الزواج .... كيف ؟

**shaddadfalcon1** · 19-09-2010 03:34 PM

ياجماعه الراجل ناوي خير وعايز يستفيد فياريت اللي عنده حاجه تفيده يرد واللي معندوش ميفضلش يقول شر وخنقه وانت مالك كده والكلام ده كله

دي حياه وكل واحد حر فيها ومش معني ان حد بيكره الزواج انه يكره الناس كلها فيه

مش فاهم اللي بيكره الجواز بيكرهه ليه ؟ هل جرب؟ ولا كلام بيتسمع وخلاص

مش يمكن لما ينتوي يتجوز ده يكون دافع ليه انه يشتغل ويجد وربنا يكرمه
علي عكس اللي مقضيها وضاربها صارمه واللي جاي علي قد اللي رايح وممكن يعمل حاجات كتيير غلط

علي الأقل اللي اتجوز ده عمل حاجه انما اللي عايش بطوله عمل ايه؟؟؟

**a_samy** · 19-09-2010 05:25 PM

المشاركة الأصلية كتبت بواسطة mikho83

عايز تتجوز بسرعة وبدون مشاكل؟ ادعي ربنا في كل سجدة ليك إن يعجّل بزواجك ويرزقك الزوجة الصالحة اللي تسعدك في دنيتك. والله أنا عملت كده واتجوزت في اخر سنة ليا في الكلية بس كنت بدعي ربنا بالدعاء ده كتير.

ربنا يسعدك ويباركلك فى زوجتك

**al_manara** · 26-09-2010 03:06 AM

المشاركة الأصلية كتبت بواسطة egyptiantune

نصيحة من أخ أكبر إختار الزوجة الصالحة وإظفر بذات الدين

وسيبك من اللى تقولك أنا مش مسؤليتى الخدمة وعايزة خدامة تخدمنى فى البيت وطباخ والكلام الفارغ ، أمال بيتجوزوا ليه أصلاً أما هما مش قد المسئولية ( حسبى الله ونعم الوكيل فى اللى بوظ عقول الناس وبعدهم عن تقوى الله ) ، الله يمسى أمهاتنا وأخواتنا بالخير والصحة

المشاركة الأصلية كتبت بواسطة n_i_t_e

انت جيت على مشكلة كبيرة....
طبيعة الحياة هنا بتخلى كتير من الشباب و البنات الجاهزين للجواز يتقابلوا بطريقة طبيعية بحكم الظروف بالتالى يختاروا بعض.
بالتالى ظهر اكتر فكرة الحل التانى اللى اسمه جواز الصالونات و اللى باسميه جواز الفترينات اللي مش بحبه لأنه أصطناعى بس بحترمه لأنه أحسن من مفيش.
الموضوع بيتم كالأتى بتعلن للأصدقاء و المعارف انك عايز تتجوز و تحدد المواصفات اللى انت عايزها (أهلها ناس طيبين - تعليم عالى - انا على اد حالى معنديش شقة...ألخ ) أمثلة زي دي.
و بعدين المعارف اللى يعرف واحدة بتنطبق عليها الصفات دي بيقولك عليها و يرتب معاك بالشهامة المصرية و حب الخير انه يكون واسطة بينكم و يتم اللقاء سواء فى بيتهم أو مكان عام مع الأهل.
لو من معارفك ميعرفش حاليا لما بيلاقى فرصة بيفتكرك و يبلغك.
طبعا الموضوع بيكون أسرع كتير لو معارفك كتير و لو هم بيراعوا فعلا أختيار المناسب للأسف كتير المعارف بيقلولك ان عندهم المناسب دون مراعاة لطلباتك اللى انت حاططها. أنا عندي المشكلة دي معارفى قليلين و مليش أقارب هنا بالتالى الموضوع ماشى عندي ببطء شديد.
الأعضاء اللى بيقولوا انت كده أحسن من غير جواز انا أختلف معاكم..لأن كده كده الواحد هيتجوز سواء الأن أو بعدين و معتقدتش ان كلكم ناويين تقضوا العمر كله بدون جواز و اكيد عاجلا أو أجلا هتتجوزوا.انتو بالضبط عاملين زي اللى بيجروه لحبل المشنقة و هو بيقاوم و يزعق بس مفيش فايدة هيتشنق برضه فى الأخر

المشاركة الأصلية كتبت بواسطة shaddadfalcon1

ياجماعه الراجل ناوي خير وعايز يستفيد فياريت اللي عنده حاجه تفيده يرد واللي معندوش ميفضلش يقول شر وخنقه وانت مالك كده والكلام ده كله

دي حياه وكل واحد حر فيها ومش معني ان حد بيكره الزواج انه يكره الناس كلها فيه

مش فاهم اللي بيكره الجواز بيكرهه ليه ؟ هل جرب؟ ولا كلام بيتسمع وخلاص

مش يمكن لما ينتوي يتجوز ده يكون دافع ليه انه يشتغل ويجد وربنا يكرمه
علي عكس اللي مقضيها وضاربها صارمه واللي جاي علي قد اللي رايح وممكن يعمل حاجات كتيير غلط

علي الأقل اللي اتجوز ده عمل حاجه انما اللي عايش بطوله عمل ايه؟؟؟

كلام جميل . بس لية ناس كتير يائيسة كدة
هو الموضوع زي ما قلت لكم انة يكون حاجة تفيد اي حد مننا عاوز يتجوز . ونفيد بعض بنقل التجارب

**vBulletin** · 26-09-2010 03:42 AM

ومالة ياباشا وهيا حاجة وحشة ولا اية

بص انت فركت فى الصح لانك عايز الحلال بتاع ربنا والنى صلى الله علية وسلم قال يَا مَعْشَرَ الشَّبَابِ مَنِ اسْتَطَاعَ مِنْكُمُ البَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ، وَأَحْصَنُ لِلْفَرجِ، وَمَنْ لَمْ يَسْتَطِيعْ فَعَلَيْهِ بِالصَّوْمِ،

يعنى الى قادر على مصاريف البيت يتجوز يعنى لما تقعد كدة ومتتجوزش اكيد الشيطان هايلعب بعقلك لانك عازب ودة خطر بصراحة

والله هو اة الزمن وحش والدنيا وحشة بس انا هاحكيلك قصة :

فية واحد اعرفة حالتة المادية وهو متجوز كانت حالتة المادية مش كويسة للدرجة طبعا اتجوز وخلف وتمام التمام جة بقة عايز مراتة متخلفش تانى عشان الظروف المادية فى الوقت دة والحياة طبعا استخدم اقوى وسائل منع الحمل ويجى فى يوم يفاجىء انة مراتة حامل ازاى متعرفش دية بقة تدبير من الله انة مش احنا الخلق هانمنع الى ربنا عايزة ومهما كانت قوة الوسائل والاسباب ومع ذلك الحياة معاة مش تمام من الجهة المادية بس سبحان الله ربنا سترها وماشية اخر حلاوة ومفيش حد بيجوع ولا اى حاجة

الخلاصة ياخى انت لو تقدر انك تصرف على الانسانة الى هاتتجوزها انا مش هاقولك تاكلوا كباب لا لو تقدر من ناحية عادية خالص والتوسط يبقى على خيرة الله واتجوز

اكيد هتلاقى كتير من المشاركات معارضة الفكرة بتعتك بس دية حياتك وبتوافق دينك وحلال نصيحة منى ادام انتا ربنا ميسرها معاك شوف بنت الحلال الى عندها دين واخلاق وجمال ومتسبهاش واتجوزها وربنا يكرمك ان شاء الله
وياريت تسال الناس الى بتكرة الجوزا لية اسال علاقتهم مع ربنا عاملة ازاى لان ربنا لما يلاقى العبد طائع بيستجيب لة اما بقة لو واحد ولا بيصلى ومقصر فى حق ربنا اظن مش مكسوف وهو بيطلب من ربنا انة يكرمة ولا اية !!!!
الحياة والظروف مش هاتحكم علينا الى احنا عايزينة بالعكس انتا ممكن تلاقى مليون بيشتكوا من الى بيحصل بس فى الاخر بتلاقى كلمة الحمد لله لانة بص لغيرة لقى فعلا ان هو فى نعمة ربنا ادهالة

وربنا لما يدى الانسان الفلوس بيحب انة يرى نعمتة على عبدة

وربنا يكرمك ومتقلقش ومتخليش الشيطان بيلعب بعقلك لانك كدة بالنسبالة صيدة وطبعا انت داخل طريق حلال فلازم
يكرهك فية باى شكل عشان متعملش الحلال وتقع فى الحرام واسال المجرب

توكل على الله وربنا يرزقك بالزوجة الصالحة والذرية الصالحة والرزق الحلال الطيب ويبارك عليكم

**حاتم فوزى** · 26-09-2010 07:12 AM

بسم الله الرحمن الرحيم(( ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا
وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) )) صدق الله العظيم

أكثر من الاستغفار واكثر من الدعاء كما قال الاخوة وان شاء الله ربنا يرزقنا العفة جميعا والزوجة الصالحة والمال والاولاد ويرزقنا الجنة كمان
محدش هيوفقك للى انت محتاجه غير ربنا خليك مع ربنا