طلب مساعدة من اللي اتجوزوا خلاااااااص

**ainshouka** · 18-09-2010 05:57 PM

متشكر ليكم جدا على نصايحكم ومساعدتكم
ومن مشاركاتكم وضحت المشكلة اللى انا فيها

المشاركة الأصلية كتبت بواسطة ashraf_msd

بس في حاجه.......

انا كنت عارف ان خلال سنتين هقدر انجز التزماتي ... و تعبت قوي بعد الجواز عشان اعرف اجيب الشقه الصراحة

الألتزمات دي سواء جبتها قبل الجواز او بعده هتفضل عليك عليك

انما لو مافيش خطه في دماغك ... وشايف انه من الصعب عليك تحقيق عوامل الاستقرار المادي كجواز ... فما ينفعش تربط بنت الناس معاك ... واصبر شويه لحد ما توصل لنقطه تعرف فيها انك هتقدر تقوم بالألتزمات الماديه تجاه جوازك و بيتك

دا بالظبط نفس تفكيرى
لانى شايف انى لسه امامى مش اقل من سنتين عشان اقدر اقول ياجواز
وحتى ساعتها مش حتكون كل حاجة تمام
لأ ممكن نقول يعنى حقدر اقف شوية على رجلى وابقى عارف بالظبط فين راسى من رجلى
فأنا مش عاوز اخش فى موضوع مش عامل حسابه واربط بنت ناس فعلا معايا

المشاركة الأصلية كتبت بواسطة pro_samir

استخير وشوفها لو ارتاحتلها وعجبتك قولهم انك قدامك شوية وقت علي ما تجهز

ودى بالنسبة لى مش حيكون حل عملى لانى مش حقدر اخليها جنبى كده مثلا سنتين على الاقل لانى بحب فترة الخطوبة تكون قصيرة يعنى اخرها مثلا 8 او 9 شهور بالكتير لكن سنتين مش حينفع اكون داخل وخارج عليهم كده لانى شفت تجارب ناس صحابى خللوا فى فترة الخطوبة لدرجة بقى منظرهم وحش وكانت المشاكل بتكتر باستمرار بين الاهل

المشاركة الأصلية كتبت بواسطة kamalsalem

بص انا زي الناس دي كلها رحت اخطب وانا مديون ب 15000 جنيه وعاااادي اتجوزت ف شقة ملك وغيرت عربيتي

استخير ولو الموضوع فيه خير ربنا هيمشيها من عنده.. بس انا بصراحة بلوم عليك حاجة.. انك عارف الحديث الشريف وعارف انه رزقك على الله و بتسألنا احنا.. يعني كلام ربنا مش اتقل وزناً من كلامنا كلنا على بعض؟ انا بقول الكلام ده بابتسامة كبيرة على وشي وارجو انك تقبله بابتسامة برضه

انا مش بزعل من اللى عاوز ينصحنى
بس يمكن انا معرفتش اوصل مرادى كويس

يعنى فيه حديث عن الرسول بيقول من استطاع منكم الباءة فليتزوج

يعنى معنى كده ان كل من اراد ان يتزوج لازم يشوف نفسه الاول وبعدين يتوكل على الله
فانا مقصدتش انى شاكك فى رزق ربنا

جوز اختى كان بيقوللى انه لما جه يتجوز اختى مكانش فى جيبه غير 3 الاف جنيه ودا من 12 سنة يعنى برضه مكانوش يعملوا حاجة بس ربنا اعانه
لكن هو كان طبيب وكان لسه بادئ عيادته وابتدى يجهز الشقة شوية فكان ممكن نقول قدر يقف على رجليه شوية

فكل اللى ردوا على كنت عاوز استفسر منهم فى النقطة دى
هل لما اتقدمتوا فعلا للجواز مكانش معاكوا اى حاجة او عاملين حسابكم على حاجة زى دلوقتى كده واتقدم وخلاص على اساس ان دى بنت ناس لا تعوض

ولا برضه ابعد احسن زى ماشرحتلكم ظروفى كده

والواحد شايف ان زى ماربنا حط دى قدامى من غير ما اتعب فى حاجة ممكن يرزقنى بواحدة تانية تكون ذات خلق

هل تفكيرى انتوا شايفينه صح ولا انا غلطان

لانهم فى البيت بيقولولى انى معقد الدنيا

**ainshouka** · 18-09-2010 06:00 PM

المشاركة الأصلية كتبت بواسطة kangaro

اعمل استخارة وتوكل على الله .. الغني بيتجوز والفقير بيتجوز
(انت عندك كام سنة ؟)

25 يعنى بقيت شحط خلاص

**makka** · 18-09-2010 06:34 PM

اقسم بالله انا داخل اخطب وانا مديون بخمسة آلاف جنيه كنت لسه شارى عربية
اشتريت شبكه بـ15 الف بعد شهرين من قراية الفاتحه وفى قراية الفاتحة جبت دهب بخمسة الاف المهم اللى عايز اوصلهولك ان ملكش دعوة ومتفكرش بس اهم حاجه تكون بنت كويسة وربنا هييسر الامور قوى.
انا مبعملش حاجه من غير تفكير ودراسة بس الامور دى بتمشى كده لانك لو بصيت على الحقيقة ان الجواز بيكلف اكتر من 100 الف لو هتستنى لحد متلمهم مش هتتجوز لانك مش هتعرف تلمهم علشان كده ملكش دعوه سيبها لربنا.

**otefa** · 18-09-2010 06:48 PM

طبعا توكل علي الله صلي أستخارة والرزق علي الله .........المهم الصراحة مع أهل عروستك
وبعدين يعني لو مثلا معاك حتي كام مليون ولا قدر الله الواحد جاله مرض ولا.........أيه الحل ساعتها ...........توكل علي الله ولا تؤخر زواجك خوفا من المادة
وكلنا بشر وبيجي علينا لحظات قلق وربك ألي بيقسم الأرزاق.........تحياتي

**hemalotfy** · 18-09-2010 09:33 PM

توكل على الله ربنا بيسهلها وبيفتح ابواب رزق مكنتش في الحسبان

**ashraf_msd** · 19-09-2010 03:39 AM

المشاركة الأصلية كتبت بواسطة ainshouka

دا بالظبط نفس تفكيرى
لانى شايف انى لسه امامى مش اقل من سنتين عشان اقدر اقول ياجواز
وحتى ساعتها مش حتكون كل حاجة تمام
لأ ممكن نقول يعنى حقدر اقف شوية على رجلى وابقى عارف بالظبط فين راسى من رجلى
فأنا مش عاوز اخش فى موضوع مش عامل حسابه واربط بنت ناس فعلا معايا

لأ كده يا صاحبي يبقي تستنى السنتين .. ماينفعش اخطب بنت الناس سنتين ولسه بعد السنتين هتبان الامور واعرف انا جاهز للدخلة امتى.

يعنى فيه حديث عن الرسول بيقول من استطاع منكم الباءة فليتزوج

الله ينور عليك ... انت جبت من الاخر ... خير الكلام هو كلام خير الانام

عن ابن مسعود رضي الله عنه قال قال رسول الله صلى الله عليه وسلم { يا معشر الشباب من استطاع منكم الباءة فليتزوج فإنه أغض للبصر وأحصن للفرج ، ومن لم يستطع فعليه بالصوم فإنه له وجاء }

الباءة حسب جمهور العلماء : القدرة الجنسيه والقدرة الماديه ومؤن الزواج

ما قلكش خالص لو لقيت العروسه التمام اتجوز ...

وصدقني. التزمات الجواز نفسه اصعب كتير من العروسه .. والعروسه هيا اسهل حاجه هتلاقيها.

نسأل الله لك التوفيق والتيسير ونخدمك قريب يوم فرحك

**pro_samir** · 19-09-2010 04:37 AM

بالعكس انا شايف المشكله الأكبر في الجواز دلوقتي انك تلاقي واحده كويسه وتعجبك وتناسبك في نفس الوقت علشان كده بقولك لو ده حصل متسيبهاش وأي حاجه تانيه محلوله ان شاء الله حتي لو بعد وقت زي ما الشباب بيقولك الماديات ربنا بيسهل فيها من حيث لا تحتسب

لأنك لو مخطبتش واستنيت الفتره دي تفتكر هتلاقي عروسه بسهوله ؟

وبعدين انت متضمنش بكرا فيه إيه يعني اللي تقدر تعمله انهارده متستناش عليه لبكرا

ومش عايز اقولك دبس نفسك بدري بدري علشان لما توصل 30 زي حالاتي يمكن نفسك تتسد عن الجواز أصلا

**maiasn2000** · 19-09-2010 04:55 AM

يا اخي العزيز من توكل علي الله لايمكن ان يضيره احد وفي امر الزواج بالتحديد اسأل اي واحد اتجوز هاتلاقيه بيقول لك نفس الكلام اللي هاقوله ده
نية الجواز لوحدها بشرط النيه الصادقه لعفة النفس ييسر لك الله مالايمكن ان تصدقه خصوصا اذا كانت الفتاه من قسمتك ونصيبك صدقني من نوي الزواج اعانه الله وفتح له الابواب من حيث لايعلم وتتيسر له الامور
ثم انك تدفع اقساط شقه يعني ترتب للزواج واهم شيء ان تكون صريحا جدا من اول زياره حتي لاتدخل في متاهات بدون سبب يعني كن واضحا في دخلك والتزاماتك وامكانياتك ولو تناسبت ظروفك مع عروستك فتوكل علي الله واذا لم يقبلوا فلا ضير وانك لم تضيع فرصة الارتباط بزوجه اهلك يرضوا عنها وانت نفسك تقبلها زوجه ابدأ باول خطوه وهي المفاتحه والصراحه والباقي تدبيره من عند الله واذا كل واحد قال لك تجربته صدقني ستتعجب من تدابير الرحمن

**M.almaghraby** · 19-09-2010 05:07 AM

مع احترامي لجميع الاراء

انتا متعرفش البنت دي اصلا " حتي لو كانت بنت كويسة "

دا جواز صالونات ,, يبقي ممكن يبقي فيه كتير غيرها يا باشا

لو حاسس انك حتبقي مضغوط ماديا يبقي فكك من الحوار دا ,,,, دا رأيي

-

الموضوع: طلب مساعدة من اللي اتجوزوا خلاااااااص

LinkBack

أدوات الموضوع

عرض

-

-

-

-

-

-

-

-

المواضيع المتشابهه

اعمل ايه مع البنزين انا قرفت خلاااااااص !!!!

انا تعبت خلاااااااص

ياجماعة انا تعبت خلاااااااص جيبت اخري العربية اتشوهت وهي وقفة

محتاج مساعدة من الاخوة اللي في قطر

يوميات اتنين اتجوزوا من ع النت

الكلمات الدلالية لهذا الموضوع

المفضلات

المفضلات

ضوابط المشاركة