الموضوع: أزمة مراهقة.........مفيش حل؟؟

ربنا يعينك ، الناس قالو كلام كتير مظبوط

عايز أأكد عليك بس انك لازم تصاحبه وتعرفه علي اصحابك وحاول تفتح مواضيع مشتركه بينكم علشان تقرب منه وشاركه في حياتك و في افكارك خليه يفكر معاك علشان يقرب منك أكتر

يعني صاحبه بالأفعال مش بالكلام ، ولو عاوز توصله أي حاجه حاول بقدر الإمكان انها تكون بشكل غير مباشر لأنه مش هيتقبل منك كلام بسهوله

وأكد عليهم في البيت محدش يقعد يقارنه بحد ويقوله مثلا شوف اخوك احمد بيعمل ايه وانت طالع ازاي والحاجات دي بلاش منها خالص ولا تقعد تقوله وانا قدك كنت بصلي الخمس فروض في الجامع بلاش الكلام من النوعيه دي

وزي ما هتخليه يتعرف علي صحابك حاول تخليه يتكلم برضو علي اصحابه ويحكيلك عليهم بشكل غير مباشر علشان تطمن هو ماشي مع مين وبيعملو ايه

موضوع العند بقي كبرو دماغكم منه خالص زي ما والدك عمل يعني مثلا مش عاجبه الأكل خليه جعان ، بيزعق علشان حاجه سيبكم منه ولا كإنه موجود

ابراهيم اخويا انت عارفه طبعا في نفس المرحله دي وساعات بيعمل حركات العند والحاجات دي بس زي ما شوفت انا مصاحبه وكذلك اصحابي وساعات بيخرج معانا وبييجي معايا مقابلات المنتدي والدنيا ماشيه ، ساعات بتكلم معاه في مشاكلي وفي المقابل برضو لما يبقي عنده حاجه بقعد اتكلم معاه فيها

لكن لما بيعند مقولكش يعني ساعات بعديهاله وساعات بسيبه يخبط دماغه في الحيطه ، يعني مره كان معايا في الشغل في طنطا والمفروض هنروح شبين الساعه 2 بالليل ، طلعت العربيه وهو واقف مستنيني وبعدين وقفت بعده بمترين كده بهزار يعني هو قفش اني ارجع اقف قدامه وإلا مش هيركب ، شويه برضو مجاش هددته اني همشي مفيش فايده ..

سيبته وخدت لفه كده ورجعت وقفت في نفس المكان وقلتله والله لو ما ركبت همشي برضو مفيش فايده سيبته ومشيت وخليه هو بقي يدور علي تاكسي يطلع بيه ، وصل بعدي بساعه علي الأقل وطبعا مكانش متخيل اني ممكن اسيبه وامشي وانا كنت قلقان عليه وهو استغل كده وقفل التليفون بس عادي