مشكلة مجنناني في كورولا 2006

**boing** · 17-09-2010 03:58 AM

السلام عليكم ورحمة الله وبركاته
معايا كورولا 2006 ماشية 130 الف كم
انا المالك الاول ليها ...من فترة غيرتلها الاربع مساعدين جبتهم اصلييين اللي نازلين ليها تماما لما حسيت ان العربيه بقت مش اد كده وغرمت مبلغ كبير اكتر من 1700 جنيه
بس بردو لسه العربيه مش مظبوطه معايا خالص من ناحية الثبات
يعني وانا سايقها اقل تماويج في الاسفلت بتسمع معايا في الطاره وبسمع زي صوت طقطقه من العفشه وانا ماشي على ارض غير ممهدة او طالع على بروز اسفلت احس ان فيه حديد بيخبط في بعضو بالذات من الناحية اليمين قدام وورا
علما بان العفشة متربطه على طول والاربع كوتشات لسه جايبهم مع المساعدين الجداد اللي مكملوش 2000كم لحد دلوقتي

المهم فيه مكانيكي قالي الكبلن هوا اللي عامل كده وحلو وشحمه وركبه تاني والعربيه اتظبطت يومين بس ورجعت زي ما كانت علما بردو اني معنديش طقطقه في الملفات خاااااااااالص
المشكله كلها جايه من تحت في العفشه
حتى على الكورنيش في الاسكندرية العربيه بتبقى ماشيه تنطط من اقل تماويج في الاسفلت وبيبقى ضغط الهواء في الاطارات مظبووووط

هل دي جلب مقصات زي ما قريت عنها ولا حاجه تانيه لان فيه عفشجيه قالو غيرها وناس قالو لا

رجاءا ساعدوني يا اصحاب الكورولات

**asemx1** · 17-09-2010 10:46 AM

السلام عليكم اولا
حضرتك ماكنش لازم تغير المساعدين بس بدام غيرتهم يبقى خير اهو اجراء صيانه بس خليهم عندك لانهم هتلاقيهم كويسين

صوت التخبيط بيبقى من
1-بيض اسكاترا داخلى وخارجى ( لازم تكشف عليهم ) او غيرهم صيانه برضو مش غاليين
2 - بيض مقصات
3- بيض اتياش وجلد مسامير اتزان
( كله بيض فى بيض اى حاجه فيها بيض لازم يتكشف عليها كويس او تغيرهم للصيانه ) البيض هوا الى بيعمل صوت التخبيط فى المطبات لو مبوش حبه ولو عايز تتاكد قول للعفشجى يفكلك معظم البيض وتروح تكبسهم كلهم على بعض ب 40 جنيه فى اى ورشه مخرطه وركبهم لو راحوا يبقى العيب منهم وغيرهم بطقم جديد او سيبهم لحد ما يبوظوا تانى وغيرهم بطقم جديد اصلى
4- فى احتماليه علبه الدركسيون بس مستبعده
5- فى احتماليه جلد مقصات بس بتتكشف على طول

**moosaleh** · 17-09-2010 02:54 PM

السلام عليكم
لوحضرتك من اهل اسكندريه جرب تروح لعفشجى اسمه عبده بنزينه وده محترم جدا وعنده ضمير ومكانه فى شارع عبدالمنعم اول شارع ادخل يمين بعد مصنع ومعرض سجاد دمنهور خلى بالك مواعيده من8 صباحا حتى 4 مساءا لان العفشه مشكلتها ان اى جزء محتاج تغيير يبوظ حاجات كتير بالعفشه وبرده ياريت ما تجبش غير قطع الغيار اللى انت واثق فيها حتى لو غاليه ولو حتى تجبها من التوكيل بس ياريت بعد ماتروح للعفشجى ده تدعيلى

**yahyazidan** · 17-09-2010 03:56 PM

ياسيدى مادام المشكلة راحت مع تشحم الكبالن غيرهم بجديد وريح الجمجمة لان التشحيم الى عاملهولك ده حل مؤقت

**boing** · 19-09-2010 10:13 AM

هيا فعلا العمليه كلها بقت بيض في بيض والله

العربيه دي خربت بيتي
علفكره العربيه النهارده بقت ماشيه اكنها سايبه من بعضها وبقيت حاسس كان كل جزء ماشي في ناحيه
التوك توك بقى اثبت منها والله بدون مبالغه
انا اللي مستغربلو ومخليني زعلان اوي كده...ليه غرموني 1700 جنيه مساعدين و 1300 جنيه كاوتش ومفكروش يبصو على الحاجات اللي حضراتكم قلتو عليها دي؟؟؟؟؟وانا سالت الصنايعي ده فيه حاجه تانيه محتاجه تتغير قالي العفشه زي الفل
العفشجي ده اشهر عفشجي في طنطا اسمو محمد حديده اللي في شارع متفرع من حسن رضوان واكيد كل اللي من طنطا عارفو

عموما شكرا يا اخ عاصم

بس انا مش ناوي اروح لصنايعيه تاني انا حبيت اخد رايكم بس واشوف خبراتكم ايه قبل ما اطلع ع التوكيل واشوف ايه الكلام هناك وربنا يسترها معانا ومعاكم جميعا

**أبو عبدالله** · 19-09-2010 11:44 AM

يا أخي الفاضل مع كامل احترامي
ولكن من الواضح ان الصنايعيه اللي حضرتك بتروحلهم مش اد كده خالص

من الأخر روح التوكيل مشوار واحد وادفع مبلغ واحد وان شاء الله العربيه هتبقى زي الفل بإذن الله

وطبعا التوكيل يبقى القاهرة ( العبور او ابو رواش او العباسية )
مش مراكز معتمدة من اللي موجوده في المحافظات
او ممكن مركز الرزق في الأسكندرية اخوانا اللي في الأسكندرية وغيرهم بيشكروا فيه جامد

**د.محمود صلاح** · 20-09-2010 04:46 PM

طريقة الكشف على البيض : -
انزل امسك العجل الامامي من اعلى نقطه فيه وهزه للداخل والخارج تلاقيه يلب معاك

طريقة الكشف على الاسكتره : -

خلي حد يلف الدركسيون يمين وشمال متكرراً والعربية مطفية وواقفة هتلاقي بوش في حركة العجلتين .

ده من واقع خبرتي عند العفشجية