني ايه يعني ناس تيجي على اراضي ملك الدولة(ملك الدولة يعني ملك الشعب)وتستولي عليها وبعدين تبيعها لواحد بدون عمل تسوية مع الحكومة لشرائها يعني من الاخر اللى واضع ايده على ارض بدون اوراق ملكية يبقى حرااااامي ومش حرامي سارق واحد بس لا دة سارق الشعب كله....عرفتو ليه بقى خربتو البلد
ههههههههههه اولا شكرا لاسلوبك المهذب لكن انت فهمت غلط مش زى ما انت فاهم خالص انا افهمك.
هما العرب فعلا عملوا تسويه للاراضى اللى موجودين فيها مع جهات مختلفه التابعه للاراضى لكن عادة بيكون فى اجراء ناقص اللى هو ايه دفع المبالغ المستحقه رسميا وليكن 1000 جنيه او 500 جنيه للفدان ده غير السعر اللى انا ذكرته ال 700 او 1000 ودول للى مخلص الاوراق لكن ما بيعرفش يكمل الاوراق عشان مش عايز يدفع من معاه هو يقولك ادفع فى الجهات المختصه بتنسيق معى واستلم الارض وبغدين الحكومه ما تقدرش تاخد اكتر من الف جنيه للفدان مش لانها بتسرق لا لكن لان الارض مفقود فيها الامل من حيث التعمير والمشوار الصحراوى وطبعا العرب مابيزرعوش والا ما كانوا يبيعوا عرفت هى الارض رخيصه ليه يعنى مش معنى انها رخيصه يعنى مسروقه علشان انت لو شفت الاراضى اللى هناك دى هاتقول صح ايه المساحات الواسعه دى كل دى اراضى مين بس اللى يروح ويعمر والله وببلاش بس قليل اللى بيروح محتاجه بس اللى يفكر فى المستقبل .
طيب انت بتقول انها ملك الدوله يعنى ملك الشعب يعنى ملكى انا وانت طيب ممكن نقدر نروح انا وانت ونطالب بيها طيب لو الحكومه ادتهلنا ببلاش هنعرف نقعد فيها اصلا على فرض ده حصل طيب والناس اللى قاعدين فيها من سنين طويله هتسيبها بالسهل كده لا طبعا ليه انا اقولك لان الاحق بتملكها هم وانت عارف اقول كمان ولا كفايه وياريت الدوله تاخدها على الاقل هتوزعها على اخويا واخوك بدل البطاله دى وتبقى جت من عند ربنا دا انا مجرد وسيط يعنى لو مش انا ففى غيرى كتير انت تعرف بقى انى اول مره فى حياتى ان يوجه لى اتهام بشع زى ده (خربتوا البلد ) حرام عليك انت تعرف انا عايش ازاى اصلا طبعا انت فاكر انى راكب عربيه ماى بخ وعندى املاك كتير وبقبض عشر الاف جنيه وبنام على ريش نعام وعندى ووووووووووووووووووووووووا عكس كل ده هتندم انك قلتلى كده وهتزعل من جواك ربنا اللى يعلم بعباده
المشكلة انك لما بتشتري من البدو دول اللي معظمهم اساسا شوية بلطجية لو مادفعتلوش الاتاوة يسرقك فبتشجعهم على كدة حتى لو هما غلابة فعلا....ونصيحة مني موضوع الاراضي وضع اليد دي دي مشبوهة ولازم تسال اهل الدين الثقة الاول فى مشروعيتها...وبنا يكرمك ويرزقك من الحلال ...وعلى فكرة كلنا تعبانين اللي معندوش مشكلة فى فلوس عندوا مشكلة فى حاجات تانية اصعب ربك كريم وعادل..وتاني باكررلك انا ما اعرفكش والا بيني وبينك عداوة لكن انا شايف ان دي مظهر من مظاهر الفساد اللي في مصر وربنا يسترها علينا جميعا
يا جماعا حد عنده معلومة عن اراضي الخريجين الي علن عنها وزير الزراعة؟