الموضوع: عن امتلاك الزوجه سياره خاصه اتحدث

انا مع انك تجيبلها عربية طبعا لأسباب كتير

- اولا بترحمها من سخافة الناس و سخافة السواقين التاكسى اللى مهما تديلة مش عاجبة ،، ولا الميكوباصات بقى دى بهدلة تانية وتحرشات و قرف

- ثانيا هتوفر لنفسك عالأقل 4 الاف جنية فى السنة دة لو عندك طفلين فى المدرسة بتدفعلهم قد كدة فى السنة وهترحم ولادك من خناقات بتحصل فى الباص ولو حد يرزل على بنتك ...

- ثالثا هتخليها معتمدة على نفسها لو انت مسافر ولا تعبان لا قدر الله هتعمل ايه هى؟؟؟ وهترحمك من مشاوير كتيرة وانت جاى تعبان من الشغل تقولك انا عايزة انزل ضرورى مشوار وانت طبعا هتكون مش طايق نفسك وتقول دى مش حاسة بيا


ملحوظة :::
لما تجيب عربية لو المقدرة تسمح يبقى هاتلها عربية على قدها جديدة بالقسط احسن لو مش هتقدر يبقى امرك لله فى المستعمل بس دايما عايزة صيانة

انا وجهة نظرى مختلفة شوية، لو مراتك مش بتشتغل يبقى مفيش داعى لعربية تانية و الأولاد احسنلهم اتوبيس المدرسة و ده لعدة اسباب من وجهة نظرة "الشخصية" :

- مشاكل السواقة و الزحمة و الركنة اللى كلنا بنعانى منها هتبقى الضعف بالنسبة ليك.
- ممكن يتفتح عليكم باب توصيلات و مشاوير للأقارب و المعارف و اصدقاء الاولاد و ده هيأثر على البيت.
- شوية بشوية هتلاقى نفسك فى وادى و مراتك و اولادك فى وادى، صحيح هتستريح من توصيلاتهم، بس مع الوقت هتتعودوا على ان كل واحد ليه عربيته و مشاويره و دنيته و دى حاجة لا انصح بيها اطلاقا علشان عيوبها اكتر بكتير من مميزاتها.
- كون الواحد مسئول عن حاجات كتير فى بيته بيقلل فرص وجود وقت فراغ فى حياته، ووقت الفراغ ده مش كل الناس هتعرف تملاه صح و حتى لو استغليته صح، فالاولى انك تكرسه لبيتك و اولادك.